- Latest available (Revised) - English
- Latest available (Revised) - Welsh
- Original (As made) - English
- Original (As made) - Welsh
This is the original version (as it was originally made). Dim ond ar ei ffurf wreiddiol y mae’r eitem hon o ddeddfwriaeth ar gael ar hyn o bryd.
Offerynnau Statudol Cymru
Y Gwasanaeth Iechyd Gwladol, Cymru
Gwnaed
7 Rhagfyr 2020
Gosodwyd gerbron Senedd Cymru
9 Rhagfyr 2020
Yn dod i rym
30 Rhagfyr 2020
Mae Gweinidogion Cymru yn gwneud y Gorchymyn a ganlyn drwy arfer y pwerau a roddir gan adran 22(1), (2), 4(a) ac (c) o Ddeddf y Gwasanaeth Iechyd Gwladol (Cymru) 2006(1).
1.—(1) Enw’r Gorchymyn hwn yw Gorchymyn Iechyd a Gofal Digidol Cymru (Sefydlu ac Aelodaeth) 2020.
(2) Daw’r Gorchymyn hwn i rym ar 30 Rhagfyr 2020.
(3) Yn y Gorchymyn hwn—
ystyr “data gwasanaethau iechyd” (“health service data”) yw data a brosesir ar gyfer darparu neu hybu gwasanaethau o dan y Ddeddf neu mewn cysylltiad â darparu neu hybu gwasanaethau o’r fath;
ystyr “y Ddeddf” (“the Act”) yw Deddf y Gwasanaeth Iechyd Gwladol (Cymru) 2006;
ystyr “fferyllydd cofrestredig” (“registered pharmacist”) yw person sydd wedi ei gofrestru’n fferyllydd yn Rhan 1 neu 4 o’r gofrestr a gynhelir o dan erthygl 19 o Orchymyn Fferylliaeth 2010(2);
ystyr “IGDC” (“DHCW”) yw Iechyd a Gofal Digidol Cymru;
ystyr “nyrs gofrestredig” (“registered nurse”) yw nyrs, bydwraig neu gydymaith nyrsio sydd wedi ei chofrestru neu ei gofrestru yn y gofrestr a gynhelir o dan erthygl 5 o Orchymyn Nyrsio a Bydwreigiaeth 2001(3) yn rhinwedd cymhwyster sy’n gymhwyster a gymeradwyir at ddibenion cofrestru yn y rhan berthnasol o’r gofrestr;
ystyr “optometrydd” (“optometrist”) yw person sydd wedi ei gofrestru yn y gofrestr optometryddion a gynhelir o dan adran 7 o Ddeddf Optegwyr 1989(4);
ystyr “platfformau, systemau a gwasanaethau digidol” (“digital platforms, systems and services”) yw caledwedd, meddalwedd a threfniadau eraill ar gyfer casglu, storio, prosesu, dadansoddi, defnyddio a lledaenu data gwasanaethau iechyd yn ddigidol;
ystyr “proffesiynolyn gofal iechyd cofrestredig” (“registered healthcare professional”) yw person sydd wedi ei gofrestru ar y gofrestr a gynhelir gan y Cyngor Proffesiynau Iechyd a Gofal yn unol ag erthygl 5 o Orchymyn Proffesiynau Iechyd a Gwaith Cymdeithasol 2001(5);
ystyr “swyddog clinigol” (“clinical officer”) yw swyddog sy’n broffesiynolyn gofal iechyd cofrestredig; ymarferydd meddygol cofrestredig; nyrs gofrestredig; fferyllydd cofrestredig; ymarferydd deintyddol; neu optometrydd;
ystyr “ymarferydd deintyddol” (“dental practitioner”) yw person sydd wedi ei gofrestru o dan Ddeddf Deintyddion 1984(6);
ystyr “ymarferydd meddygol cofrestredig” (“registered medical practitioner”) yw person sydd wedi ei gofrestru’n llawn o fewn yr ystyr a roddir i “fully registered person” yn Neddf Feddygol 1983(7) sy’n dal trwydded i ymarfer o dan y Ddeddf honno.
2. Mae Awdurdod Iechyd Arbennig o’r enw Iechyd a Gofal Digidol Cymru neu Digital Health and Care Wales wedi ei sefydlu.
3. Mae IGDC i arfer unrhyw swyddogaethau a gyfarwyddir gan Weinidogion Cymru(8) mewn cysylltiad â—
(a)darparu, dylunio, rheoli, datblygu a chyflenwi platfformau, systemau a gwasanaethau digidol;
(b)casglu, dadansoddi, defnyddio a lledaenu data gwasanaethau iechyd;
(c)darparu cyngor a chanllawiau i Weinidogion Cymru ynghylch gwella platfformau, systemau a gwasanaethau digidol;
(d)cefnogi cyrff a phersonau a nodir mewn cyfarwyddydau a roddir gan Weinidogion Cymru i IGDC mewn perthynas â materion sy’n berthnasol i blatfformau, systemau a gwasanaethau digidol;
(e)unrhyw fater arall er mwyn sicrhau y darperir neu yr hybir gwasanaethau o dan y Ddeddf.
4.—(1) Aelodaeth IGDC yw—
(a)cadeirydd;
(b)is-gadeirydd;
(c)dim mwy na 5 aelod nad ydynt yn swyddogion IGDC yn ychwanegol at y cadeirydd a’r is-gadeirydd;
(d)dim mwy na 5 aelod sy’n swyddogion IGDC y mae rhaid iddynt gynnwys;
(i)prif swyddog;
(ii)swyddog cyllid;
(iii)swyddog clinigol;
(e)dim mwy na 3 aelod cyswllt nad ydynt yn gymwys i bleidleisio mewn unrhyw drafodion gan IGDC ac nad ydynt wedi eu cynnwys at ddibenion y cyfrifiad ym mharagraff (2).
(2) Ni chaiff nifer yr aelodau sy’n swyddogion IGDC fod yn fwy na nifer yr aelodau nad ydynt yn swyddogion o’r fath.
(3) Mae aelodau IGDC y cyfeirir atynt yn erthygl 4(1)(a),(b) ac (c) i’w hadnabod fel yr aelodau nad ydynt yn swyddogion.
(4) Mae aelodau IGDC y cyfeirir atynt yn erthygl 4(1)(d) i’w hadnabod fel y swyddog-aelodau.
(5) Mae aelodau IGDC y cyfeirir atynt yn erthygl 4(1)(e) i’w hadnabod fel yr aelodau cyswllt.
5. Mae Deddf Cyrff Cyhoeddus (Derbyn i Gyfarfodydd) 1960(9) i fod yn gymwys i IGDC.
Vaughan Gething
Y Gweinidog Iechyd a Gwasanaethau Cymdeithasol, un o Weinidogion Cymru
7 Rhagfyr 2020
(Nid yw’r nodyn hwn yn rhan o’r Gorchymyn)
Mae’r Gorchymyn hwn wedi ei wneud o dan adran 22 o Ddeddf y Gwasanaeth Iechyd Gwladol (Cymru) 2006 (“y Ddeddf”). Mae’n sefydlu Awdurdod Iechyd Arbennig newydd, sef Iechyd a Gofal Digidol Cymru (“IGDC”), ac yn gwneud darpariaeth ynghylch ei swyddogaethau a’i aelodaeth.
Mae erthygl 3 yn nodi natur swyddogaethau IGDC sydd i’w pennu’n fwy penodol mewn cyfarwyddydau a roddir gan Weinidogion Cymru o dan adran 24 o’r Ddeddf. Bydd swyddogaethau IGDC yn ymwneud â darparu platfformau, systemau a gwasanaethau digidol a chefnogi gwella systemau o’r fath ac unrhyw swyddogaethau eraill a gyfarwyddir gan Weinidogion Cymru er mwyn sicrhau y darperir neu yr hybir gwasanaethau o dan y Ddeddf.
Mae erthygl 4 yn nodi aelodaeth IGDC ac mae erthygl 5 yn darparu bod Deddf Cyrff Cyhoeddus (Derbyn i Gyfarfodydd) 1960 yn gymwys i gyfarfodydd IGDC.
Nid yw’r Gorchymyn hwn yn gwneud unrhyw ddarpariaeth sy’n ymwneud â throsglwyddo swyddogion, eiddo neu atebolrwyddau.
Ystyriwyd Cod Ymarfer Gweinidogion Cymru ar gynnal Asesiadau Effaith Rheoleiddiol mewn perthynas â’r Gorchymyn hwn. O ganlyniad, lluniwyd asesiad effaith rheoleiddiol o’r costau a’r manteision sy’n debygol o ddeillio o gydymffurfio â’r Gorchymyn hwn. Gellir cael copi oddi wrth: Yr Adran Iechyd a Gwasanaethau Cymdeithasol, Llywodraeth Cymru, Parc Cathays, Caerdydd, CF10 3NQ.
2006 p. 42. (“Deddf 2006”).
O.S. 2002/254 a ddiwygiwyd gan O.S. 2009/1182.
Gweler adran 24 o Ddeddf 2006.
1960 p. 67; gweler paragraff 1(g) o’r Atodlen i Ddeddf Cyrff Cyhoeddus (Derbyn i Gyfarfodydd) 1960, a fewnosodwyd gan baragraff 91 o Atodlen 1 i Ddeddf Awdurdodau Iechyd 1995 (p. 17).
Latest Available (revised):The latest available updated version of the legislation incorporating changes made by subsequent legislation and applied by our editorial team. Changes we have not yet applied to the text, can be found in the ‘Changes to Legislation’ area. The revised version is currently only available in English.
Original (As Enacted or Made) - English: The original English language version of the legislation as it stood when it was enacted or made. No changes have been applied to the text.
Original (As Enacted or Made) - Welsh:The original Welsh language version of the legislation as it stood when it was enacted or made. No changes have been applied to the text.
Access essential accompanying documents and information for this legislation item from this tab. Dependent on the legislation item being viewed this may include:
Use this menu to access essential accompanying documents and information for this legislation item. Dependent on the legislation item being viewed this may include:
Click 'View More' or select 'More Resources' tab for additional information including: