Deddf Addysg Drydyddol ac Ymchwil (Cymru) 2022

Rhagolygol

(a gyflwynir gan adran 56)

ATODLEN 3 LL+C ASESU ADDYSG UWCH: CORFF DYNODEDIG

RHAN 1 LL+C DYNODIAD

Dynodiad LL+C

1 (1) Caiff y Comisiwn ddynodi corff i arfer ei swyddogaethau asesu.

(2) Ni chaiff y Comisiwn ddynodi corff o dan is-baragraff (1) ond os yw’n ystyried—

(a) bod y corff yn addas i arfer y swyddogaethau asesu, a

(b) y byddai dynodi’r corff yn briodol er mwyn sicrhau bod ansawdd addysg uwch a ddarperir gan ddarparwyr addysg drydyddol yng Nghymru yn cael ei asesu’n effeithiol.

(3) Cyn dynodi corff, rhaid i’r Comisiwn—

(a) cael cydsyniad Gweinidogion Cymru, a

(b) ymgynghori—

(i) â phob darparwr cofrestredig sy’n darparu addysg uwch, a

(ii) ag unrhyw bersonau eraill y mae’n ystyried eu bod yn briodol.

(4) Os yw’r Comisiwn yn penderfynu dynodi corff o dan is-baragraff (1), rhaid iddo—

(a) hysbysu’r corff am y dynodiad cyn y dyddiad y mae’r dynodiad yn cymryd effaith (“y dyddiad effeithiol”), a

(b) cyhoeddi hysbysiad o’r dynodiad cyn y dyddiad hwnnw.

(5) Rhaid i’r hysbysiad o’r dynodiad ddatgan—

(a) enw’r corff, a

(b) y dyddiad effeithiol.

(6) Os nad yw Gweinidogion Cymru yn rhoi eu cydsyniad o dan is-baragraff (3)(a), rhaid iddynt gyhoeddi’r rhesymau dros beidio â gwneud hynny.

Gwybodaeth Cychwyn

I1 Atod. 3 para. 1 ddim mewn grym ar y Cydsyniad Brenhinol, gweler a. 148(2)

Cyrff sy’n addas i arfer swyddogaethau asesu LL+C

2 (1) Mae corff yn addas i arfer y swyddogaethau asesu os yw’r corff yn bodloni’r amodau yn is-baragraff (2).

(2) Yr amodau yw—

(a) bod y corff yn gallu arfer y swyddogaethau asesu mewn modd effeithiol,

(b) bod y personau sy’n penderfynu blaenoriaethau strategol y corff yn cynrychioli ystod eang o ddarparwyr cofrestredig sy’n darparu addysg uwch,

(c) bod gan ddarparwyr cofrestredig sy’n darparu addysg uwch ffydd yn y corff,

(d) bod y corff yn arfer ei swyddogaethau yn annibynnol ar unrhyw ddarparwr addysg uwch penodol, ac

(e) bod y corff yn cydsynio i gael ei ddynodi o dan yr Atodlen hon.

Gwybodaeth Cychwyn

I2 Atod. 3 para. 2 ddim mewn grym ar y Cydsyniad Brenhinol, gweler a. 148(2)

Dileu dynodiad LL+C

3 (1) Caiff y Comisiwn drwy hysbysiad ddileu dynodiad o dan yr Atodlen hon.

(2) Rhaid i’r hysbysiad—

(a) cynnwys y rhesymau dros benderfyniad y Comisiwn, a

(b) pennu’r dyddiad y caiff y dynodiad ei ddileu.

(3) Ni chaiff y Comisiwn ddileu dynodiad ond—

(a) os yw’r Comisiwn wedi ei fodloni y byddai dileu’r dynodiad yn briodol er mwyn sicrhau bod ansawdd addysg uwch a ddarperir gan ddarparwyr addysg drydyddol yng Nghymru yn cael ei asesu’n effeithiol, neu

(b) os yw’r corff dynodedig yn cydsynio i’r dynodiad gael ei ddileu.

(4) Oni bai bod is-baragraff (3)(b) yn gymwys, rhaid i’r Comisiwn, cyn dileu’r dynodiad—

(a) cael cydsyniad Gweinidogion Cymru, a

(b) ymgynghori—

(i) â phob darparwr cofrestredig sy’n darparu addysg uwch, ac

(ii) ag unrhyw bersonau eraill y mae’n ystyried eu bod yn briodol.

(5) Rhaid i’r Comisiwn gyhoeddi hysbysiad o dan y paragraff hwn.

(6) Os nad yw Gweinidogion Cymru yn rhoi eu cydsyniad o dan is-baragraff (4)(a), rhaid iddynt gyhoeddi’r rhesymau dros beidio â gwneud hynny.

Gwybodaeth Cychwyn

I3 Atod. 3 para. 3 ddim mewn grym ar y Cydsyniad Brenhinol, gweler a. 148(2)

RHAN 2 LL+C GORUCHWYLIAETH GAN Y COMISIWN

Cymhwyso LL+C

4 Mae’r Rhan hon yn gymwys os oes corff a ddynodir o dan yr Atodlen hon i arfer y swyddogaethau asesu.

Gwybodaeth Cychwyn

I4 Atod. 3 para. 4 ddim mewn grym ar y Cydsyniad Brenhinol, gweler a. 148(2)

Pŵer i ddarparu cyllid LL+C

5 Caiff y Comisiwn ddarparu cyllid i’r corff dynodedig er mwyn arfer y swyddogaethau asesu.

Gwybodaeth Cychwyn

I5 Atod. 3 para. 5 ddim mewn grym ar y Cydsyniad Brenhinol, gweler a. 148(2)

Trefniadau goruchwylio LL+C

6 Rhaid i’r Comisiwn wneud trefniadau er mwyn dwyn y corff dynodedig i gyfrif am arfer y swyddogaethau asesu.

Gwybodaeth Cychwyn

I6 Atod. 3 para. 6 ddim mewn grym ar y Cydsyniad Brenhinol, gweler a. 148(2)

Adroddiad blynyddol gan y corff dynodedig LL+C

7 (1) Cyn gynted ag y bo’n rhesymol ymarferol ar ôl diwedd pob cyfnod adrodd blynyddol, rhaid i’r corff dynodedig lunio adroddiad am arfer y swyddogaethau asesu yn ystod y cyfnod a’i anfon i’r Comisiwn.

(2) Ystyr “cyfnod adrodd blynyddol”, mewn perthynas â chorff dynodedig, yw—

(a) y cyfnod o 12 mis sy’n dechrau â’r dyddiad effeithiol, a

(b) pob cyfnod dilynol o 12 mis.

Gwybodaeth Cychwyn

I7 Atod. 3 para. 7 ddim mewn grym ar y Cydsyniad Brenhinol, gweler a. 148(2)

Pŵer y Comisiwn i roi cyfarwyddydau LL+C

8 (1) Caiff y Comisiwn roi cyfarwyddydau cyffredinol i’r corff dynodedig ynghylch arfer y swyddogaethau asesu.

(2) Wrth roi’r cyfarwyddydau hynny, rhaid i’r Comisiwn roi sylw i’r angen i ddiogelu—

(a) arbenigedd y corff dynodedig, a

(b) gallu’r corff dynodedig i wneud, neu i wneud trefniadau ar gyfer gwneud, asesiad diduedd o ansawdd yr addysg uwch a ddarperir gan ddarparwr addysg drydyddol.

(3) Rhaid i’r cyfarwyddydau ymwneud—

(a) â darparwyr addysg drydyddol yng Nghymru sy’n darparu addysg uwch neu ddarparwyr cofrestredig sy’n darparu addysg uwch yn gyffredinol, neu

(b) â disgrifiad o’r darparwyr hynny.

(4) Rhaid i’r corff dynodedig gydymffurfio ag unrhyw gyfarwyddydau a roddir o dan y paragraff hwn.

Gwybodaeth Cychwyn

I8 Atod. 3 para. 8 ddim mewn grym ar y Cydsyniad Brenhinol, gweler a. 148(2)

Dyletswydd y Comisiwn i roi gwybod i Weinidogion Cymru am bryderon sylweddol LL+C

9 Rhaid i’r Comisiwn roi gwybod i Weinidogion Cymru os oes ganddo bryderon sylweddol ynghylch—

(a) sut y mae’r corff dynodedig yn arfer y swyddogaethau asesu, neu

(b) addasrwydd parhaus y corff dynodedig i arfer y swyddogaethau hynny.

Gwybodaeth Cychwyn

I9 Atod. 3 para. 9 ddim mewn grym ar y Cydsyniad Brenhinol, gweler a. 148(2)

RHAN 3 LL+C PŴER I GODI FFIOEDD

10 (1) Caiff y corff dynodedig godi ffi, neu ffioedd, ar unrhyw ddarparwr addysg drydyddol y mae’r corff yn arfer y swyddogaethau asesu mewn perthynas ag ef. LL+C

(2) Rhaid i unrhyw ffioedd a godir gan y corff dynodedig o dan is-baragraff (1) gael eu codi yn unol â chynllun a lunnir ac a gyhoeddir gan y corff dynodedig sy’n nodi—

(a) y ffioedd a godir gan y corff o dan is-baragraff (1), a

(b) y sail y cyfrifir y ffioedd hynny arni.

(3) Caniateir i swm y ffi sy’n daladwy gan unrhyw ddarparwr addysg drydyddol o dan is-baragraff (1) gael ei gyfrifo drwy gyfeirio at gostau yr aed iddynt, neu yr eir iddynt, gan y corff wrth arfer unrhyw un neu ragor o’i swyddogaethau o dan y Ddeddf hon—

(a) nad ydynt yn gysylltiedig â’r darparwr;

(b) sy’n cael eu harfer, neu sydd i’w harfer, dros gyfnod a bennir yn y cynllun.

(4) Ond ni chaiff cyfanswm y ffioedd sy’n daladwy o dan y cynllun mewn unrhyw gyfnod fod yn fwy na’r gost i’r corff dynodedig o arfer ei swyddogaethau o dan y Ddeddf hon yn ystod yr un cyfnod.

(5) At ddibenion is-baragraff (4), y gost i’r corff dynodedig o arfer ei swyddogaethau o dan y Ddeddf hon yw swm y costau yr aed iddo, neu yr eir iddo, gan y corff dynodedig wrth arfer unrhyw un neu ragor o’i swyddogaethau o dan y Ddeddf hon mewn unrhyw gyfnod penodol, llai unrhyw gyllid a geir gan y corff o dan baragraff 5 o’r Atodlen hon yn yr un cyfnod.

(6) Caiff y corff dynodedig ddiwygio’r cynllun.

(7) Mae’r cynllun (ac unrhyw gynllun diwygiedig) i’w drin fel pe na bai ond yn cael effaith os yw wedi ei gymeradwyo gan y Comisiwn.

Gwybodaeth Cychwyn

I10 Atod. 3 para. 10 ddim mewn grym ar y Cydsyniad Brenhinol, gweler a. 148(2)

RHAN 4 LL+C DEHONGLI

11 (1) Yn yr Atodlen hon— LL+C

• ystyr “corff dynodedig” (“designated body”) yw corff sydd am y tro wedi ei ddynodi o dan yr Atodlen hon;

• mae i “y dyddiad effeithiol” (“the effective date”), mewn perthynas â chorff dynodedig, yr ystyr a roddir ym mharagraff 1;

• mae i “y swyddogaethau asesu” (“the assessment functions”) yr ystyr a roddir yn adran 56(2).

(2) Mae cyfeiriadau yn yr Atodlen hon at gorff sy’n addas i arfer y swyddogaethau asesu i’w darllen yn unol â pharagraff 2.

Gwybodaeth Cychwyn

I11 Atod. 3 para. 11 ddim mewn grym ar y Cydsyniad Brenhinol, gweler a. 148(2)