Deddf yr Amgylchedd Hanesyddol (Cymru) 2023 (dsc3)

RHAN 2 LL+C HENEBION O DDIDDORDEB HANESYDDOL ARBENNIG

Rhagolygol

PENNOD 6 LL+C CAFFAEL, GWARCHEIDIAETH A MYNEDIAD Y CYHOEDD

Gwarcheidiaeth henebion o ddiddordeb hanesyddol arbennig LL+C

47 Swyddogaethau cyffredinol gwarcheidwaid LL+C

(1) Rhaid i warcheidwad heneb ei chynnal a’i chadw, a chaiff wneud unrhyw beth y mae’r gwarcheidwad yn ystyried ei fod yn angenrheidiol ar gyfer ei chynnal a’i chadw.

(2) Gwarcheidwad yr heneb sy’n ei rheolaethu ac yn ei rheoli’n llawn, a chaiff wneud unrhyw beth y mae’r gwarcheidwad yn ystyried ei fod yn angenrheidiol ar gyfer ei rheolaethu a’i rheoli’n briodol.

(3) Mae’r pwerau yn is-adrannau (1) a (2) yn cynnwys pŵer i—

(a) gwneud unrhyw archwiliad o’r heneb;

(b) agor yr heneb neu wneud cloddiadau ohoni at ddiben archwilio neu fel arall;

(c) symud y cyfan neu unrhyw ran o’r heneb ymaith i fan arall at ddibenion ei diogelu.

(4) Mae’r pŵer yn is-adran (2) yn cynnwys pŵer i’w gwneud yn ofynnol talu tâl mewn cysylltiad ag unrhyw ddefnydd o’r heneb.

(5) Caiff gwarcheidwad heneb fynd i safle’r heneb at ddiben arfer unrhyw un neu ragor o bwerau’r gwarcheidwad o dan yr adran hon mewn perthynas â hi (a chaiff awdurdodi unrhyw berson arall i fynd i’r safle ac arfer y pwerau hynny ar ei ran).

(6) Mae is-adrannau (2) i (4) yn ddarostyngedig i unrhyw ddarpariaeth i’r gwrthwyneb yn y weithred warcheidiaeth.

Gwybodaeth Cychwyn

I1 A. 47 ddim mewn grym ar y Cydsyniad Brenhinol, gweler a. 212(2)