48Hysbysiadau o gosb: darpariaethau atodolLL+C
(1)Caiff Gweinidogion Cymru drwy reoliadau wneud darpariaeth am unrhyw un neu unrhyw rai o'r canlynol—
(a)ffurf a chynnwys yr hysbysiadau o gosb;
(b)swm ariannol y gosb ac erbyn pa bryd y mae i'w thalu;
(c)penderfynu'r dulliau y gellir talu cosbau drwyddynt;
(d)y cofnodion sydd i'w cadw o ran hysbysiadau o gosb;
(e)tynnu hysbysiad o gosb yn ôl, mewn amgylchiadau a ragnodwyd, gan gynnwys—
(i)ad-dalu unrhyw swm a dalwyd am gosb o dan hysbysiad o gosb a dynnir yn ôl, a
(ii)gwahardd codi achos cyfreithiol neu barhau ag ef am y tramgwydd y mae'r hysbysiad a dynnir yn ôl yn ymwneud ag ef;
(f)tystysgrifau sydd i'w derbyn yn dystiolaeth—
(i)sy'n honni eu bod wedi'u llofnodi gan neu ar ran person a ragnodwyd, a
(ii)sy'n datgan bod taliad o unrhyw swm a dalwyd am gosb wedi dod i law neu, yn ôl y digwydd, heb ddod i law ar ddyddiad a bennir yn y dystysgrif neu cyn y dyddiad hwnnw;
(g)camau sydd i'w cymryd os na thelir cosb yn unol â hysbysiad o gosb;
(h)unrhyw beth arall o ran cosbau neu hysbysiadau o gosb y mae Gweinidogion Cymru o'r farn eu bod yn angenrheidiol neu'n hwylus.
(2)O ran rheoliadau o dan is-adran (1)(b)—
(a)cânt ddarparu ar gyfer cosbau o symiau gwahanol i fod yn daladwy mewn achosion gwahanol, gan gynnwys darpariaeth ar gyfer y gosb sy'n daladwy o dan hysbysiad o gosb i wahaniaethu yn unol â'r amser erbyn pryd y telir hi, ond
(b)rhaid iddynt sicrhau nad yw swm unrhyw gosb sy'n daladwy o ran unrhyw dramgwydd yn fwy nag un hanner mwyafswm y ddirwy y byddai person sy'n cyflawni tramgwydd yn atebol amdani ar gollfarn ddiannod.
(3)Yn yr adran hon—
ystyr “cosb” yw cosb o dan hysbysiad o gosb;
mae i “hysbysiad o gosb” yr ystyr a roddir gan adran 47.