Gorchymyn Bwrdeistref Sirol Wrecsam (Trefniadau Etholiadol) 2021

Enwi a chychwyn

1.—( 1) Enw’r Gorchymyn hwn yw Gorchymyn Bwrdeistref Sirol Wrecsam (Trefniadau Etholiadol) 2021.

(2) At unrhyw ddiben a nodir yn rheoliad 4(1) o’r Rheoliadau, daw’r Gorchymyn hwn i rym drennydd y diwrnod y’i gwneir.

(3) At bob diben arall, daw’r Gorchymyn hwn i rym ar y diwrnod arferol ar gyfer ethol cynghorwyr yn 2022(1).

Dehongli

2.   Yn y Gorchymyn hwn—

ystyr “y Rheoliadau” (“the Regulations”) yw Rheoliadau Newidiadau i Ardaloedd Llywodraeth Leol 1976(2);

ystyr “ward etholiadol” (“electoral ward”) yw unrhyw ardal yr etholir aelodau drosti i Gyngor Bwrdeistref Sirol Wrecsam;

mae unrhyw gyfeiriad at fap yn golygu un o’r 12 o fapiau a farciwyd “Map ar gyfer Gorchymyn Bwrdeistref Sirol Wrecsam (Trefniadau Etholiadol) 2021” a adneuwyd yn unol â rheoliad 5 o’r Rheoliadau ac a labelwyd “1” i “12”, ac mae cyfeiriad at fap â rhif yn gyfeiriad at y map sy’n dwyn y rhif hwnnw;

os dangosir ar fap bod ffin yn rhedeg ar hyd ffordd, rheilffordd, troetffordd, cwrs dŵr neu nodwedd ddaearyddol debyg, mae i’w thrin fel un sy’n rhedeg ar hyd llinell ganol y nodwedd;

mae i eiriau ac ymadroddion a ddefnyddir yn y Gorchymyn hwn yr un ystyr ag a roddir iddynt yn Rhan 3 o Ddeddf Llywodraeth Leol (Democratiaeth) (Cymru) 2013, ac eithrio i’r graddau yr ymddengys bwriad i’r gwrthwyneb.

Trefniadau etholiadol ar gyfer Bwrdeistref Sirol Wrecsam

3.—( 1) Mae wardiau etholiadol Bwrdeistref Sirol Wrecsam, fel y maent yn bodoli yn union cyn y diwrnod arferol ar gyfer ethol cynghorwyr yn 2022, wedi eu diddymu.

(2) Mae Bwrdeistref Sirol Wrecsam wedi ei rhannu’n 49 o wardiau etholiadol a phob un ohonynt yn dwyn yr enw Saesneg a restrir yng ngholofn 1 a’r enw Cymraeg a restrir yng ngholofn 2 o’r Tabl yn yr Atodlen i’r Gorchymyn hwn.

(3) Mae pob ward etholiadol yn cynnwys yr ardaloedd a bennir mewn perthynas â’r ward etholiadol honno yng ngholofn 3 o’r Tabl yn yr Atodlen i’r Gorchymyn hwn.

(4) Nifer aelodau’r cyngor sydd i’w hethol dros bob ward etholiadol yw’r nifer a bennir yng ngholofn 4 y Tabl yn yr Atodlen i’r Gorchymyn hwn.

(5) Mae’r darpariaethau yn y Gorchymyn hwn yn cymryd blaenoriaeth dros unrhyw ddarpariaeth wrthdrawiadol mewn unrhyw offeryn statudol blaenorol a wnaed o dan adran 58(2) o Ddeddf Llywodraeth Leol 1972(3).

Cymuned Cefn: newidiadau i wardiau cymunedol

4.   Yng nghymuned Cefn—

(a) mae’r rhan o ward Acre-fair a Phen-y-bryn a ddangosir â llinellau ar Fap 1 wedi ei throsglwyddo i ward Plas Madog;

(b) mae’r rhan o ward Cefn a ddangosir â llinellau ar Fap 2 wedi ei throsglwyddo i ward Acre-fair a Phen-y-bryn;

(c) mae’r rhan o ward Rhosymedre a Chefn Bychan a ddangosir â chroeslinellau ar Fap 2 wedi ei throsglwyddo i ward Acre-fair a Phen-y-bryn.

Cymuned Cefn: newidiadau canlyniadol i drefniadau etholiadol

5.   Yng nghymuned Cefn—

(a) nifer yr aelodau sydd i’w hethol dros ward Acre-fair a Phen-y-bryn yw 5;

(b) nifer yr aelodau sydd i’w hethol dros ward Cefn yw 5;

(c) nifer yr aelodau sydd i’w hethol dros ward Rhosymedre a Chefn Bychan yw 1.

Cymuned Rhosllannerchrugog: newidiadau i wardiau cymunedol

6.   Yng nghymuned Rhosllannerchrugog—

(a) mae’r rhan o ward Gogledd Ponciau a ddangosir â llinellau ar Fap 3 wedi ei throsglwyddo i ward Rhos;

(b) mae’r rhan o ward De Ponciau a ddangosir â chroeslinellau ar Fap 3 wedi ei throsglwyddo i ward Rhos.

Cymuned Rhosllannerchrugog: newidiadau canlyniadol i drefniadau etholiadol

7.   Yng nghymuned Rhosllannerchrugog—

(a) nifer yr aelodau sydd i’w hethol dros ward Johnstown yw 6;

(b) nifer yr aelodau sydd i’w hethol dros ward De Ponciau yw 2;

(c) nifer yr aelodau sydd i’w hethol dros ward Rhos yw 4.

Cymuned Broughton: newidiadau i wardiau cymunedol

8.   Yng nghymuned Broughton—

(a) mae’r rhan o ward Bryn-teg a ddangosir â llinellau ar Fap 4 wedi ei throsglwyddo i ward Bryn Cefn;

(b) mae’r rhan o ward Bryn-teg a ddangosir â llinellau ar Fap 5 wedi ei throsglwyddo i ward Gwenfro;

(c) mae’r rhan o ward New Broughton a ddangosir â chroeslinellau ar Fap 5 wedi ei throsglwyddo i ward Gwenfro.

Cymuned Broughton: newidiadau canlyniadol i drefniadau etholiadol

9.   Yng nghymuned Broughton—

(a) nifer yr aelodau sydd i’w hethol dros ward Bryn Cefn yw 5;

(b) nifer yr aelodau sydd i’w hethol dros ward Bryn-teg yw 2;

(c) nifer yr aelodau sydd i’w hethol dros ward Gwenfro yw 5.

Cymuned Gwersyllt: newidiadau i wardiau cymunedol

10.   Mae’r rhan o ward De Gwersyllt o gymuned Gwersyllt a ddangosir â llinellau ar Fap 6 wedi ei throsglwyddo i ward Dwyrain Gwersyllt o gymuned Gwersyllt.

Cymuned Gwersyllt: newidiadau canlyniadol i drefniadau etholiadol

11.   Yng nghymuned Gwersyllt—

(a) nifer yr aelodau sydd i’w hethol dros ward Dwyrain Gwersyllt yw 4;

(b) nifer yr aelodau sydd i’w hethol dros ward De Gwersyllt yw 4;

(c) nifer yr aelodau sydd i’w hethol dros ward Gorllewin Gwersyllt yw 5.

Cymuned Parc Caia: newidiadau i wardiau cymunedol

12.   Yng nghymuned Parc Caia—

(a) mae’r rhan o ward Whitegate a ddangosir â llinellau ar Fap 7 wedi ei throsglwyddo i ward Smithfield;

(b) mae’r rhan o ward Smithfield a ddangosir â llinellau ar Fap 8 wedi ei throsglwyddo i ward Wynnstay.

Cymunedau Abenbury a Pharc Caia: newidiadau i ffiniau cymunedol

13.   Mae’r rhan honno o gymuned Abenbury a ddangosir â llinellau ar Fap 9 wedi ei throsglwyddo i gymuned Parc Caia, ac mae’n ffurfio rhan o ward Whitegate o gymuned Parc Caia.

Cymuned Parc Caia: newidiadau canlyniadol i drefniadau etholiadol

14.   Nifer yr aelodau sydd i’w hethol dros ward Wynnstay o gymuned Parc Caia yw 3.

Cymuned Offa: newidiadau i wardiau cymunedol

15.   Yng nghymuned Offa—

(a) mae’r rhannau o ward Offa a ddangosir â llinellau ar Fap 10 wedi eu trosglwyddo i ward Erddig;

(b) mae’r rhan o ward Brynyffynnon a ddangosir â llinellau ar Fap 11 wedi ei throsglwyddo i ward Offa;

(c) mae’r rhan o ward Offa a ddangosir â llinellau ar Fap 12 wedi ei throsglwyddo i ward Brynyffynnon.

Cymuned Offa: newidiadau canlyniadol i drefniadau etholiadol

16.   Yng nghymuned Offa—

(a) nifer yr aelodau sydd i’w hethol dros ward Hermitage yw 4;

(b) nifer yr aelodau sydd i’w hethol dros ward Offa yw 5.

Rebecca Evans

Y Gweinidog Cyllid a Llywodraeth Leol, un o Weinidogion Cymru

4 Hydref 2021