Offerynnau Statudol Cymru
Treth Trafodiadau Tir, Cymru
Cymeradwywyd gan Senedd Cymru
Gwnaed
6 Hydref 2022
Gosodwyd gerbron Senedd Cymru
10 Hydref 2022
Yn dod i rym
10th Hydref 2022
Mae Gweinidogion Cymru yn gwneud y Rheoliadau a ganlyn drwy arfer y pwerau a roddir iddynt gan adrannau 24(1) a 78(1) o Ddeddf Treth Trafodiadau Tir a Gwrthweithio Osgoi Trethi Datganoledig (Cymru) 2017(1).
1. Enw’r Rheoliadau hyn yw Rheoliadau Treth Trafodiadau Tir (Bandiau Treth a Chyfraddau Treth) (Cymru) (Diwygio) 2022 a deuant i rym ar 10 Hydref 2022.
2. Yn y Rheoliadau hyn—
(a)ystyr “Rheoliadau 2018” (“the 2018 Regulations”) yw Rheoliadau Treth Trafodiadau Tir (Bandiau Treth a Chyfraddau Treth) (Cymru) 2018(2);
(b)mae i eiriau ac ymadroddion a ddefnyddir yn y Rheoliadau hyn yr un ystyr ag sydd iddynt yn Neddf Treth Trafodiadau Tir a Gwrthweithio Osgoi Trethi Datganoledig (Cymru) 2017.
3. Yn ddarostyngedig i reoliad 4, mae’r Rheoliadau hyn yn cael effaith mewn perthynas â thrafodiadau eiddo preswyl—
(a)sydd â dyddiad cael effaith ar neu ar ôl 10 Hydref 2022; a
(b)y mae Tabl 1 o’r Atodlen i Reoliadau 2018 yn gymwys iddynt.
4. Nid yw’r Rheoliadau hyn yn cael effaith mewn perthynas ag unrhyw drafodiad a bennir yn rheoliad 3—
(a)os yw’r prynwr yn gwneud dewis yn unol â rheoliad 6; a
(b)naill ai:
(i)y rhoddir effaith i’r trafodiad yn unol â chontract yr ymrwymwyd iddo ac a gyflawnwyd yn sylweddol cyn 10 Hydref 2022; neu
(ii)y rhoddir effaith i’r trafodiad yn unol â chontract yr ymrwymwyd iddo ond nas cyflawnwyd yn sylweddol cyn 10 Hydref 2022 ac nad yw wedi ei eithrio gan reoliad 5.
5. Mae trafodiad wedi ei eithrio gan y rheoliad hwn os yw’n drafodiad a bennir yn rheoliad 3 y rhoddir effaith iddo yn unol â chontract yr ymrwymwyd iddo cyn 10 Hydref 2022 ac—
(a)pan geir unrhyw amrywiad i’r contract, neu pan aseinir hawliau o dan y contract, ar neu ar ôl 10 Hydref 2022;
(b)pan roddir effaith i’r trafodiad o ganlyniad i arfer unrhyw opsiwn, hawl rhagbrynu neu hawl debyg ar neu ar ôl 10 Hydref 2022; neu
(c)pan geir, ar neu ar ôl 10 Hydref 2022, aseiniad, is-werthiant neu drafodiad arall yn ymwneud â’r cyfan neu ran o bwnc y contract, y caiff person heblaw’r prynwr o dan y contract hawl i alw am drosglwyddiad o ganlyniad iddo.
6.—(1) Rhaid i ddewis o dan reoliad 4—
(a)cael ei gynnwys mewn ffurflen dreth a gyflwynir i ACC mewn cysylltiad â’r trafodiad, neu mewn diwygiad i’r ffurflen honno; a
(b)cydymffurfio ag unrhyw ofynion a bennir gan ACC ynghylch ei ffurf neu’r modd y caiff ei gynnwys.
(2) Ni chaiff prynwr ond gwneud dewis o dan reoliad 4 pan nad yw effaith dewis o’r fath yn arwain at godi mwy o dreth na fyddai wedi digwydd fel arall.
7.—(1) Mae’r Atodlen i Reoliadau 2018 wedi ei diwygio fel a ganlyn—
(2) Yn lle Tabl 1 rhodder—
| Band treth | Y gydnabyddiaeth berthnasol | Y gyfradd dreth ganrannol |
|---|---|---|
| Band cyfradd sero | Nid mwy na £225,000 | 0% |
| Y band treth cyntaf | Mwy na £225,000 ond nid mwy na £400,000 | 6% |
| Yr ail fand treth | Mwy na £400,000 ond nid mwy na £750,000 | 7.5% |
| Y trydydd band treth | Mwy na £750,000 ond nid mwy na £1,500,000 | 10% |
| Y pedwerydd band treth | Mwy na £1,500,000 | 12%” |
Rebecca Evans
Y Gweinidog Cyllid a Llywodraeth Leol, un o Weinidogion Cymru
6 Hydref 2022
(Nid yw’r nodyn hwn yn rhan o’r Rheoliadau)
Mae’r Rheoliadau hyn yn diwygio Rheoliadau Treth Trafodiadau Tir (Bandiau Treth a Chyfraddau Treth) (Cymru) 2018 (O.S. 2018/128) (“Rheoliadau 2018”) er mwyn mewnosod bandiau treth a chyfraddau treth canrannol diwygiedig ar gyfer trafodiadau eiddo preswyl.
Mae rheoliad 3 yn cymhwyso’r bandiau treth a’r cyfraddau treth canrannol diwygiedig at drafodiadau eiddo preswyl pan fo’r dyddiad y mae’r trafodiad yn cael effaith ar neu ar ôl 10 Hydref 2022.
Mae rheoliad 4 yn mynd ymlaen i nodi eithriadau i gymhwysiad cyffredinol y bandiau treth a’r cyfraddau treth canrannol diwygiedig mewn cysylltiad â thrafodiadau eiddo preswyl. Pan fo’r dyddiad y mae’r trafodiadau hyn yn cael effaith ar neu ar ôl 10 Hydref 2022, ond cafodd contractau eu cyfnewid, neu cafodd y contract hwnnw ei gyflawni’n sylweddol cyn 10 Hydref 2022, caiff y prynwr ddewis cymhwyso’r bandiau treth a’r cyfraddau treth canrannol a oedd ar waith cyn i’r Rheoliadau hyn ddod i rym at y trafodiad hwnnw. Ni ellir gwneud dewis o’r fath mewn amgylchiadau a nodir yn rheoliad 5. Rhaid gwneud y dewis yn unol â gofynion rheoliad 6, sydd hefyd yn darparu na ellir ond gwneud dewis o’r fath os na fyddai hynny’n arwain at godi mwy o dreth na fyddai wedi digwydd fel arall.
Mae rheoliad 7 yn nodi’r bandiau treth a’r cyfraddau treth canrannol diwygiedig a fydd yn gymwys i’r trafodiadau a bennir yn rheoliad 3.
Ystyriwyd Cod Ymarfer Gweinidogion Cymru ar gynnal Asesiadau Effaith Rheoleiddiol mewn perthynas â’r Rheoliadau hyn. O ganlyniad, lluniwyd Asesiad Effaith Rheoleiddiol o’r costau a’r manteision sy’n debygol o ddeillio o gydymffurfio â’r Rheoliadau hyn. Gellir cael copi oddi wrth: Llywodraeth Cymru, Parc Cathays, Caerdydd CF10 3NQ ac ar wefan Llywodraeth Cymru yn www.llyw.cymru .
O.S. 2018/128 (Cy. 32), fel y’i diwygiwyd gan O.S. 2020/794 (Cy. 174) ac O.S. 2020/1618 (Cy. 339).