Rheoliadau’r Gwasanaeth Iechyd Gwladol (Contractau Gwasanaethau Meddygol Cyffredinol) (Cymru) 2023

Gwybodaeth sydd i’w chynnwys ar adnodd ar-lein y practis ac ar daflen ysgrifenedig y practis

1.   Rhaid i adnodd ar-lein contractwr a thaflen ysgrifenedig y practis gynnwys—

(a) enw’r contractwr;

(b) yn achos contract gyda phartneriaeth—

(i) pa un a yw’n bartneriaeth gyfyngedig ai peidio, a

(ii) enwau’r holl bartneriaid ac, yn achos partneriaeth gyfyngedig, eu statws fel partner cyffredinol neu bartner cyfyngedig;

(c) yn achos contract gyda chwmni—

(i) enwau’r cyfarwyddwyr, ysgrifennydd y cwmni, a chyfranddalwyr y cwmni hwnnw, a

(ii) cyfeiriad swyddfa gofrestredig y cwmni;

(d) enw llawn pob person sy’n cyflawni gwasanaethau o dan y contract;

(e) yn achos pob proffesiynolyn gofal iechyd sy’n cyflawni gwasanaethau o dan y contract, cymwysterau proffesiynol y proffesiynolyn gofal iechyd;

(f) pa un a yw’r contractwr yn ymgymryd ag addysgu neu hyfforddi proffesiynolion gofal iechyd neu bersonau sy’n bwriadu dod yn broffesiynolion gofal iechyd;

(g) ardal practis y contractwr, drwy gyfeirio at fraslun, plan neu god post;

(h) cyfeiriad pob un o’r mangreoedd practis.;

(i) rhifau ffôn a ffacs y contractwr a chyfeiriad ei adnodd ar-lein;

(j) pa un a yw’r mynediad i’r mangreoedd practis yn addas ar gyfer cleifion anabl ac, os nad yw, y trefniadau amgen ar gyfer darparu gwasanaethau i gleifion o’r fath;

(k) sut i gofrestru fel claf;

(l) hawl cleifion i fynegi hoff ddewis am ymarferydd yn unol â pharagraff 27 o Atodlen 3 a’r dull o fynegi hoff ddewis o’r fath;

(m) y gwasanaethau sydd ar gael o dan y contract;

(n) oriau agor mangreoedd practis a’r dull o gael mynediad at wasanaethau drwy gydol yr oriau craidd;

(o) y meini prawf ar gyfer ymweliadau cartref a’r dull o gael ymweliad o’r fath;

(p) yr ymgyngoriadau sydd ar gael i gleifion o dan reoliad 17 a Rhan 1 o Atodlen 3;

(q) y trefniadau ar gyfer gwasanaethau yn ystod y cyfnod y tu allan i oriau (pa un a yw’r contractwr yn eu darparu ai peidio) a sut y gall y claf gysylltu â gwasanaethau o’r fath;

(r) os nad yw’r gwasanaethau yn is-baragraff (q) yn cael eu darparu gan y contractwr, y ffaith bod y Bwrdd Iechyd Lleol y cyfeirir ato ym mharagraff (bb) yn gyfrifol am gomisiynu’r gwasanaethau;

(s) enw a chyfeiriad unrhyw ganolfan galw i mewn leol;

(t) rhif ffôn GIG 111 Cymru a manylion GIG 111 Cymru ar-lein;

(u) y dull y mae cleifion i’w ddilyn i gael presgripsiynau amlroddadwy;

(v) os yw’r contractwr yn cynnig gwasanaethau amlragnodi, y trefniadau ar gyfer darparu gwasanaethau o’r fath;

(w) os yw’r contractwr yn gontractwr gweinyddu, y trefniadau ar gyfer gweinyddu presgripsiynau yn ddarostyngedig i baragraff 60(2)(b);

(x) sut y gall cleifion nodi pryder neu wneud cwyn yn unol â’r darpariaethau yn Rheoliadau’r Gwasanaeth Iechyd Gwladol (Trefniadau Pryderon, Cwynion ac Iawn) (Cymru) 2011, neu wneud sylwadau ar ddarpariaeth gwasanaethau’r contractwr;

(y) hawliau a chyfrifoldebau’r claf, gan gynnwys cadw apwyntiadau;

(z) y camau y caniateir eu cymryd pan fo claf yn ymddwyn yn dreisgar neu’n gamdriniol tuag at y contractwr neu ei staff neu bersonau eraill yn y fangre practis neu yn y man lle y darperir triniaeth o dan y contract neu bersonau eraill a bennir ym mharagraff 30 o Atodlen 3;

(aa) manylion pwy sydd â mynediad at wybodaeth am gleifion (gan gynnwys gwybodaeth y gellir canfod pwy yw’r unigolyn ohoni), hawliau’r claf mewn perthynas â datgelu gwybodaeth o’r fath a sut y gall cleifion gyrchu hysbysiad preifatrwydd neu bolisi preifatrwydd y contractwr;

(bb) enw, cyfeiriad a rhif ffôn y Bwrdd Iechyd Lleol sy’n barti i’r contract ac y gellir cael manylion gwasanaethau meddygol sylfaenol yn yr ardal oddi wrtho; ac

(cc) y ffioedd a godir ar gyfer gwasanaethau nad ydynt yn wasanaethau’r GIG nad ydynt yn wasanaethau preifat.