Adran 17: Pwerau arolygu, etc.
72.Mae’r adran hon yn rhoi pwerau i swyddogion awdurdodedig sy’n mynd i fangre o dan adrannau 13, 14 a 15 i wneud amryw bethau i ganfod a yw trosedd o dan adran 2 wedi ei chyflawni. Caiff swyddogion gynnal arolygiadau ac archwiliadau o fangre. Caiff swyddogion hefyd ofyn am eitemau, eu harolygu, cymryd samplau ohonynt a/neu fynd â‘r eitem(au) a/neu‘r samplau o‘r fangre. Er enghraifft, efallai y bydd swyddogion yn dymuno edrych ar gofnod teledu cylch cyfyng o’r fangre, cadw cynhyrchion alcoholaidd neu gymryd samplau neu echdynion o’r rhain, neu yn yr un modd gymryd dogfennau neu gopïau o ddogfennau. Caiff y swyddog awdurdodedig ddadansoddi unrhyw samplau a gymerir.
73.Caiff y swyddog hefyd ei gwneud yn ofynnol i unrhyw berson roi gwybodaeth a chymorth, ond nid yw’n ofynnol i’r person hwnnw ateb unrhyw gwestiynau na chyflwyno unrhyw ddogfen y byddai ganddo hawl i wrthod eu hateb neu ei chyflwyno yn ystod achos llys yng Nghymru a Lloegr.
74.Rhaid i‘r swyddog awdurdodedig adael yn y fangre ddatganiad sy‘n rhoi manylion unrhyw eitemau sydd wedi eu cymryd, ac sy‘n nodi‘r person y caniateir gofyn iddo i‘r eiddo gael ei ddychwelyd.
