Gorchymyn Deddf Cynllunio a Phrynu Gorfodol 2004 (Cychwyn Rhif 3 a Darpariaethau Canlyniadol a Throsiannol) (Cymru) 2005

Offerynnau Statudol Cymru

2005 Rhif 1229 (Cy.87) (C.56)

CYNLLUNIO GWLAD A THREF, CYMRU

Gorchymyn Deddf Cynllunio a Phrynu Gorfodol 2004 (Cychwyn Rhif 3 a Darpariaethau Canlyniadol a Throsiannol) (Cymru) 2005

Wedi'i wneud

26 Ebrill 2005

Mae Cynulliad Cenedlaethol Cymru, drwy arfer y pwerau a roddwyd iddo gan adrannau 121(5) a 122(3)(b) o Ddeddf Cynllunio a Phrynu Gorfodol 2004 (“y Ddeddf”)(1) drwy hyn yn gwneud y Gorchymyn canlynol:

Enwi

1.   Enw'r Gorchymyn hwn yw Gorchymyn Deddf Cynllunio a Phrynu Gorfodol 2004 (Cychwyn Rhif 3 a Darpariaethau Canlyniadol a Throsiannol) (Cymru) 2005.

Y diwrnod penodedig

2.   30 Ebrill 2005 yw'r diwrnod penodedig i ddarpariaethau canlynol y Ddeddf, ddod i rym —

(a) adran 62 (cynllun datblygu lleol), i'r graddau nad yw eisoes mewn grym;

(b) adran 63 (gofynion paratoi), i'r graddau nad yw eisoes mewn grym;

(c) adran 72 (cyd-gynlluniau datblygu lleol); ac

(ch) adran 73 (eithrio rhai sylwadau).

Darpariaethau canlyniadol

3.   Ar y diwrnod a bennwyd gan erthygl 2, daw effaith darpariaethau canlynol Deddf Cynllunio Gwlad a Thref 1990 (“Deddf 1990”)(2) i ben o ran Cymru —

(a) adran 12 (paratoi cynllun datblygu unedol);

(b) adran 21 (newid neu ddisodli cynllun datblygu unedol); ac

(c) adran 23B (cynlluniau datblygu unedol ar gyfer Parciau Cenedlaethol yng Nghymru).

Darpariaethau trosiannol

4.   Mewn perthynas â'r awdurdodau cynllunio lleol a restrir yn yr Atodlen i'r Gorchymyn hwn a'u hardaloedd —

(a) ni fydd darpariaethau'r Ddeddf a gaiff eu dwyn i rym yn sgil erthygl 2 yn gymwys; ac

(b) bydd darpariaethau Deddf 1990 y daw eu heffaith i ben o dan erthygl 3 yn parhau mewn grym.

Llofnodwyd ar ran Cynulliad Cenedlaethol Cymru o dan adran 66(1) o Ddeddf Llywodraeth Cymru 1998(3)

D. Elis-Thomas

Llywydd y Cynulliad Cenedlaethol

26 Ebrill 2005

Erthygl 4

YR ATODLEN

• Awdurdod Parc Cenedlaethol Bannau Brycheiniog

• Awdurdod Parc Cenedlaethol Arfordir Penfro

• Cyngor Bwrdeistref Sirol Blaenau Gwent

• Cyngor Bwrdeistref Sirol Bro Morgannwg

• Cyngor Bwrdeistref Sirol Castell-nedd Port Talbot

• Cyngor Bwrdeistref Sirol Pen-y-bont ar Ogwr

• Cyngor Dinas Casnewydd

• Cyngor Dinas a Sir Abertawe

• Cyngor Sir Caerfyrddin

• Cyngor Sir Ceredigion

• Cyngor Sir y Fflint

• Cyngor Sir Gwynedd

• Cyngor Sir Fynwy

• Cyngor Sir Penfro

• Cyngor Sir Powys

• Cyngor Sir Ynys Môn

Nodyn Esboniadol

(Nid yw'r nodyn hwn yn rhan o'r Gorchymyn)

Mae'r Gorchymyn hwn yn dod â rhai darpariaethau pellach Rhan 6 o Ddeddf Cynllunio a Phrynu Gorfodol 2004 (“y Ddeddf”), sef adrannau 62 a 63 (i'r graddau nad ydynt eisoes wedi'u dwyn i rym), 72 a 73, i rym ar 30 Ebrill 2005.

Mae Rhan 6 o'r Ddeddf (adrannau 60 i 78) yn gymwys i Gymru'n unig ac yn sefydlu system o gynlluniau datblygu lleol (“cynlluniau”) yn lle'r cynlluniau datblygu unedol sy'n ofynnol o dan Bennod I Rhan II o Ddeddf Cynllunio Gwlad a Thref 1990 (“Deddf 1990”).

Effaith y Gorchymyn fydd galluogi'r awdurdodau cynllunio lleol hynny sydd wedi mynegi dymuniad i ddechrau gwaith ar baratoi eu cynlluniau i wneud hynny. Yr awdurdodau o dan sylw yw —

• Awdurdod Parc Cenedlaethol Eryri

• Cyngor Bwrdeistref Sirol Caerffili

• Cyngor Bwrdeistref Sirol Conwy

• Cyngor Bwrdeistref Sirol Merthyr Tudful

• Cyngor Bwrdeistref Sirol Rhondda Cynon Taf

• Cyngor Bwrdeistref Sirol Tor-faen

• Cyngor Bwrdeistref Sirol Wrecsam

• Cyngor Dinas a Sir Caerdydd

• Cyngor Sir Ddinbych

O ran yr awdurdodau cynllunio lleol eraill yng Nghymru (h.y. y rhai a ragnodir yn yr Atodlen i'r Gorchymyn hwn) bydd darpariaethau presennol Deddf 1990 yn parhau mewn grym am y tro.

Nodyn Orchymyn Cychwyn Blaenorol

(Nid yw'r nodyn hwn yn rhan o'r Gorchymyn)

Daeth darpariaethau Rhan 6 o Ddeddf Cynllunio a Phrynu Gorfodol 2004 sy'n cael eu rhestru yn y Tabl isod i rym ar y dyddiadau a ddangosir yn rhinwedd Gorchmynion a wnaed gan Gynulliad Cenedlaethol Cymru.

Adran(nau)	Dyddiad cychwyn	Rhif O.S.
60	14 Gorffennaf 2004	2004/1814 (Cy.199) (C.74)
62(4) a (5)(g)	1 Awst 2004	2004/1813 (Cy.198) (C.73)
63(3)(a) a (7)	1 Awst 2004	2004/1813 (Cy.198) (C.73)
75	1 Awst 2004	2004/1813 (Cy.198) (C.73)
76(2) (yn rhannol) a (3) (yn rhannol)	1 Awst 2004	2004/1813 (Cy.198) (C.73)
77	1 Awst 2004	2004/1813 (Cy.198) (C.73)
78	1 Awst 2004	2004/1813 (Cy.198) (C.73)

(1)

2004 p.5.

(2)

1990 p.8.

(3)

1998 p.38.