8.—(1) Caiff rheoleiddiwr gyflwyno hysbysiad (“hysbysiad adennill cost gorfodi”) i berson y mae hysbysiad cosb ariannol newidiol, hysbysiad cydymffurfio, hysbysiad adfer neu hysbysiad stop wedi'i gyflwyno iddo yn ei gwneud yn ofynnol i'r person hwnnw dalu'r costau a dynnwyd gan y rheoleiddiwr mewn perthynas â gosod yr hysbysiad hwnnw hyd at adeg ei osod.
(2) Mae costau'n cynnwys yn benodol—
(a)costau ymchwilio;
(b)costau gweinyddu;
(c)costau sicrhau cyngor arbenigol (gan gynnwys cyngor cyfreithiol).
(3) Rhaid i'r hysbysiad adennill cost gorfodi bennu—
(a)y seiliau dros osod yr hysbysiad;
(b)y swm y mae'n ofynnol i dalu;
(c)y cyfnod y mae'n rhaid talu ynddo, y mae'n rhaid iddo beidio â bod yn llai nag 28 diwrnod;
(ch)sut y mae'n rhaid talu;
(d)yr hawl i apelio; a
(dd)canlyniadau methu â chydymffurfio â'r hysbysiad yn y cyfnod penodedig.
(4) Caiff y person y cyflwynir yr hysbysiad iddo ei gwneud yn ofynnol i'r rheoleiddiwr ddarparu dadansoddiad manwl o'r swm.
(5) Nid yw'r person y mae'n ofynnol iddo dalu costau yn atebol i dalu unrhyw gostau y mae'r person hwnnw'n dangos eu bod wedi'u tynnu'n ddiangen.
(6) Caiff y person y mae'n ofynnol iddo dalu costau apelio—
(a)yn erbyn penderfyniad y rheoleiddiwr i osod y gofyniad i dalu costau;
(b)yn erbyn penderfyniad y rheoleiddiwr ar swm y costau hynny; neu
(c)am unrhyw reswm tebyg arall.