Rheoliadau Cymorth Gwladol (Symiau at Anghenion Personol) (Asesu Adnoddau) a Ffioedd Gofal Cymdeithasol (Cymru) (Diwygiadau Amrywiol) 2014

NODYN ESBONIADOL

(Nid yw’r nodyn hwn yn rhan o’r Rheoliadau)

Mae’r Rheoliadau hyn, sy’n gymwys o ran Cymru, yn gwneud diwygiadau i Reoliadau Cymorth Gwladol (Asesu Adnoddau) 1992 (“y Rheoliadau Asesu Adnoddau”), Rheoliadau Ffioedd Gofal Cymdeithasol (Asesu Modd a Phenderfynu Ffioedd) (Cymru) 2011 (“y Rheoliadau Penderfynu Ffioedd”) a Rheoliadau Ffioedd Gofal Cymdeithasol (Taliadau Uniongyrchol) (Asesu Modd a Phenderfynu ar Ad-daliad neu Gyfraniad) (Cymru) 2011 (“y Rheoliadau Taliadau Uniongyrchol”). Mae’r Rheoliadau hyn hefyd yn dirymu rheoliad 2 o Reoliadau Cymorth Gwladol (Symiau at Anghenion Personol) a Chymorth Gwladol (Asesu Adnoddau) (Diwygio) (Cymru) 2013 (“Rheoliadau 2013”).

Mae’r Rheoliadau Asesu Adnoddau yn ymwneud ag asesu gallu person i dalu am lety a drefnir gan awdurdodau lleol o dan Ran 3 o Ddeddf Cymorth Gwladol 1948.

Mae adran 22(4) o Ddeddf Cymorth Gwladol 1948 (“y Ddeddf”) yn ei gwneud yn ofynnol i awdurdodau lleol, wrth asesu gallu person i dalu am lety o dan Ran 3 o’r Ddeddf, ragdybio, yn niffyg anghenion arbennig, fod angen swm rhagnodedig ar berson at ei anghenion personol bob wythnos. Mae rheoliad 2 yn rhagnodi £25.00 fel y swm y mae ei angen at anghenion personol o dan adran 22(4).

Mae rheoliad 3 yn dirymu rheoliad 2 o Reoliadau 2013 a oedd gynt yn rhagnodi’r swm at anghenion personol o dan adran 22(4).

Mae rheoliad 4 yn diwygio’r Rheoliadau Asesu Adnoddau fel y daw’r terfyn cyfalaf a nodir yn rheoliad 20A yn £24,000. Y terfyn cyfalaf yn rheoliad 20A yw uchafswm y cyfalaf y caniateir i berson ei gael cyn i’r person hwnnw ddod yn atebol i dalu am gost unrhyw lety a drefnir o dan Ran 3 o’r Ddeddf, neu i gyfrannu o gyfalaf tuag at y gost honno.

Mae rheoliad 5 o’r Rheoliadau Penderfynu Ffioedd a rheoliad 5 o’r Rheoliadau Taliadau Uniongyrchol yn rhagnodi yn eu trefn uchafswm rhesymol y ffi am wasanaeth a’r uchafswm rhesymol o ad-daliad neu gyfraniad sy’n daladwy am y gwasanaeth hwnnw. Mae rheoliadau 5(2) a 6(2) o’r Rheoliadau hyn yn diwygio’r Rheoliadau Penderfynu Ffioedd a’r Rheoliadau Taliadau Uniongyrchol fel y daw yr uchafswm a nodir yn y naill a’r llall o’r Rheoliadau yn £55.00.

Mae rheoliadau 5(3) a 6(3) yn diwygio rheoliadau 14(4) ac 16(4) o’r Rheoliadau Penderfynu Ffioedd a’r Rheoliadau Taliadau Uniongyrchol yn eu trefn i gynnwys diystyru’r £10 gyntaf o daliad incwm gwarantedig goroeswr a wneir o dan Orchymyn y Lluoedd Arfog a’r Lluoedd Wrth Gefn (Cynllun Digolledu) 2011. Mae taliad incwm gwarantedig goroeswr yn daliad a wneir tan farwolaeth priod, partner sifil neu ddibynnydd mewn oed sy’n goroesi. Mae’r diwygiad hwn wedi ei wneud er mwyn sicrhau nad yw’r asesiadau modd i bobl sy’n defnyddio gwasanaethau dibreswyl yn llai ffafriol na’r asesiadau modd o dan Reoliadau Cymorth Gwladol (Asesu Adnoddau) 1992 i bobl sy’n cael gofal preswyl.

Ystyriwyd Cod Ymarfer Gweinidogion Cymru ar gynnal Asesiadau Effaith Rheoleiddiol mewn perthynas â’r Rheoliadau hyn. O ganlyniad, lluniwyd asesiad effaith rheoleiddiol o’r costau a’r manteision sy’n debygol o ddeillio o gydymffurfio â’r Rheoliadau hyn. Gellir cael copi oddi wrth: Yr Is-adran Cyflawni Polisïau ar gyfer Plant ac Oedolion, Yr Adran Iechyd a Gwasanaethau Cymdeithasol, Llywodraeth Cymru, Parc Cathays, Caerdydd, CF10 3NQ.