Rheoliadau’r Gwasanaeth Iechyd Gwladol (Cynllun Atebolrwyddau Presennol ar gyfer Ymarfer Cyffredinol) (Cymru) 2020

NODYN ESBONIADOL

(Nid yw’r nodyn hwn yn rhan o’r Rheoliadau)

Mae’r Rheoliadau hyn yn sefydlu’r Cynllun Atebolrwyddau Presennol ar gyfer Ymarfer Cyffredinol (“y Cynllun”). Nid ydynt yn gymwys ond mewn perthynas â gwasanaethau a ddarperir fel rhan o’r GIG yng Nghymru a deuant i rym ar 6 Ebrill 2020.

Mae’r Cynllun yn ymwneud ag atebolrwyddau camweddus sy’n codi o ddigwyddiadau a ddigwyddodd cyn 1 Ebrill 2019 ac y rhoddwyd gwybod amdanynt neu a berwyd ond na roddwyd gwybod amdanynt eto mewn cysylltiad â darparu gwasanaethau meddygol sylfaenol a gwasanaethau gofal iechyd eraill drwy ymarfer cyffredinol fel rhan o’r GIG. Atebolrwyddau esgeuluster clinigol fydd yr atebolrwyddau a gwmpesir gan y Cynllun yn bennaf.

Mae rheoliadau 2 a 4 yn diffinio termau a ddefnyddir yn y Rheoliadau. Mae rheoliad 3 yn sefydlu’r Cynllun ac yn darparu iddo gael ei weinyddu gan Weinidogion Cymru.

Mae rheoliad 5 yn pennu pwy sy’n “person cymwys”, sef personau y caniateir bodloni eu hatebolrwyddau presennol o dan y Cynllun, ar yr amod bod yr atebolrwyddau yn atebolrwyddau y mae’r Cynllun yn gymwys iddynt. Mae hwn yn berson sy’n aelod o sefydliad amddiffyn meddygol neu a oedd, ar y dyddiad perthnasol, yn aelod o sefydliad amddiffyn meddygol a hefyd naill ai’n gontractwr Rhan 4 (person sydd wedi ei gontractio o dan Ran 4 o Ddeddf y Gwasanaeth Iechyd Gwladol (Cymru) 2006 i ddarparu gwasanaethau meddygol sylfaenol, neu i wneud trefniadau i ddarparu gwasanaethau meddygol sylfaenol); yn is-gontractwr gwasanaethau meddygol sylfaenol (person sydd wedi ei is-gontractio gan gontractwr Rhan 4 i ddarparu’r gwasanaethau hynny); yn berson sy’n darparu gwasanaethau iechyd ategol; neu’n berson sydd wedi ei gymryd ymlaen gan unrhyw un o’r uchod i ddarparu gwasanaethau meddygol sylfaenol neu wasanaethau iechyd ategol neu i gyflawni gweithgaredd sy’n gysylltiedig â darparu’r gwasanaethau hynny. Y “dyddiad perthnasol” yw’r dyddiad y digwyddodd y weithred neu’r anweithred, a arweiniodd at atebolrwydd presennol, a “gwasanaethau iechyd ategol” yw gwasanaethau GIG, ac eithrio gwasanaethau meddygol sylfaenol, a ddarperir fel rhan o’r ymarfer cyffredinol gan gontractwr Rhan 4, is-gontractwr gwasanaethau meddygol sylfaenol neu berson sydd wedi ei is-gontractio gan y personau hynny i ddarparu’r gwasanaethau iechyd ategol.

Mae rheoliad 6 yn pennu’r atebolrwyddau presennol y mae’r Cynllun yn gymwys iddynt a’r dyddiad y bydd yn gymwys i’r atebolrwyddau presennol hynny ohono. Y rhain yw atebolrwyddau presennol sy’n ddyledus i drydydd parti sy’n codi o weithredoedd neu anweithredoedd sy’n gysylltiedig â darparu gwasanaethau meddygol sylfaenol neu wasanaethau iechyd ategol ac sy’n achosi anaf personol neu niwed i’r trydydd parti. Cwmpesir atebolrwyddau presennol personau cymwys o dan y Cynllun pan fo Gweinidogion Cymru wedi ymrwymo i drefniant contractiol â sefydliad amddiffyn meddygol ac, o dan y trefniant contractiol hwnnw, mae Gweinidogion Cymru wedi cytuno i ystyried darparu indemniad neu gynhorthwy yn ôl disgresiwn ar gyfer gweithredoedd neu anweithredoedd aelodau a chyn-aelodau’r sefydliad amddiffyn meddygol.

Mae gweithredoedd neu anweithredoedd cyflogeion person cymwys neu eraill, y mae person cymwys wedi eu cymryd ymlaen i gyflawni gweithgareddau sy’n gysylltiedig â darparu gwasanaethau meddygol sylfaenol neu wasanaethau GIG eraill ar gyfer y person cymwys neu y mae person cymwys yn caniatáu iddynt wneud hynny, hefyd wedi eu cwmpasu o dan y Cynllun.

Mae rheoliadau 7 i 10 yn darparu i daliadau gael eu gwneud o dan y Cynllun, gan gynnwys rheoliad 9 sy’n nodi o dan ba amgylchiadau y caiff Gweinidogion Cymru benderfynu nad oes unrhyw daliad i’w wneud.

Mae rheoliad 11 yn galluogi Gweinidogion Cymru i’w gwneud yn ofynnol i berson cymwys ddarparu gwybodaeth a chynhorthwy i Weinidogion Cymru at ddibenion y Cynllun.

Mae rheoliad 12 yn gosod dyletswydd ar Weinidogion Cymru i roi gwybodaeth ar gael i berson cymwys ynghylch cyfarwyddydau neu ganllawiau a roddir gan Weinidogion Cymru mewn perthynas â’r Cynllun.

Ystyriwyd Cod Ymarfer Gweinidogion Cymru ar gynnal Asesiadau Effaith Rheoleiddiol mewn perthynas â’r Rheoliadau hyn. Lluniwyd asesiad effaith rheoleiddiol sy’n ymwneud â’r offeryn hwn o’r costau a’r manteision sy’n debygol o ddeillio o gydymffurfio â’r Rheoliadau hyn. Gellir cael copi oddi wrth: Y Gyfarwyddiaeth Gofal Sylfaenol a Gwyddor Iechyd, Llywodraeth Cymru, Parc Cathays, Caerdydd, CF10 3NQ.