Rheoliadau’r Comisiwn Addysg Drydyddol ac Ymchwil (Cofrestru a Dadgofrestru Darparwyr Addysg Drydyddol yng Nghymru) 2024

NODYN ESBONIADOL

(Nid yw’r nodyn hwn yn rhan o’r Rheoliadau)

Mae’r Rheoliadau hyn yn gwneud darpariaeth mewn cysylltiad â chofrestru a dadgofrestru darparwyr addysg drydyddol yng Nghymru gan y Comisiwn Addysg Drydyddol ac Ymchwil (“y Comisiwn”).

Mae Rhan 1 yn cynnwys y darpariaethau dehongli a’r darpariaethau cyffredinol.

Mae Rhan 2 yn gwneud darpariaeth mewn cysylltiad â’r categorïau cofrestru. Rhaid i’r gofrestr a sefydlir ac a gynhelir gan y Comisiwn gael categori cofrestru craidd addysg uwch a chategori cofrestru amgen addysg uwch. Y categori cofrestru craidd addysg uwch yw’r categori cofrestru terfyn ffioedd at ddibenion adran 32(2)(b) o Ddeddf Addysg Drydyddol ac Ymchwil (Cymru) 2022 (“y Ddeddf”). Ni chaiff y Comisiwn gofrestru darparwr addysg drydyddol mewn mwy nag un categori o’r gofrestr ar yr un pryd.

Mae Rhan 3 yn gwneud darpariaeth mewn cysylltiad â chymhwystra i gael cyllid. Mae darparwyr addysg drydyddol sydd wedi eu cofrestru yn y categori cofrestru craidd addysg uwch yn ddarparwyr penodedig at ddibenion adrannau 88(3) a 105(4) o’r Ddeddf ac maent yn gymwys i gael cymorth ariannol ar gyfer addysg uwch, ymchwil neu arloesi.

Mae Rhan 4 yn nodi amodau cofrestru cychwynnol pellach ac amodau cofrestru parhaus mandadol pellach.

Mae Rhan 5 yn rhestru’r wybodaeth y mae rhaid ei chynnwys yng nghofnod darparwr addysg drydyddol yn y gofrestr.

Mae Rhan 6 yn gwneud darpariaeth mewn cysylltiad â dadgofrestru. ‌Rhaid i’r Comisiwn dynnu darparwr cofrestredig o’r categori cofrestru craidd addysg uwch os yw’r Comisiwn wedi ei fodloni nad elusen mo’r darparwr cofrestredig.

Ystyriwyd Cod Ymarfer Gweinidogion Cymru ar gynnal Asesiadau Effaith Rheoleiddiol mewn perthynas â’r Rheoliadau hyn. O ganlyniad, lluniwyd asesiad effaith rheoleiddiol o’r costau a’r manteision sy’n debygol o ddeillio o gydymffurfio â’r Rheoliadau hyn. Gellir cael copi oddi wrth: Llywodraeth Cymru, Parc Cathays, Caerdydd, CF10 3NQ.