Deddf Rheoleiddio ac Arolygu Gofal Cymdeithasol (Cymru) 2016

RHAN 8 LL+C GOFAL CYMDEITHASOL CYMRU: DYLETSWYDD I SEFYDLU PANELI ETC.

174 Dyletswydd i sefydlu paneli etc. LL+C

(1) Rhaid i GCC drwy reolau wneud darpariaeth bod—

(a) paneli i wneud dyfarniadau o dan Ran 4 mewn perthynas â chofrestru cychwynnol yn y gofrestr, aros arni ac adfer personau iddi (“paneli apelau cofrestru”),

(b) paneli i wneud dyfarniadau mewn perthynas ag addasrwydd personau sydd wedi eu cofrestru yn y gofrestr i ymarfer fel gweithwyr gofal cymdeithasol (“paneli addasrwydd i ymarfer”), ac

(c) paneli i atal dros dro gofrestriad person yn y gofrestr neu i atodi amodau i’w gofrestriad wrth aros am ddyfarniad gan baneli o’r math a grybwyllir ym mharagraff (a) neu (b) (“paneli gorchmynion interim”).

(2) Rhaid i banel a sefydlir yn rhinwedd is-adran (1) gael o leiaf 3 aelod, gan gynnwys aelod a benodir i gadeirio’r panel.

(3) Rhaid i’r aelodau fod yn unigolion.

(4) Rhaid i aelodaeth panel gael mwyafrif o bersonau nad ydynt wedi eu cofrestru mewn unrhyw ran o’r gofrestr ac nad ydynt erioed wedi eu cofrestru mewn unrhyw ran ohoni.

(5) Ni chaniateir i’r personau a ganlyn fod yn aelodau o banel—

(a) person sy’n aelod neu’n aelod o staff—

(i) GCC,

(ii) [F1 Gwaith Cymdeithasol Lloegr] ,

(iii) Cyngor Gwasanaethau Cymdeithasol yr Alban, neu

(iv) Cyngor Gofal Cymdeithasol Gogledd Iwerddon;

(b) person rhagnodedig.

(6) Rhaid i GCC drwy reolau wneud darpariaeth ynghylch—

(a) penodi personau yn aelodau o banel (gan gynnwys, yn ddarostyngedig i is-adran (2), nifer y personau y caniateir iddynt gael eu penodi neu y mae rhaid eu penodi);

(b) y cworwm ar gyfer arfer swyddogaethau’r paneli;

(c) tymor swydd person fel aelod neu gadeirydd panel;

(d) y seiliau ar gyfer atal aelod o’i swydd dros dro neu ei symud o’i swydd.

(7) Rhaid i GCC hefyd drwy reolau wneud darpariaeth ar gyfer—

(a) datgan a chofrestru buddiannau preifat aelodau paneli;

(b) cyhoeddi cofnodion a gofnodwyd yn y gofrestr o fuddiannau aelodau.

(8) Caiff GCC drwy reolau wneud darpariaeth arall ynghylch cyfansoddiad a gweithrediad paneli; ond mae unrhyw reolau yn ddarostyngedig i reoliadau a wneir o dan adran 175 (rheoliadau ynghylch achosion panel).

(9) Yn benodol, caiff rheolau o dan is-adran (8) ddarparu ar gyfer—

(a) penodi cynghorwyr cyfreithiol neu gynghorwyr eraill;

(b) penodi aseswyr neu archwilwyr;

(c) categorïau o berson y caniateir iddynt gael eu penodi i gadeirio paneli;

(d) ffioedd, treuliau neu daliadau eraill sydd i’w gwneud gan GCC i unrhyw aelod o banel.

Diwygiadau Testunol

F1 Geiriau yn a. 174(5)(a)(ii) wedi eu hamnewid (2.12.2019) gan Children and Social Work Act 2017 (c. 16), a. 70(2), Atod. 5 para. 44(a); O.S. 2019/1436, rhl. 2(s)

Gwybodaeth Cychwyn

I1 A. 174 ddim mewn grym ar y Cydsyniad Brenhinol, gweler a. 188(1)

I2 A. 174 mewn grym ar 3.4.2017 gan O.S. 2017/309, ergl. 2(g) (ynghyd ag erglau. 3, 4, Atod.)

175 Achosion gerbron paneli LL+C

(1) Caiff Gweinidogion Cymru drwy reoliadau wneud unrhyw ddarpariaeth sy’n briodol yn eu barn hwy ar gyfer achosion ac mewn cysylltiad ag achosion sydd wedi eu dwyn o dan y Ddeddf hon gerbron—

(a) paneli apelau cofrestru;

(b) paneli gorchmynion interim;

(c) paneli addasrwydd i ymarfer.

(2) Caiff y rheoliadau awdurdodi GCC neu ei gwneud yn ofynnol i GCC wneud rheolau ynghylch unrhyw fater sy’n ymwneud ag achosion o’r fath.

(3) Ni chaiff rheoliadau o dan yr adran hon ei gwneud yn ofynnol i berson roi tystiolaeth neu gyflwyno dogfen neu dystiolaeth berthnasol arall na allai’r person gael ei orfodi i’w rhoi neu ei chyflwyno mewn achosion sifil mewn llys yng Nghymru a Lloegr.

(4) Safon y prawf sy’n gymwys i’r achosion a grybwyllir yn is-adran (1) yw’r un sy’n gymwys i achosion sifil.

Gwybodaeth Cychwyn

I3 A. 175 ddim mewn grym ar y Cydsyniad Brenhinol, gweler a. 188(1)

I4 A. 175 mewn grym ar 3.4.2017 gan O.S. 2017/309, ergl. 2(g) (ynghyd ag erglau. 3, 4, Atod.)