Rheoliadau Deintyddiaeth Breifat (Cymru) 2017

RHAN 2 Personau Cofrestredig

Addasrwydd darparwr cofrestredig

9.—( 1) Ni chaiff person gynnal practis deintyddol preifat oni bai bod y person yn addas i wneud hynny.

(2) Nid yw person yn addas i gynnal practis deintyddol preifat oni bai bod y person—

(a) yn unigolyn sy’n bodloni’r gofynion a nodir ym mharagraff (3);

(b) yn bartneriaeth, a bod pob un o’r partneriaid yn bodloni’r gofynion ym mharagraff (3); neu

(c) yn sefydliad ac—

(i) bod y sefydliad wedi hysbysu swyddfa briodol yr awdurdod cofrestru am enw a chyfeiriad yr unigolyn cyfrifol a’i swydd yn y sefydliad; a

(ii) bod yr unigolyn yn bodloni’r gofynion ym mharagraff (3).

(3) Y gofynion yw—

(a) bod yr unigolyn yn addas o ran ei uniondeb ac o gymeriad da i gynnal y practis deintyddol preifat neu, yn ôl y digwydd, i fod yn gyfrifol am oruchwylio’r gwaith o reoli’r practis deintyddol preifat;

(b) bod yr unigolyn yn gallu oherwydd ei iechyd, ar ôl i addasiadau rhesymol (os oes rhai) gael eu gwneud, gynnal y practis deintyddol preifat neu, yn ôl y digwydd, fod yn gyfrifol am oruchwylio’r gwaith o reoli’r practis deintyddol preifat; ac

(c) bod gwybodaeth neu ddogfennaeth lawn a boddhaol, yn ôl y digwydd, ar gael mewn perthynas â’r unigolyn mewn cysylltiad â phob un o’r materion a bennir yn Rhan 1 o Atodlen 3.

(4) Wrth asesu cymeriad unigolyn at ddibenion paragraff (3)(a), rhaid i’r materion a ystyrir gynnwys y rhai a restrir yn Rhan 2 o Atodlen 3.

(5) Nid yw person yn addas i gynnal practis deintyddol preifat—

(a) os yw’r person hwnnw wedi ei ddyfarnu’n fethdalwr(1) neu y dyfarnwyd y secwestriad o ystad y person ac (yn y naill achos neu’r llall) os nad yw’r person wedi ei ryddhau ac nad yw’r gorchymyn methdalu(2) wedi ei ddiddymu na’i ddad-wneud neu fod cyfnod moratoriwm o dan orchymyn rhyddhau o ddyled (o fewn ystyr “debt relief order” yn adran 251A o Ddeddf Ansolfedd 1986)(3) yn gymwys mewn perthynas â’r person; neu

(b) os yw’r person hwnnw wedi gwneud compównd neu drefniant â chredydwyr y person ac nad yw wedi ei ryddhau mewn cysylltiad ag ef.

Penodi rheolwr

10.—( 1) Rhaid i’r darparwr cofrestredig benodi unigolyn i reoli’r practis deintyddol preifat—

(a) os yw’r darparwr cofrestredig yn sefydliad neu’n bartneriaeth;

(b) os nad yw’r darparwr cofrestredig yn berson addas i gynnal y practis deintyddol preifat; neu

(c) os nad oes gan y darparwr cofrestredig ofal am y practis deintyddol preifat yn llawnamser o ddydd i ddydd, neu os nad yw’n bwriadu i’r practis fod o dan ei ofal yn y modd hwnnw.

(2) Os yw’r darparwr cofrestredig yn penodi unigolyn i reoli’r practis deintyddol preifat, rhaid i’r darparwr cofrestredig hysbysu swyddfa briodol yr awdurdod cofrestru ar unwaith am enw’r unigolyn a benodir a’r dyddiad y mae’r penodiad yn cymryd effaith.

Addasrwydd rheolwr

11.—( 1) Ni chaiff person reoli practis deintyddol preifat oni bai bod y person yn addas i wneud hynny.

(2) Nid yw person yn addas i reoli practis deintyddol preifat oni bai—

(a) bod y person hwnnw yn addas o ran ei uniondeb ac o gymeriad da i reoli’r practis deintyddol preifat; a

(b) gan roi sylw i faint y practis deintyddol preifat, y datganiad o ddiben a nifer y cleifion a’u hanghenion—

(i) bod gan y person y cymwysterau, y sgiliau a’r profiad angenrheidiol i reoli’r practis deintyddol preifat; a

(ii) bod y person yn gallu gwneud hynny oherwydd ei iechyd, ar ôl i addasiadau rhesymol (os oes rhai) gael eu gwneud; a

(iii) bod gwybodaeth neu ddogfennaeth lawn a boddhaol, yn ôl y digwydd, ar gael mewn perthynas â’r person mewn cysylltiad â phob un o’r materion a bennir yn Rhan 1 o Atodlen 3.

(3) Wrth asesu cymeriad person at ddibenion paragraff (2)(a), rhaid i’r materion a ystyrir gynnwys y rhai a restrir yn Rhan 2 o Atodlen 3.

(4) Pan fo person yn rheoli mwy nag un practis deintyddol preifat, rhaid iddo dreulio amser digonol ym mhob practis i sicrhau bod y practis yn cael ei reoli’n effeithiol.

Y person cofrestredig – gofynion cyffredinol a hyfforddiant

12.—( 1) Rhaid i’r darparwr cofrestredig a’r rheolwr cofrestredig gynnal neu reoli’r practis deintyddol preifat, yn ôl y digwydd, gyda gofal, cymhwysedd a sgìl digonol, gan roi sylw i faint y practis deintyddol preifat, y datganiad o ddiben a nifer y cleifion a’u hanghenion.

(2) Rhaid i’r darparwr cofrestredig a’r rheolwr cofrestredig ymgymryd, o bryd i’w gilydd, ag unrhyw hyfforddiant sy’n briodol er mwyn sicrhau bod ganddynt y sgiliau y mae eu hangen i gynnal neu reoli’r practis deintyddol preifat, yn ôl y digwydd.

(3) At ddibenion y rheoliad hwn, rhaid i’r sawl a ganlyn ymgymryd â’r hyfforddiant y cyfeirir ato ym mharagraff (2)—

(a) yr unigolyn, os yw’r darparwr cofrestredig yn unigolyn;

(b) yr unigolyn cyfrifol, os yw’r darparwr cofrestredig yn sefydliad; neu

(c) un o’r partneriaid, os yw’r darparwr cofrestredig yn bartneriaeth.

(1)

Gweler adran 381(1) o Ddeddf Ansolfedd 1986 am ystyr “bankrupt”.

(2)

Gweler adran 381(2) o Ddeddf Ansolfedd 1986 am ystyr “bankruptcy order”.

(3)

1986 p. 45. Mewnosodwyd adran 251A gan adran 108 o Ddeddf Tribiwnlysoedd, Llysoedd a Gorfodaeth 2007 (p. 15) ac Atodlen 17 iddi.