Rheoliadau Ychwanegu Fitaminau, Mwynau a Sylweddau Eraill (Cymru) (Diwygio) 2020

Offerynnau Statudol Cymru

2020 Rhif 257 (Cy. 59)

Bwyd, Cymru

Rheoliadau Ychwanegu Fitaminau, Mwynau a Sylweddau Eraill (Cymru) (Diwygio) 2020

Gwnaed

10 Mawrth 2020

Gosodwyd gerbron Cynulliad Cenedlaethol Cymru

12 Mawrth 2020

Yn dod i rym

3 Ebrill 2020

Mae Gweinidogion Cymru yn gwneud y Rheoliadau canlynol drwy arfer y pwerau a roddir gan adrannau 16(1)(a) ac (f), 17(2), 26(1)(a) a (3) ac 48(1) o Ddeddf Diogelwch Bwyd 1990(1) ac a freiniwyd bellach ynddynt hwy(2) ac adran 2(2) o Ddeddf y Cymunedau Ewropeaidd 1972(3) a pharagraff 1A o Atodlen 2 iddi.

Mae Gweinidogion Cymru wedi eu dynodi at ddibenion adran 2(2) o Ddeddf y Cymunedau Ewropeaidd 1972 mewn perthynas â mesurau sy’n ymwneud â bwyd (gan gynnwys diod) gan gynnwys cynhyrchu sylfaenol o ran bwyd(4). Mae’r Rheoliadau hyn yn gwneud darpariaeth at ddiben a grybwyllir yn adran 2(2) o Ddeddf y Cymunedau Ewropeaidd 1972, ac mae’n ymddangos i Weinidogion Cymru ei bod yn hwylus i gyfeiriadau penodol at ddarpariaethau yn Rheoliad (EC) Rhif 2016/128(5) gael eu dehongli fel cyfeiriadau at y darpariaethau hynny fel y’u diwygir o bryd i’w gilydd.

Mae Gweinidogion Cymru wedi rhoi sylw i gyngor perthnasol a roddwyd gan yr Asiantaeth Safonau Bwyd yn unol ag adran 48(4A) o Ddeddf Diogelwch Bwyd 1990(6).

Fel sy’n ofynnol gan Erthygl 9 o Reoliad (EC) Rhif 178/2002 Senedd Ewrop a’r Cyngor sy’n gosod egwyddorion cyffredinol a gofynion cyfraith bwyd, yn sefydlu Awdurdod Diogelwch Bwyd Ewrop ac yn gosod gweithdrefnau o ran materion diogelwch bwyd(7), ymgynghorwyd yn agored ac yn dryloyw â’r cyhoedd wrth lunio a gwerthuso’r Rheoliadau hyn.

Enwi a chychwyn

1.—( 1) Enw’r Rheoliadau hyn yw Rheoliadau Ychwanegu Fitaminau, Mwynau a Sylweddau Eraill (Cymru) (Diwygio) 2020.

(2) Daw’r Rheoliadau hyn i rym ar 3 Ebrill 2020.

Diwygio Rheoliadau Ychwanegu Fitaminau, Mwynau a Sylweddau Eraill (Cymru) 2007

2.—( 1) Mae Rheoliadau Ychwanegu Fitaminau, Mwynau a Sylweddau Eraill (Cymru) 2007(8) wedi eu diwygio fel a ganlyn.

(2) Yn rheoliad 2(1) (dehongli), yn y diffiniad o “y Rheoliad CE” (“the EC Regulation”) yn lle “I neu II” rhodder “1, 2 neu 3”.

(3) Yn rheoliad 4(2) (tramgwyddau a chosbau)—

(a) ar ddiwedd is-baragraff (ch) hepgorer “a”;

(b) ar ddiwedd is-baragraff (d) yn lle “.” rhodder “;”;

(c) ar ôl is-baragraff (d) mewnosoder—

“(dd) Erthygl 8(2)(a)(i) (gwahardd ychwanegu sylwedd a restrir yn Atodiad 3, Rhan A at fwydydd neu ei ddefnyddio wrth weithgynhyrchu bwydydd);

(e) Erthygl 8(2)(a)(ii) (gwahardd ychwanegu sylwedd a restrir yn Atodiad 3, Rhan B at fwydydd neu ei ddefnyddio wrth weithgynhyrchu bwydydd oni bai bod y sylwedd hwnnw yn cael ei ychwanegu neu ei ddefnyddio yn unol â’r amodau a bennir yn y Rhan honno).”

(4) Ar ôl rheoliad 4 mewnosoder—

“Darpariaeth drosiannol mewn perthynas â bwyd sy’n cynnwys sylwedd a restrir yn Atodiad 3, Rhan B

4A.   Nid oes tramgwydd wedi’i gyflawni o dan baragraff (1) o reoliad 4 yn rhinwedd paragraff (2)(e) o’r rheoliad hwnnw mewn cysylltiad ag ychwanegu sylwedd at unrhyw fwyd neu ei ddefnyddio i weithgynhyrchu unrhyw fwyd os—

(a) yw’r bwyd wedi’i roi ar y farchnad cyn 1 Ebrill 2021; a

(b) yw’r sylwedd o dan sylw yn dod o fewn y cofnod yn Atodiad 3, Rhan B sy’n ymwneud â thraws-fraster ac eithrio traws-fraster sy’n digwydd yn naturiol mewn braster sy’n dod o anifeiliaid.”

Vaughan Gething

Y Gweinidog Iechyd a Gwasanaethau Cymdeithasol, un o Weinidogion Cymru

10 Mawrth 2020

NODYN ESBONIADOL

(Nid ywʼr nodyn hwn yn rhan oʼr Rheoliadau)

Mae’r Rheoliadau hyn yn diwygio Rheoliadau Ychwanegu Fitaminau, Mwynau a Sylweddau Eraill (Cymru) 2007 (O.S. 2007/1984 (Cy. 165)) (“Rheoliadau 2007”).

Mae rheoliad 2(1) o Reoliadau 2007 wedi ei ddiwygio fel bod y diffiniad o “y Rheoliad CE” yn cynnwys cyfeiriad at Atodiad 3 (fel y’i diwygir o bryd i’w gilydd) o Reoliad (EC) Rhif 1925/2006 Senedd Ewrop a’r Cyngor dyddiedig 20 Rhagfyr 2006 ar ychwanegu fitaminau a mwynau a sylweddau eraill penodol at fwydydd (OJ Rhif L 404, 30.12.2006, t. 26), fel y’i diwygiwyd ddiwethaf gan Reoliad y Comisiwn (EU) 2019/650 dyddiedig 24 Ebrill 2019 sy’n diwygio Atodiad 3 i Reoliad (EC) Rhif 1925/2006 Senedd Ewrop a’r Cyngor ynghylch Yohimbe (Pausinystalia yohimbe (K. Schum) Pierre ex Beille) (OJ Rhif L 110, 25.4.2019, t. 21).

Mae rheoliad 4(2) o Reoliadau 2007 wedi ei ddiwygio fel ei bod yn drosedd ychwanegu sylwedd a restrir yn Atodiad 3, Rhan A o’r Rheoliad CE at fwydydd, neu ddefnyddio sylwedd o’r fath wrth weithgynhyrchu bwydydd.

Mae rheoliad 4(2) o Reoliadau 2007 wedi ei ddiwygio ymhellach fel ei bod yn drosedd ychwanegu sylwedd a restrir yn Atodiad 3, Rhan B o’r Rheoliad CE at fwydydd, neu ddefnyddio sylwedd o’r fath wrth weithgynhyrchu bwydydd oni bai bod y sylwedd hwnnw yn cael ei ychwanegu neu ei ddefnyddio yn unol â’r amodau a bennir yn y Rhan honno.

Mae darpariaeth drosiannol newydd (rheoliad 4A) wedi ei mewnosod yn Rheoliadau 2007 i ddarparu nad oes unrhyw drosedd yn cael ei chyflawni mewn cysylltiad ag unrhyw fwyd nad yw’n cydymffurfio â darpariaethau Atodiad 3, Rhan B sy’n ymwneud â thraws-fraster ac eithrio traws-fraster sy’n digwydd yn naturiol mewn braster sy’n dod o anifeiliaid ac a roddir ar y farchnad cyn 1 Ebrill 2021.

Ystyriwyd Cod Ymarfer Gweinidogion Cymru ar gynnal Asesiadau Effaith Rheoleiddiol mewn perthynas â’r Rheoliadau hyn. O ganlyniad, ystyriwyd nad oedd yn angenrheidiol cynnal asesiad effaith rheoleiddiol o’r costau a’r manteision sy’n debygol o ddeillio o gydymffurfio â’r Rheoliadau hyn.

(1)

1990 p. 16. Amnewidiwyd adran 1(1) a (2) (ystyr “food” ac ymadroddion sylfaenol eraill) gan O.S. 2004/2990. Diwygiwyd adran 16(1) o Ddeddf Diogelwch Bwyd 1990 (“Deddf 1990”) gan baragraffau 7 ac 8 o Atodlen 5 i Ddeddf Safonau Bwyd 1999 (p. 28) (“Deddf 1999”). Diwygiwyd adran 17 o Ddeddf 1990 gan baragraffau 7, 8 a 12 o Atodlen 5 i Ddeddf 1999 ac O.S. 2011/1043. Diwygiwyd adran 26(3) gan Atodlen 6 i Ddeddf 1999. Diwygiwyd adran 48(1) gan baragraffau 7 ac 8 o Atodlen 5 i Ddeddf 1999.

(2)

Trosglwyddwyd y swyddogaethau hynny a oedd gynt yn arferadwy gan “the Ministers” (sef, o ran Cymru a Lloegr ac yn gweithredu ar y cyd, y Gweinidog Amaethyddiaeth, Pysgodfeydd a Bwyd a’r Ysgrifenyddion Gwladol a oedd yn eu trefn yn ymwneud ag iechyd yn Lloegr a bwyd ac iechyd yng Nghymru) i’r graddau yr oeddent yn arferadwy o ran Cymru, i Gynulliad Cenedlaethol Cymru gan O.S 1999/672 fel y’i darllenir gydag adran 40(3) o Ddeddf 1999 a’u trosglwyddo wedi hynny i Weinidogion Cymru gan baragraff 30 o Atodlen 11 i Ddeddf Llywodraeth Cymru 2006 (p. 32). Mae’r swyddogaethau hynny yn arferadwy bellach o ran Lloegr gan yr Ysgrifennydd Gwladol yn unol â pharagraff 8 o Atodlen 5 i Ddeddf 1999.

(3)

1972 p. 68 (“Deddf 1972”). Diwygiwyd adran 2(2) o Ddeddf 1972 gan adran 27(1)(a) o Ddeddf Diwygio Deddfwriaethol a Rheoleiddiol 2006 (p. 51) a chan adran 3(3) o Ddeddf yr Undeb Ewropeaidd (Diwygio) 2008 (p. 7) a Rhan 1 o’r Atodlen iddi. Mewnosodwyd paragraff 1A o Atodlen 2 gan adran 28 o Ddeddf Diwygio Deddfwriaethol a Rheoleiddiol 2006. Fe’i diwygiwyd gan adran 3(3) o Ddeddf yr Undeb Ewropeaidd (Diwygio) 2008 a Rhan 1 o’r Atodlen iddi ac O.S. 2007/1388.

(4)

O.S. 2005/1971, y mae diwygiadau iddo nad ydynt yn berthnasol i’r Rheoliadau hyn.

(5)

Rheoliad (EC) Rhif 1925/2006 Senedd Ewrop a’r Cyngor dyddiedig 20 Rhagfyr 2006 ar ychwanegu fitaminau a mwynau a sylweddau eraill penodol at fwydydd (OJ Rhif L 404, 30.12.2006, t. 26), fel y’i diwygiwyd ddiwethaf gan Reoliad y Comisiwn (EU) 2019/650 dyddiedig 24 Ebrill 2019 sy’n diwygio Atodiad 3 i Reoliad (EC) Rhif 1925/2006 Senedd Ewrop a’r Cyngor ynghylch Yohimbe (Pausinystalia yohimbe (K. Schum) Pierre ex Beille) (OJ Rhif L 110, 25.4.2019, t. 21).

(6)

Mewnosodwyd adran 48(A) gan baragraff 21 o Atodlen 5 i Ddeddf 1999.

(7)

OJ Rhif L 31, 1.2.2002, t.1, fel y’i diwygiwyd ddiwethaf gan Reoliad (EU) 2019/1243 Senedd Ewrop a’r Cyngor dyddiedig 20 Mehefin 2019 sy’n addasu nifer o actau cyfreithiol sy’n darparu ar gyfer defnyddio’r weithdrefn reoleiddiol ynghyd â chraffu i Erthyglau 290 a 291 o’r Cytuniad ar Weithrediad yr Undeb Ewropeaidd (OJ Rhif L 198, 25.7.2019, t. 241) ac a ddiwygiwyd yn rhagolygol gan O.S. 2019/641.

(8)

O.S. 2007/1984 (Cy. 165), a ddiwygiwyd gan O.S. 2014/2303 (Cy. 227) ac O.S. 2018/806 (Cy. 162). Mae wedi ei ddiwygio’n rhagolygol gan O.S. 2019/179 (Cy. 45).