Rheoliadau Rheoliadau Adeiladu etc. (Diwygio) (Adeiladau Ynni a Eithrir) (Cymru) 2018

Offerynnau Statudol Cymru

2018 Rhif 558 (Cy. 97)

Adeiladu Ac Adeiladau, Cymru

Rheoliadau Rheoliadau Adeiladu etc. (Diwygio) (Adeiladau Ynni a Eithrir) (Cymru) 2018

Gwnaed

30 Ebrill 2018

Gosodwyd gerbron Cynulliad Cenedlaethol Cymru

4 Mai 2018

Yn dod i rym

8 Mehefin 2018

Mae Gweinidogion Cymru wedi eu dynodi(1) at ddibenion adran 2(2) o Ddeddf y Cymunedau Ewropeaidd 1972(2) mewn perthynas â dylunio ac adeiladu adeiladau ac mewn perthynas â gwasanaethau, ffitiadau a chyfarpar a ddarperir yn yr adeiladau hynny neu mewn cysylltiad â hwy.

Mae Gweinidogion Cymru, drwy arfer y pwerau a roddir iddynt gan adran 2(2) o Ddeddf y Cymunedau Ewropeaidd 1972, ac i’r Ysgrifennydd Gwladol gan adrannau 1, 1A, 2, 2A, 3, 16, 17, 34, 35, 47, 49, 50, 51, 51A, 52 a 54 o Ddeddf Adeiladu 1984(3) a pharagraffau 1, 2, 4, 4A, 6, 7, 8 a 10 o Atodlen 1 iddi, a pharagraffau 2 a 3 o Atodlen 4 iddi, sydd bellach yn arferadwy ganddynt hwy(4), ar ôl ymgynghori â Phwyllgor Cynghori Cymru ar Reoliadau Adeiladu a’r cyrff eraill hynny yr ymddengys iddynt hwy eu bod yn cynrychioli’r materion dan sylw yn unol ag adran 14(7) o’r Ddeddf honno(5), yn gwneud y Rheoliadau a ganlyn:

(1)

O.S. 2016/161.

(2)

1972 p. 68. Diwygiwyd adran 2(2) gan adran 27 o Ddeddf Diwygio Deddfwriaethol a Rheoleiddiol 2006 (p. 51) ac adran 3 o Ddeddf yr Undeb Ewropeaidd (Diwygio) 2008 (p. 7) a Rhan 1 o’r Atodlen i’r Ddeddf honno.

(3)

1984 p. 55. Diwygiwyd adran 1 gan adran 1 o Ddeddf Adeiladau Cynaliadwy a Diogel 2004 (p. 22) (“Deddf 2004”); mewnosodwyd adrannau 1A a 2A gan adrannau 2 a 4 o Ddeddf 2004 yn y drefn honno; diwygiwyd adran 16 gan Ddeddf Cyfraith Statud (Diddymiadau) 1993 (p. 50), diwygiwyd adrannau 47 a 52 gan O.S. 1996/1905 ac adran 8 o Ddeddf 2004; diwygiwyd adrannau 50 a 51 gan O.S. 1996/1905, a mewnosodwyd adran 51A gan yr O.S. hwnnw; mewnosodwyd paragraff 4A yn Atodlen 1 gan adran 8 o Ddeddf 2004; diwygiwyd paragraff 7 o Atodlen 1 gan adran 3 o Ddeddf 2004 a chan adran 11 o Ddeddf Newid yn yr Hinsawdd ac Ynni Cynaliadwy 2006 (p. 19); a diwygiwyd paragraff 8 o Atodlen 1 gan adran 3 o Ddeddf 2004 ac adran 40 o Ddeddf Rheoli Llifogydd a Dŵr 2010 (p. 29).

(4)

Cafodd y swyddogaethau a roddwyd i’r Ysgrifennydd Gwladol neu a osodwyd arno gan Ddeddf Adeiladu 1984 (“Deddf 1984”) neu oddi tani, i’r graddau yr oeddent yn arferadwy o ran Cymru, eu trosglwyddo i Weinidogion Cymru gan Orchymyn Gweinidogion Cymru (Trosglwyddo Swyddogaethau) (Rhif 2) 2009 (O.S. 2009/3019) (“Gorchymyn 2009”) yn ddarostyngedig i erthyglau 3 a 4 o’r Gorchymyn hwnnw. Roedd erthygl 3(a) o Orchymyn 2009 yn darparu nad oedd swyddogaethau wedi eu trosglwyddo i’r graddau yr oeddent yn arferadwy mewn perthynas ag adeilad ynni a eithrir fel y’i diffinnir gan yr Atodlen i’r Gorchymyn hwnnw. Dileodd adran 54 o Ddeddf Cymru 2017 (p. 4) yr eithriad hwn drwy wneud y ddarpariaeth angenrheidiol ar gyfer trosglwyddo swyddogaethau o dan Ddeddf 1984 ar gyfer y categori hwnnw o adeiladau.

(5)

Ychwanegwyd adran 14(7) gan Orchymyn 2009.