Gorchymyn Deddf Ymddygiad Gwrthgymdeithasol 2003 (Diwygio Deddf Addysg 1996) (Cymru) 2013

Offerynnau Statudol Cymru

2013 Rhif 1657 (Cy. 155)

Addysg, Cymru

Gorchymyn Deddf Ymddygiad Gwrthgymdeithasol 2003 (Diwygio Deddf Addysg 1996) (Cymru) 2013

Gwnaed

2 Gorffennaf 2013

Yn dod i rym yn unol â erthygl 1

Mae Gweinidogion Cymru, drwy arfer y pŵer a roddwyd i Gynulliad Cenedlaethol Cymru gan adran 23(9) a 94(2) o Ddeddf Ymddygiad Gwrthgymdeithasol 2003(1) ac a freiniwyd bellach ynddynt hwy(2), yn gwneud y Gorchymyn a ganlyn.

Yn unol â pharagraff 35(3), Tabl 1, o Atodlen 11 i Ddeddf Llywodraeth Cymru 2006, cafodd drafft o’r Gorchymyn hwn ei osod gerbron Cynulliad Cenedlaethol Cymru a’i gymeradwyo ganddo drwy benderfyniad.

Enwi a chychwyn

1.   Enw’r Gorchymyn hwn yw Gorchymyn Deddf Ymddygiad Gwrthgymdeithasol 2003 (Diwygio Deddf Addysg 1996) (Cymru) 2013 a daw i rym drannoeth y diwrnod y’i gwneir.

Diwygio Deddf Addysg 1996

2.—( 1) Yn adrannau 444A neu 444B o Ddeddf Addysg 1996 dileer y geiriau “in England” ym mhob man lle y maent yn digwydd.

(2) Yn adran 569(2B) o Ddeddf Addysg 1996 yn lle “or 336” rhodder “, 336, 444A or 444B”.

Huw Lewis

Y Gweinidog Addysg a Sgiliau, un o Weinidogion Cymru.

2 Gorffennaf 2013

NODYN ESBONIADOL

(Nid yw’r nodyn hwn yn rhan o’r Gorchymyn)

Mae adran 23(9) o Ddeddf Ymddygiad Gwrthgymdeithasol 2003 yn darparu’r pŵer i Weinidogion Cymru i ddileu’r geiriau “in England” o adrannau 444A a 444B o Ddeddf Addysg 1996 (“Deddf 1996”).

Mae adrannau 444A a 444B o Ddeddf 1996 yn darparu pŵer i gwnstabl heddlu, swyddog o’r awdurdod lleol neu’r pennaeth (neu aelod o staff a awdurdodir gan y pennaeth) i ddyroddi, yn unol â’r rheoliadau, hysbysiadau cosb mewn cysylltiad â thriwantiaeth o’r ysgol (ac o fannau eraill lle y caiff addysg ei darparu).

Mae dileu’r geiriau “in England” yn golygu y bydd y darpariaethau hynny yn gymwys i Gymru.

Mae’r Gorchymyn hwn hefyd yn gwneud mân ddiwygiad i adran 569 o Ddeddf Addysg 1996 er mwyn ei gwneud yn glir mai swyddogaethau Gweinidogion Cymru yw’r swyddogaethau o dan adrannau 444A a 444B o Ddeddf 1996.

(1)

2003 p.38 (“Deddf 2003”).

(2)

Trosglwyddwyd swyddogaethau Cynulliad Cenedlaethol Cymru o dan yr adran hon i Weinidogion Cymru yn rhinwedd paragraff 30 o Atodlen 11 i Ddeddf Llywodraeth Cymru 2006 (“Deddf 2006”) (p.32). Mae’r weithdrefn yn Neddf 2003 ar gyfer gwneud y Gorchymyn wedi ei haddasu gan Dabl 1 o baragraff 35(3) o Atodlen 11 i Ddeddf 2006 fel bod rhaid i Orchymyn a wneir o dan adran 29(3) o Ddeddf 2003 gael ei osod gerbron Cynulliad Cenedlaethol Cymru a’i gymeradwyo ganddo drwy benderfyniad.