Rheoliadau Plant (Perfformiadau a Gweithgareddau) (Cymru) 2015

RHAN 6 Trwyddedau i berfformio a chymryd rhan mewn gweithgareddau dramor

Ffurf trwydded

32.   Rhaid i drwydded a roddir o dan adran 25 o Ddeddf 1933 gynnwys—

(a) enw’r plentyn;

(b) enw’r ceisydd;

(c) manylion yr ymrwymiad y mae’r plentyn yn mynd dramor i’w gyflawni;

(d) y dyddiad y rhoddir y drwydded a’r dyddiad y daw i ben;

(e) manylion unrhyw warant a roddir gan y ceisydd yn unol ag adran 25(6) o Ddeddf 1933;

(f) manylion unrhyw amodau y bernir eu bod yn angenrheidiol ar gyfer rhoi’r drwydded; ac

(g) llofnod y person sy’n rhoi’r drwydded.

Yr wybodaeth sydd i’w darparu i swyddog consylaidd

33.   Pan fo trwydded o dan adran 25 o Ddeddf 1933 wedi ei rhoi, ei hadnewyddu neu ei hamrywio, y manylion y mae’n rhaid i’r ynad heddwch eu hanfon at Weinidogion Cymru er mwyn eu trosglwyddo i’r priod swyddog consylaidd yw—

(a) enw a chyfeiriad y plentyn;

(b) dyddiad geni, man geni a chenedligrwydd y plentyn;

(c) enw a chyfeiriad y ceisydd am y drwydded;

(d) enw a chyfeiriad rhiant y plentyn;

(e) manylion yr ymrwymiad, gan gynnwys ym mha le ac am ba mor hir y mae’r plentyn i gymryd rhan;

(f) copi o’r contract cyflogaeth neu ddogfen arall sy’n dangos ar ba delerau ac amodau y mae’r plentyn wedi ei gymryd ymlaen; ac

(g) copi o’r drwydded.