Rheoliadau Asesu’r Effeithiau Amgylcheddol (Amaethyddiaeth) (Cymru) 2017

RHAN 1 Darpariaethau cyffredinol

Enwi, cymhwyso a chychwyn

1.—( 1) Enw’r Rheoliadau hyn yw Rheoliadau Asesu’r Effeithiau Amgylcheddol (Amaethyddiaeth) (Cymru) 2017.

(2) Mae’r Rheoliadau hyn yn gymwys o ran Cymru.

(3) Daw’r Rheoliadau hyn i rym ar 16 Mai 2017.

Dehongli

2.—( 1) Yn y Rheoliadau hyn—

mae i “amaethyddiaeth” yr un ystyr ag “agriculture” yn adran 109(3) o Ddeddf Amaethyddiaeth 1947(1);

ystyr “cydsyniad” (“consent”) yw cydsyniad a roddir o dan reoliad 15;

ystyr “cyrff ymgynghori” (“consultation bodies”) yw—

(a)

Corff Adnoddau Naturiol Cymru; neu

(b)

unrhyw awdurdod cyhoeddus arall, corff statudol neu sefydliad arall y mae Gweinidogion Cymru yn ystyried bod ganddo unrhyw fuddiant yn y prosiect neu sy’n dal unrhyw wybodaeth a allai fod yn berthnasol i’r prosiect;

ystyr “datganiad amgylcheddol” (“environmental statement”) yw datganiad fel y’i disgrifir yn rheoliad 11;

ystyr “Gwladwriaeth AEE” (“EEA State”) yw Aelod-wladwriaeth, Norwy, Gwlad yr Iâ neu Liechtenstein;

ystyr “gwybodaeth amgylcheddol ychwanegol” (“additional environmental information”) yw unrhyw wybodaeth ychwanegol sy’n ofynnol o dan reoliad 12(1);

ystyr “y Gyfarwyddeb AEA” (“the EIA Directive”) yw Cyfarwyddeb 2011/92/EU Senedd Ewrop a’r Cyngor dyddiedig 13 Rhagfyr 2011 ar asesu effeithiau prosiectau cyhoeddus a phreifat penodol ar yr amgylchedd(2);

ystyr “y Gyfarwyddeb Cynefinoedd” (“the Habitats Directive”) yw Cyfarwyddeb y Cyngor 92/43/EEC ar gadwraeth cynefinoedd naturiol a ffawna a fflora gwyllt(3);

ystyr “penderfyniad sgrinio” (“screening decision”) yw penderfyniad sydd wedi ei wneud, neu y bernir ei fod wedi ei wneud, gan Weinidogion Cymru o dan reoliad 7(1) neu (7);

ystyr “prosiect” (“project”) yw—

(a)

cyflawni gwaith adeiladu neu waith gosod neu gynlluniau eraill; neu

(b)

ymyriadau eraill yn y tir naturiol oddi amgylch a’r tirlun;

ystyr “prosiect ailstrwythuro” (“restructuring project”) yw prosiect i ailstrwythuro daliadau tir gwledig;

ystyr “prosiect ar dir lled-naturiol a/neu dir heb ei drin” (“project on semi-natural and/or uncultivated land”) yw prosiect i gynyddu cynhyrchiant amaethyddol ardal o dir lled-naturiol a/neu dir heb ei drin ac mae’n cynnwys prosiectau i gynyddu cynhyrchiant amaethyddol tir o’r fath i lefel islaw’r norm;

ystyr “prosiect sylweddol” (“significant project”) yw prosiect ar dir lled-naturiol a/neu dir heb ei drin neu brosiect ailstrwythuro y mae Gweinidogion Cymru wedi penderfynu, neu y bernir eu bod wedi penderfynu, ei fod yn debygol o gael effeithiau sylweddol ar yr amgylchedd yn unol â rheoliad 7(1) neu (7);

ystyr “prosiect trawsffiniol” (“transborder project”) yw prosiect ar dir lled-naturiol a/neu dir heb ei drin neu brosiect ailstrwythuro lle mae’r tir perthnasol wedi ei leoli’n rhannol yng Nghymru ac yn rhannol yn Lloegr;

ystyr “y Rheoliadau Cynefinoedd” (“the Habitats Regulations”) yw Rheoliadau Gwarchod Cynefinoedd a Rhywogaethau 2010(4);

ystyr “safle Ewropeaidd” (“European site”) yw safle a grybwyllir ym mharagraff (1)(a), (b), (d) neu (e) o reoliad 8 o’r Rheoliadau Cynefinoedd;

ystyr “tir lled-naturiol” (“semi-natural land”) yw tir sy’n cynnwys llai na 25% o rywogaethau amaethyddol wedi eu gwella sy’n arwydd bod y tir yn cael ei drin;

ystyr “y tir perthnasol” (“the relevant land”) yw’r tir lle y mae’r prosiect i’w gyflawni (neu lle y’i cyflawnwyd).

(2) Mae i’r ymadroddion eraill a ddefnyddir yn y Rheoliadau hyn ac yn y Gyfarwyddeb AEA neu yn y Gyfarwyddeb Cynefinoedd yr un ystyron yn y Rheoliadau hyn ag sydd iddynt yn y Gyfarwyddeb berthnasol.

(3) Rhaid gwneud neu gyflwyno pob cais, hysbysiad, sylw, ceisiad, cymeradwyaeth a chytundeb o dan y Rheoliadau hyn yn ysgrifenedig.

(4) Mae “ysgrifenedig” ym mharagraff (3), ac eithrio pan fo’n gymwys i hysbysiadau o dan reoliad 24 neu 26, yn cynnwys cyfathrebiad electronig o fewn ystyr “electronic communication” yn Neddf Cyfathrebiadau Electronig 2000(5), ond caiff hysbysiadau y mae’n ofynnol i Weinidogion Cymru eu cyflwyno i unrhyw berson ond gael eu cyflwyno drwy gyfrwng cyfathrebiad electronig os yw’r derbynnydd arfaethedig—

(a) wedi defnyddio’r dull hwnnw o gyfathrebu electronig wrth gyfathrebu â Gweinidogion Cymru mewn cysylltiad ag unrhyw ddarpariaeth yn y Rheoliadau hyn, neu

(b) wedi mynegi fel arall bod y dull hwnnw o gyfathrebu electronig yn fodd y gall personau ei ddefnyddio i gyfathrebu ag ef.

(5) Caniateir i hysbysiadau neu ddogfennau, y mae’n ofynnol neu yr awdurdodir eu cyflwyno, eu hanfon neu eu rhoi o dan y Rheoliadau hyn, gael eu hanfon drwy’r post.

Cymhwyso’r Rheoliadau

3.—( 1) Mae’r Rheoliadau hyn yn gymwys i unrhyw brosiect ar dir lled-naturiol a/neu dir heb ei drin neu brosiect ailstrwythuro, oni bai ei fod yn esempt yn unol â pharagraff (2) neu (3).

(2) Nid yw’r Rheoliadau hyn yn gymwys i brosiect ar dir lled-naturiol a/neu dir heb ei drin neu brosiect ailstrwythuro os yw—

(a) yn brosiect a grybwyllir yn rheoliad 3(2) o Reoliadau Asesu’r Effaith Amgylcheddol (Coedwigaeth) (Cymru a Lloegr) 1999(6);

(b) yn ddatblygiad y mae Rheoliadau Cynllunio Gwlad a Thref (Asesu’r Effeithiau Amgylcheddol) (Cymru) 2017(7) yn gymwys iddo;

(c) yn cyflawni gwaith gwella gan gorff draenio o fewn ystyr Rheoliadau Asesu Effeithiau Amgylcheddol (Gwaith Gwella Draenio Tir) 1999(8);

(d) yn brosiect perthnasol o fewn ystyr rheoliad 3(2) a (3) o Reoliadau Adnoddau Dŵr (Asesu Effeithiau Amgylcheddol) (Cymru a Lloegr) 2003(9);

(e) yn tynnu gwrych ymaith fel y caniateir gan reoliad 5(1) o Reoliadau Gwrychoedd 1997(10); neu

(f) yn waith cyfyngedig, gan gynnwys codi unrhyw adeilad neu ffens, neu godi unrhyw waith arall, y mae cydsyniad yn ofynnol ar ei gyfer o dan adran 38 o Ddeddf Tiroedd Comin 2006(11).

(3) Mae prosiect yn esempt o dan y paragraff hwn i’r graddau y mae Gweinidogion Cymru yn cyfarwyddo, yn unol ag Erthygl 2(4) o’r Gyfarwyddeb AEA, ei fod yn esempt rhag rheoliadau 4 i 33 o’r Rheoliadau hyn.

(4) Yn achos prosiect y mae Gweinidogion Cymru yn penderfynu ei fod yn debygol o gael effaith sylweddol ar safle Ewropeaidd (naill ai ar ei ben ei hun neu ar y cyd â phrosiectau eraill), dim ond i’r graddau y sicrheir cydymffurfedd â’r Gyfarwyddeb Cynefinoedd mewn perthynas â’r prosiect y mae’r pŵer i gyfarwyddo bod y prosiect yn esempt o dan baragraff (3) yn arferadwy.

(5) Pa fo Gweinidogion Cymru yn bwriadu dyroddi cyfarwyddyd o dan baragraff (3), rhaid iddynt—

(a) ystyried a fyddai unrhyw fath arall o asesiad o’r prosiect yn briodol; a

(b) tynnu sylw’r cyhoedd at—

(i) yr wybodaeth a ystyriwyd wrth ddyroddi’r cyfarwyddyd a’r rhesymau dros wneud hynny, a

(ii) yr wybodaeth a gafwyd o unrhyw asesiad o’r prosiect o dan is-baragraff (a).

RHAN 2 Sgrinio

Y gofyniad am benderfyniad sgrinio

4.—( 1) Ni chaiff person ddechrau neu gyflawni prosiect ar dir lled-naturiol a/neu dir heb ei drin oni bai ei fod yn gyntaf wedi cael penderfyniad sgrinio sy’n rhoi caniatâd i’r prosiect fynd yn ei flaen.

(2) Ni chaiff person ddechrau neu gyflawni prosiect ailstrwythuro sydd o faint sy’n hafal i’r trothwy cymwys (a gyfrifir yn unol â rheoliad 5) neu’n uwch na hynny oni bai ei fod yn gyntaf wedi cael penderfyniad sgrinio sy’n rhoi caniatâd i’r prosiect fynd yn ei flaen.

Trothwyon

5.—( 1) Mae’r rheoliad hwn yn darparu’r dull ar gyfer canfod a yw maint prosiect ailstrwythuro yn hafal i’r trothwy cymwys neu’n uwch na’r trothwy hwnnw.

(2) Mae’r trothwy ar gyfer math o brosiect ailstrwythuro a bennir yng ngholofn 1 o Atodlen 1 wedi ei nodi yng ngholofn 2 neu 3.

(3) Mae paragraffau (4) a (5) yn gymwys pan fo prosiect ailstrwythuro ond yn cynnwys un o’r mathau o brosiectau ailstrwythuro a bennir yng ngholofn 1 yn unig.

(4) Pan fo prosiect ailstrwythuro i’w gyflawni yn gyfan gwbl y tu allan i ardal sensitif, y trothwy sy’n gymwys iddo yw’r trothwy a bennir ar gyfer y math hwnnw o brosiect ailstrwythuro yng ngholofn 2.

(5) Pan fo prosiect ailstrwythuro, neu unrhyw ran ohono, i’w gyflawni neu ei chyflawni mewn ardal sensitif, y trothwy sy’n gymwys iddo yw’r trothwy a bennir ar gyfer y math hwnnw o brosiect ailstrwythuro yng ngholofn 3.

(6) Pan fo prosiect ailstrwythuro wedi ei ffurfio o fwy nag un o’r mathau o brosiect ailstrwythuro a bennir yng ngholofn 1—

(a) rhaid i bob rhan berthnasol o’r prosiect ailstrwythuro gael ei asesu er mwyn canfod y trothwy sy’n gymwys i’r rhan honno, a

(b) os yw unrhyw ran berthnasol o’r prosiect ailstrwythuro yn hafal i’r trothwy sy’n gymwys i’r rhan honno neu’n uwch na’r trothwy hwnnw, yna mae’r prosiect ailstrwythuro cyfan i’w drin fel pe bai ei faint yn hafal i’r trothwy sy’n gymwys iddo neu’n uwch na’r trothwy hwnnw.

(7) Yn y rheoliad hwn ystyr “ardal sensitif” (“sensitive area”) yw—

(a) tir yr hysbysir o dan adran 28 o Ddeddf Bywyd Gwyllt a Chefn Gwlad 1981(12) ei fod yn safle o ddiddordeb gwyddonol arbennig;

(b) eiddo sy’n ymddangos ar Restr Treftadaeth y Byd a gedwir o dan erthygl 11(2) o Gonfensiwn 1972 UNESCO er diogelu Treftadaeth Ddiwylliannol a Naturiol y Byd(13);

(c) safle Ewropeaidd o fewn ystyr “European site” yn rheoliad 8 o Reoliadau Gwarchod Cynefinoedd a Rhywogaethau 2010(14);

(d) ardal o harddwch naturiol eithriadol a ddynodwyd felly drwy Orchymyn a wnaed o dan adran 82 o Ddeddf Cefn Gwlad a Hawliau Tramwy 2000 (dynodi ardaloedd o harddwch naturiol eithriadol) ac a gadarnhawyd yn briodol gan Weinidogion Cymru o dan adran 83(3) o’r Ddeddf honno(15);

(e) Parc Cenedlaethol o fewn ystyr “National Park” yn Neddf Parciau Cenedlaethol a Mynediad i Gefn Gwlad 1949(16);

(f) heneb gofrestredig o fewn ystyr “scheduled monument” yn Neddf Henebion Hynafol ac Ardaloedd Archaeolegol 1979(17).

Cais am benderfyniad sgrinio

6.—( 1) Rhaid i gais am benderfyniad sgrinio—

(a) cael ei wneud i Weinidogion Cymru;

(b) cynnwys plan sy’n ddigonol i adnabod y tir perthnasol;

(c) cynnwys disgrifiad cryno o natur, maint a diben y prosiect a’i effeithiau posibl ar yr amgylchedd;

(d) cynnwys unrhyw wybodaeth arall y gall y ceisydd ddymuno ei darparu neu unrhyw sylwadau eraill y gall ddymuno eu cyflwyno, megis disgrifiad o unrhyw un neu ragor o nodweddion y prosiect a/neu fesurau a ragwelir i osgoi neu atal yr hyn a allai fel arall wedi bod yn effeithiau andwyol sylweddol ar yr amgylchedd.

(2) Os yw Gweinidogion Cymru yn ystyried nad oes ganddynt ddigon o wybodaeth i wneud penderfyniad sgrinio, cânt ofyn i’r ceisydd ddarparu unrhyw wybodaeth ychwanegol sy’n ofynnol ganddynt.

(3) Rhaid i Weinidogion Cymru hysbysu’r ceisydd ynghylch y dyddiad y daw’r cais am benderfyniad sgrinio i’w llaw.

Y penderfyniad sgrinio

7.—( 1) Rhaid i Weinidogion Cymru, yn unol â pharagraff (2) a’r meini prawf dethol yn Atodlen 2, benderfynu a yw prosiect, neu ran ohono, yn brosiect sylweddol.

(2) Os yw Gweinidogion Cymru yn penderfynu bod prosiect, neu ran ohono, yn debygol o gael effeithiau sylweddol ar safle Ewropeaidd, naill ai ar ei ben ei hun neu ar y cyd â phrosiectau eraill, ac nad yw’r prosiect yn uniongyrchol gysylltiedig â rheoli’r safle nac yn angenrheidiol i’w reoli, mae’r prosiect i gael ei drin fel pe bai’n brosiect sylweddol.

(3) Cyn gwneud penderfyniad sgrinio, caiff Gweinidogion Cymru ymgynghori ag unrhyw un neu ragor o’r cyrff ymgynghori.

(4) Rhaid i Weinidogion Cymru wneud penderfyniad sgrinio o fewn 35 o ddiwrnodau i—

(a) y dyddiad yn rheoliad 6(3); neu

(b) y dyddiad y bydd Gweinidogion Cymru yn cael unrhyw wybodaeth ychwanegol y maent wedi gofyn amdani o dan reoliad 6(2),

p’un bynnag yw’r diweddaraf.

(5) Caniateir estyn y cyfnod ym mharagraff (4) gyda chytundeb y ceisydd.

(6) Ar ôl gwneud penderfyniad sgrinio, rhaid i Weinidogion Cymru—

(a) hysbysu’r ceisydd ohono o fewn y cyfnod sy’n gymwys o dan baragraff (4), gan roi’r rhesymau;

(b) ei nodi mewn cofrestr, sef cofrestr y mae’n rhaid i’r cyhoedd gael mynediad iddi ar bob adeg resymol; ac

(c) hysbysu unrhyw un neu ragor o’r cyrff ymgynghori y maent yn ystyried a all ddymuno cael gwybod am y penderfyniad sgrinio.

(7) Os bydd Gweinidogion Cymru yn methu â gwneud penderfyniad sgrinio neu’n methu â chyflwyno hysbysiad amdano o fewn y cyfnod ym mharagraff (4), caiff y ceisydd hysbysu Gweinidogion Cymru ei fod yn bwriadu trin y methiant hwnnw fel penderfyniad bod y prosiect yn brosiect sylweddol.

(8) Pan fo’r ceisydd wedi hysbysu Gweinidogion Cymru yn unol â pharagraff (6), bernir bod Gweinidogion Cymru wedi penderfynu bod y prosiect yn brosiect sylweddol ar ddyddiad yr hysbysiad hwnnw.

(9) Ar ôl i Weinidogion Cymru wneud penderfyniad, neu ar ôl y bernir eu bod wedi gwneud penderfyniad, fod y prosiect yn brosiect sylweddol—

(a) os yw Gweinidogion Cymru yn cael gwybodaeth ychwanegol neu sylwadau ychwanegol; a

(b) os yw Gweinidogion Cymru yn penderfynu, o ganlyniad i’r wybodaeth neu’r sylwadau, nad yw’r prosiect yn brosiect sylweddol,

rhaid i Weinidogion Cymru gymryd yr holl gamau a restrir ym mharagraff (6) mewn cysylltiad â’r penderfyniad hwnnw.

(10) Bydd y penderfyniad sgrinio yn peidio â chael effaith os nad yw’r prosiect y mae’n ymwneud ag ef yn dechrau o fewn cyfnod o 3 blynedd o’r dyddiad—

(a) yr hysbysir y ceisydd am y penderfyniad sgrinio; neu

(b) y bernir bod y penderfyniad sgrinio wedi ei wneud o dan baragraff (7).

RHAN 3 Cydsyniad

Y gofyniad am gydsyniad

8.   Rhaid i berson gael cydsyniad Gweinidogion Cymru cyn dechrau neu gyflawni prosiect sylweddol.

Barnau cwmpasu

9.—( 1) Ar ôl cael penderfyniad sgrinio bod prosiect yn brosiect sylweddol, ond cyn gwneud cais am gydsyniad, caiff y ceisydd ofyn i Weinidogion Cymru roi eu barn ar ba wybodaeth y mae’n rhaid ei chynnwys yn y datganiad amgylcheddol (“barn gwmpasu”).

(2) Os yw’r ceisydd yn gofyn am farn gwmpasu, rhaid i Weinidogion Cymru ymgynghori â’r ceisydd ac unrhyw rai o’r cyrff ymgynghori sy’n briodol yn eu barn hwy, cyn rhoi eu barn.

(3) Os yw Gweinidogion Cymru yn ystyried nad oes ganddynt ddigon o wybodaeth i roi barn gwmpasu, cânt ofyn i’r ceisydd ddarparu unrhyw wybodaeth ychwanegol y mae arnynt ei hangen o fewn 28 o ddiwrnodau i’r dyddiad y bydd Gweinidogion Cymru yn cael y ceisiad am y farn gwmpasu.

(4) Rhaid i Weinidogion Cymru roi’r farn gwmpasu i’r ceisydd o fewn 5 wythnos—

(a) i’r dyddiad y cawsant y farn gwmpasu; neu

(b) pan fo’n gymwys, i’r dyddiad y cawsant yr wybodaeth ychwanegol o dan baragraff (3).

Darparu gwybodaeth

10.—( 1) Mae’r rheoliad hwn yn gymwys—

(a) os yw Gweinidogion Cymru yn ymgynghori â chorff ymgynghori o dan reoliad 9(2); neu

(b) os yw corff ymgynghori yn cael ceisiad am wybodaeth gan berson sy’n bwriadu gwneud cais am gydsyniad.

(2) Pan fo’r rheoliad hwn yn gymwys, rhaid i’r corff ymgynghori—

(a) penderfynu a oes ganddo yn ei feddiant unrhyw wybodaeth y mae’n ystyried ei fod yn berthnasol i lunio’r datganiad amgylcheddol; a

(b) yn ddarostyngedig i baragraffau (3) a (4), sicrhau bod yr wybodaeth honno ar gael i Weinidogion Cymru neu’r ceisydd o fewn 28 o ddiwrnodau i ddyddiad yr ymgynghoriad neu’r ceisiad, pa un bynnag sydd gynharaf.

(3) Caiff corff ymgynghori godi ffi resymol ar y ceisydd am ddarparu gwybodaeth o dan baragraff (2)(b), i adlewyrchu’r gost o drefnu bod yr wybodaeth berthnasol ar gael.

(4) Nid yw paragraff (2)(b) yn ei gwneud yn ofynnol i gorff ymgynghori ryddhau i’r ceisydd unrhyw wybodaeth—

(a) y caiff wrthod ei datgelu o dan reoliad 12(1) o Reoliadau Gwybodaeth Amgylcheddol 2004(18); neu

(b) y’i rhwystrir rhag ei datgelu gan reoliad 13(1) o’r Rheoliadau hynny.

(5) Os nad yw corff ymgynghori yn awdurdod cyhoeddus o fewn ystyr “public authority” yn rheoliad 2(2) o Reoliadau Gwybodaeth Amgylcheddol 2004, mae paragraff (4) yn gymwys fel pe bai’n awdurdod cyhoeddus o’r fath.

Y cais am gydsyniad a’r datganiad amgylcheddol

11.—( 1) Rhaid i gais am gydsyniad—

(a) cynnwys datganiad amgylcheddol; a

(b) cael ei wneud i Weinidogion Cymru.

(2) Mae datganiad amgylcheddol yn ddatganiad sy’n cynnwys o leiaf—

(a) disgrifiad o’r prosiect, sef gwybodaeth ynghylch y safle, y dyluniad, maint y prosiect a’i nodweddion perthnasol eraill;

(b) disgrifiad o effeithiau sylweddol tebygol y prosiect ar yr amgylchedd;

(c) disgrifiad o nodweddion y prosiect a/neu fesurau a ragwelir er mwyn osgoi, atal neu leihau effeithiau andwyol sylweddol tebygol ar yr amgylchedd, a gwrthbwyso’r effeithiau hynny os yw’n bosibl;

(d) disgrifiad o’r dewisiadau amgen rhesymol a astudiwyd gan y ceisydd, sy’n berthnasol i’r prosiect a’i nodweddion penodol, a mynegiad o’r prif resymau dros y dewis a wnaed, gan ystyried effeithiau sylweddol y prosiect ar yr amgylchedd;

(e) crynodeb annhechnegol o’r wybodaeth y cyfeirir ati yn is-baragraffau (a) i (d); ac

(f) unrhyw wybodaeth ychwanegol a bennir yn Atodlen 3 sy’n berthnasol i nodweddion penodol y prosiect penodol neu’r math o brosiect ac i’r nodweddion amgylcheddol sy’n debygol o gael eu heffeithio’n sylweddol.

(3) Rhaid i’r datganiad amgylcheddol—

(a) cael ei lunio ar ran y ceisydd gan bersonau sydd, ym marn Gweinidogion Cymru, yn meddu ar arbenigedd digonol i sicrhau bod y datganiad yn gyflawn ac yn safonol;

(b) cynnwys datganiad gan neu ar ran y ceisydd neu’r apelydd sy’n disgrifio arbenigedd y person a luniodd y datganiad amgylcheddol;

(c) pan fo barn gwmpasu wedi ei dyroddi yn unol â rheoliad 9, fod yn seiliedig ar y farn gwmpasu ddiweddaraf a ddyroddwyd (i’r graddau y mae’r prosiect yn parhau i fod yr un prosiect yn ei hanfod â’r prosiect a fu’n destun y farn honno);

(d) cynnwys yr wybodaeth sy’n rhesymol ofynnol ar gyfer dod i gasgliad rhesymedig ynghylch effeithiau sylweddol y prosiect ar yr amgylchedd, gan roi sylw i’r wybodaeth gyfredol a’r dulliau asesu cyfredol; ac

(e) rhoi sylw i’r canlyniadau sydd ar gael o asesiadau amgylcheddol perthnasol eraill sy’n ofynnol o dan ddeddfwriaeth yr UE neu unrhyw ddarpariaeth arall mewn deddfwriaeth ddomestig, gyda’r nod o osgoi dyblygu asesiadau.

(4) Ar ôl cael y cais am gydsyniad, rhaid i Weinidogion Cymru—

(a) anfon copi o’r cais i unrhyw un neu ragor o’r cyrff ymgynghori sy’n briodol yn eu barn hwy, a’u hysbysu y cânt gyflwyno sylwadau o fewn 6 wythnos i’r dyddiad y cawsant y cais; a

(b) cyhoeddi, mewn papur newydd sy’n cylchredeg yn ardal leol y tir perthnasol ac ar wefan Llywodraeth Cymru, hysbysiad—

(i) yn datgan bod y cais wedi ei wneud;

(ii) yn pennu cyfeiriad lle gellir gweld copïau o’r cais yn rhad ac am ddim, a lle caniateir i gopïau o’r cais gael eu gwneud (y caniateir i ffi resymol gael ei chodi amdanynt), ar bob adeg resymol am 6 wythnos o’r dyddiad y cyhoeddir yr hysbysiad;

(iii) yn datgan y caiff sylwadau ar effeithiau amgylcheddol tebygol y prosiect eu cyflwyno yn ysgrifenedig i Weinidogion Cymru yn y cyfeiriad a bennir o dan baragraff (ii) am gyfnod o 6 wythnos gan ddechrau â’r dyddiad y cyhoeddir yr hysbysiad;

(iv) yn datgan, os rhoddir cydsyniad, y bydd yn ddarostyngedig i’r amodau yn rheoliad 17(2), ac i unrhyw amodau eraill sy’n briodol ym marn Gweinidogion Cymru; a

(v) yn datgan, pan fo’n berthnasol, pa un o Wladwriaethau’r AEE, aelodau’r cyhoedd y mae a wnelo’r cais â hwy yn y Wladwriaeth AEE honno, a’r cyrff ymgynghori yr ymgynghorir â hwy ynglŷn â’r cais.

Gwybodaeth ychwanegol

12.—( 1) Os bydd Gweinidogion Cymru, ar ôl cydymffurfio â rheoliad 11(4), yn penderfynu y dylai datganiad, a gynhwyswyd gyda chais am gydsyniad, sy’n honni ei fod yn ddatganiad amgylcheddol, gynnwys gwybodaeth ychwanegol er mwyn bod yn ddatganiad amgylcheddol, rhaid i Weinidogion Cymru hysbysu’r ceisydd am yr wybodaeth ychwanegol sy’n ofynnol, a rhaid i’r ceisydd ddarparu’r wybodaeth honno i Weinidogion Cymru o fewn 28 o ddiwrnodau o gael y fath hysbysiad (“gwybodaeth amgylcheddol ychwanegol”).

(2) Rhaid i Weinidogion Cymru—

(a) anfon copi o’r wybodaeth amgylcheddol ychwanegol i unrhyw rai o’r cyrff ymgynghori y maent yn ystyried sy’n briodol, a

(b) hysbysu’r cyrff ymgynghori y cânt gyflwyno sylwadau o fewn 28 o ddiwrnodau i’r dyddiad y daw’r wybodaeth ychwanegol i’w llaw.

(3) Rhaid i Weinidogion Cymru gyhoeddi, mewn papur newydd sy’n cylchredeg yn ardal leol y tir perthnasol ac ar wefan Llywodraeth Cymru, hysbysiad—

(a) yn cyfeirio at y cais y mae’r wybodaeth amgylcheddol ychwanegol yn ymwneud ag ef a’r dyddiad y gwnaed y cais;

(b) yn datgan bod yr wybodaeth amgylcheddol ychwanegol wedi dod i law;

(c) yn pennu cyfeiriad lle gellir gweld copïau o’r wybodaeth amgylcheddol ychwanegol yn rhad ac am ddim, a lle caniateir i gopïau o’r cais gael eu gwneud (ac y caniateir i ffi resymol gael ei chodi amdanynt) ar bob adeg resymol am 28 o ddiwrnodau o’r dyddiad y cyhoeddir yr hysbysiad; a

(d) yn datgan y caniateir i sylwadau mewn perthynas â’r wybodaeth amgylcheddol ychwanegol gael eu cyflwyno yn ysgrifenedig i Weinidogion Cymru yn y cyfeiriad a bennir o dan is-baragraff (c) am gyfnod o 28 o ddiwrnodau yn dechrau â’r dyddiad y cyhoeddir yr hysbysiad.

Y weithdrefn pan allai prosiect sylweddol yng Nghymru effeithio ar Wladwriaeth AEE arall

13.—( 1) Cyn gynted â phosibl ar ôl cael cais am gydsyniad ar gyfer prosiect sylweddol, rhaid i Weinidogion Cymru ystyried a yw’r prosiect hwnnw hefyd yn debygol o gael effeithiau sylweddol ar yr amgylchedd mewn Gwladwriaeth AEE arall.

(2) Os yw Gweinidogion Cymru yn ystyried bod prosiect yn debygol o gael effeithiau sylweddol yn unol â pharagraff (1), neu os yw Gwladwriaeth AEE y mae’r prosiect yn debygol o gael effeithiau sylweddol arni yn gofyn am hynny, rhaid i Weinidogion Cymru anfon i’r Wladwriaeth AEE honno—

(a) manylion natur a lleoliad y prosiect sylweddol;

(b) unrhyw wybodaeth sydd gan Weinidogion Cymru am yr effaith y mae’r prosiect yn debygol o gael ar y Wladwriaeth AEE honno;

(c) mynegiad ynghylch a yw Gweinidogion Cymru o blaid rhoi cydsyniad ar gyfer y prosiect a’r amodau tebygol y bydd y cydsyniad yn ddarostyngedig iddynt; a

(d) ceisiad bod y Wladwriaeth AEE yn rhoi mynegiad, o fewn amserlen resymol a bennir gan Weinidogion Cymru, pa un a yw’n dymuno cymryd rhan yn y weithdrefn o dan y Rheoliadau hyn.

(3) Os yw Gwladwriaeth AEE yn mynegi ei bod yn dymuno cymryd rhan yn y weithdrefn o dan y Rheoliadau hyn, rhaid i Weinidogion Cymru ddarparu’r canlynol i’r Wladwriaeth AEE honno—

(a) copi o’r cais am gydsyniad, y datganiad amgylcheddol ac unrhyw wybodaeth bellach y maent yn ystyried ei bod yn berthnasol i’r cais; a

(b) gwybodaeth am y weithdrefn o dan y Rheoliadau hyn.

(4) Yn unol ag Erthygl 6 o’r Gyfarwyddeb AEA, rhaid i Weinidogion Cymru—

(a) trefnu bod y dogfennau a’r wybodaeth ym mharagraffau (2) a (3) ar gael i’r awdurdodau y cyfeirir atynt yn Erthygl 6(1) o’r Gyfarwyddeb AEA ac aelodau’r cyhoedd y mae a wnelo’r cais â hwy yn nhiriogaeth y Wladwriaeth AEE; a

(b) sicrhau bod yr awdurdodau hynny ac aelodau’r cyhoedd y mae a wnelo’r cais â hwy yn cael cyfle i anfon at Weinidogion Cymru eu barn ar yr wybodaeth a’r dogfennau a ddarparwyd, o fewn cyfnod rhesymol cyn gwneud penderfyniad ynghylch rhoi cydsyniad.

(5) Yn unol ag Erthygl 7(4) o’r Gyfarwyddeb AEA, rhaid i Weinidogion Cymru—

(a) dechrau ymgynghori â’r Wladwriaeth AEE y mae a wnelo’r cais â hi ynghylch, ymhlith pethau eraill, effeithiau sylweddol posibl y prosiect ar amgylchedd y Wladwriaeth honno a’r mesurau a ragwelir i leihau neu ddileu’r effeithiau hynny; a

(b) ceisio cytuno gyda’r Wladwriaeth AEE y mae a wnelo’r cais â hi ar amserlen resymol ar gyfer yr ymgynghori hwnnw, y mae’n rhaid iddi gynnwys amser i ystyried unrhyw farnau sy’n dod i law o dan baragraff (4)(b).

Y weithdrefn pan allai prosiect sylweddol mewn Gwladwriaeth AEE arall effeithio ar Gymru

14.—( 1) Os yw Gweinidogion Cymru yn cael oddi wrth Wladwriaeth AEE arall wybodaeth a ryddhawyd yn unol ag Erthygl 7(1) o’r Gyfarwyddeb AEA mewn perthynas â phrosiect sylweddol yn y Wladwriaeth AEE honno, cyn y gwneir penderfyniad ar roi cydsyniad, rhaid i Weinidogion Cymru—

(a) trefnu i’r wybodaeth honno gael ei rhyddhau, o fewn cyfnod rhesymol, i’r cyrff ymgynghori ac unrhyw aelodau o’r cyhoedd y mae’r prosiect yn debygol o fod a wnelo â hwy;

(b) sicrhau bod y cyrff ymgynghori a’r aelodau o’r cyhoedd y cyfeirir atynt yn is-baragraff (a) yn cael cyfle i anfon eu barn ar yr wybodaeth a ddarparwyd o fewn y cyfnod y cytunir arno o dan baragraff (2)(b).

(2) Yn unol ag Erthygl 7(4) o’r Gyfarwyddeb AEA, rhaid i Weinidogion Cymru—

(a) dechrau ymgynghori â’r Wladwriaeth AEE y mae a wnelo’r cais â hi ynghylch effeithiau sylweddol posibl y prosiect ar yr amgylchedd yng Nghymru a’r mesurau a ragwelir i leihau neu ddileu’r effeithiau hynny; a

(b) ceisio cytuno gyda’r Wladwriaeth AEE, cyn y gwneir penderfyniad ynghylch cydsyniad, ar gyfnod rhesymol pryd y gellir anfon unrhyw farnau a geir o dan baragraff (1)(b) ymlaen at y Wladwriaeth AEE honno.

(3) Os yw Gwladwriaeth AEE arall wedi gwneud penderfyniad i roi neu i wrthod cydsyniad a’i bod wedi hysbysu Gweinidogion Cymru am y penderfyniad hwnnw, rhaid i Weinidogion Cymru ddwyn at sylw’r cyhoedd yr wybodaeth a gafwyd oddi wrth y Wladwriaeth AEE honno mewn perthynas â’r penderfyniad hwnnw.

Y penderfyniad cydsynio

15.—( 1) Wrth benderfynu a ddylid rhoi cydsyniad ar gyfer prosiect sylweddol, rhaid i Weinidogion Cymru ystyried—

(a) y datganiad amgylcheddol;

(b) unrhyw wybodaeth amgylcheddol ychwanegol;

(c) unrhyw sylwadau a ddaw i’w llaw o dan—

(i) rheoliad 11(4)(a);

(ii) rheoliad 12(2)(b) a (3)(d); neu

(iii) rheoliad 13(4)(b); a

(d) unrhyw effeithiau cymdeithasol neu economaidd a allai ddeillio o benderfyniad i wrthod cydsyniad ar gyfer y prosiect.

(2) Ni chaiff Gweinidogion Cymru ddod i benderfyniad o dan baragraff (1) tan y diweddaraf o’r canlynol—

(a) pan ddaw’r cyfnod yn yr hysbysiad o dan reoliad 11(4)(b)(iii) i ben;

(b) pan ddaw’r cyfnod o 28 o ddiwrnodau ar ôl y dyddiad yr anfonwyd unrhyw wybodaeth amgylcheddol ychwanegol i’r cyrff ymgynghori yn unol â rheoliad 12(2)(b) i ben;

(c) pan ddaw’r cyfnod o 28 o ddiwrnodau ar ôl y dyddiad y cyhoeddwyd yr hysbysiad o dan reoliad 12(3) i ben; a

(d) pan ddaw unrhyw gyfnod y cytunir arno gyda Gwladwriaeth AEE arall o dan reoliad 13(5)(b) i ben,

p’un bynnag yw’r diweddaraf.

Gofynion ychwanegol sy’n ymwneud â’r Rheoliadau Cynefinoedd

16.—( 1) Rhaid i Weinidogion Cymru beidio â rhoi cydsyniad ar gyfer prosiect a fyddai’n anghyfreithlon o dan reoliadau 41, 43 neu 45 o’r Rheoliadau Cynefinoedd.

(2) Ond nid yw hynny’n cynnwys unrhyw beth y rhoddwyd trwydded ar ei gyfer o dan reoliad 53 o’r Rheoliadau Cynefinoedd.

(3) Mae paragraffau (4) i (7) yn gymwys pan fo Gweinidogion Cymru yn penderfynu pa un ai i roi cydsyniad ar gyfer prosiect sy’n debygol o gael effaith sylweddol ar safle Ewropeaidd, pa un ai ar ei ben ei hun neu ar y cyd â phrosiect arall (y cyfeirir ato yn y paragraffau hynny fel “y prosiect”).

(4) Caiff Gweinidogion Cymru ond rhoi cydsyniad ar gyfer prosiect os ydynt wedi ystyried goblygiadau’r prosiect i’r safle Ewropeaidd (gan gynnwys asesiad priodol o’r goblygiadau gyda golwg ar amcanion cadwraeth y safle hwnnw) a’u bod wedi eu bodloni na fydd y prosiect yn effeithio’n andwyol ar gyfanrwydd y safle, oni bai bod paragraff (5) yn gymwys.

(5) Os yw Gweinidogion Cymru wedi eu bodloni bod rhaid i’r prosiect gael ei gyflawni am resymau hanfodol, sef bod hynny er budd cyhoeddus tra phwysig (a all, yn ddarostyngedig i baragraff (6), fod o natur cymdeithasol neu economaidd) ac nad oes unrhyw ddatrysiad amgen, cânt roi cydsyniad ar gyfer y prosiect er bod yr asesiad o’i oblygiadau o ran safle Ewropeaidd yn negyddol.

(6) Os yw’r safle Ewropeaidd yn lletya math o gynefin naturiol â blaenoriaeth neu rywogaeth â blaenoriaeth, rhaid i’r rhesymau ym mharagraff (5) fod naill ai—

(a) yn rhesymau sy’n ymwneud ag iechyd dynol, diogelwch y cyhoedd neu ganlyniadau buddiol o’r pwys mwyaf i’r amgylchedd, neu

(b) yn rhesymau eraill sydd, ym marn y Comisiwn Ewropeaidd, yn achos y safle dan sylw, yn rhesymau hanfodol, sef bod hynny er budd cyhoeddus tra phwysig.

(7) Os bydd Gweinidogion Cymru yn penderfynu rhoi cydsyniad ar gyfer prosiect yn unol â pharagraff (5), rhaid iddynt sicrhau bod unrhyw fesurau digolledu angenrheidiol yn cael eu cymryd i sicrhau bod cydlyniad cyffredinol Natura 2000(19) yn cael ei ddiogelu.

Yr amodau cydsynio

17.—( 1) Bydd cydsyniad a roddir yn unol â rheoliad 15 yn ddarostyngedig i—

(a) yr amodau ym mharagraff (2); a

(b) unrhyw amodau eraill y mae Gweinidogion Cymru yn ystyried eu bod yn briodol.

(2) Yr amodau sy’n ofynnol o dan baragraff (1)(a) yw—

(a) bod y cydsyniad yn methu oni ddechreuir y prosiect o fewn 1 flwyddyn i’r dyddiad y rhoddir y cydsyniad;

(b) bod y cydsyniad yn dod i ben oni chwblheir y prosiect o fewn 3 blynedd i’r dyddiad y rhoddir y cydsyniad; ac

(c) bod y cydsyniad ond yn awdurdodi’r prosiect a ddisgrifir yn y cais am gydsyniad yn unig, yn ddarostyngedig i unrhyw ddiwygiadau a gymeradwyir gan Weinidogion Cymru yn unol â pharagraff (4).

(3) Ar ôl i gydsyniad ddod i ben yn unol â pharagraff (2)(b), caiff Gweinidogion Cymru ei gwneud yn ofynnol i gais pellach am gydsyniad yn unol â pharagraff (5) gael ei wneud mewn cysylltiad ag unrhyw weithrediadau pellach neu ddefnyddiau pellach sy’n rhan o’r prosiect.

(4) Caiff Gweinidogion Cymru gymeradwyo unrhyw ddiwygiadau i’r cydsyniad pan fo ceisydd yn gofyn amdanynt, ond bydd yn ofynnol gwneud cais pellach am gydsyniad yn unol â pharagraff (5) i wneud unrhyw newid sylweddol i’r gweithrediadau awdurdodedig neu i’r defnyddiau awdurdodedig.

(5) Caniateir i geisiadau pellach am gydsyniad o dan baragraffau (3) a (4) fod yn ddarostyngedig i unrhyw un neu ragor o’r gofynion yn y Rheoliadau hyn y mae Gweinidogion Cymru yn ystyried eu bod yn briodol.

(6) Yn y rheoliad hwn, mae prosiect wedi ei—

“dechrau” (“commenced”) pan fo gweithred sylweddol wedi ei chyflawni mewn cysylltiad ag unrhyw un neu ragor o’r gwaith neu’r gweithiau a ganiateir gan y cydsyniad; a

“wedi ei gwblhau” (“completed”) pan fydd yr holl waith a ganiateir o dan y cydsyniad wedi ei gyflawni a bod yr holl newidiadau yn y defnydd o’r tir perthnasol, neu yn lefel y defnydd hwnnw, wedi eu rhoi ar waith.

Y weithdrefn yn dilyn penderfyniad cydsynio

18.   Ar ôl i Weinidogion Cymru wneud penderfyniad cydsynio mewn cysylltiad â phrosiect, rhaid iddynt—

(a) hysbysu’r ceisydd, unrhyw gyrff ymgynghori yr anfonwyd copïau o’r cais am gydsyniad atynt o dan reoliad 11(4)(a), unrhyw Wladwriaeth AEE a hysbyswyd o dan reoliad 13(2) ac unrhyw awdurdod neu berson a gyflwynodd farn o dan reoliad 13(4)(b), am—

(i) eu penderfyniad;

(ii) y rhesymau dros y penderfyniad;

(iii) unrhyw sylwadau a gyflwynwyd gan y cyhoedd;

(b) cyhoeddi hysbysiad mewn papur newydd yn yr ardal leol y mae’r tir perthnasol wedi ei leoli ynddi neu drwy unrhyw ddulliau eraill y maent yn ystyried eu bod yn rhesymol o dan yr amgylchiadau; ac

(c) sicrhau bod datganiad ar gael i’w weld gan y cyhoedd sy’n cynnwys y canlynol—

(i) y penderfyniad;

(ii) y rhesymau dros y penderfyniad;

(iii) disgrifiad o’r prif fesurau y mae’n rhaid eu cymryd er mwyn osgoi, lleihau neu wrthbwyso effeithiau andwyol sylweddol y prosiect;

(iv) crynodeb o unrhyw sylwadau a gyflwynwyd gan y cyhoedd; a

(v) gwybodaeth ynghylch yr hawl i herio’r penderfyniad a’r gweithdrefnau ar gyfer gwneud hynny.

Prosiectau trawsffiniol

19.—( 1) Yn achos prosiect trawsffiniol pan fo’r rhan fwyaf o’r tir perthnasol wedi ei leoli yng Nghymru, rhaid i Weinidogion Cymru ymgynghori â’r Ysgrifennydd Gwladol cyn—

(a) gwneud penderfyniad sgrinio o dan reoliad 7;

(b) rhoi barn gwmpasu o dan reoliad 9; neu

(c) rhoi neu wrthod cydsyniad o dan reoliad 15.

(2) Yn achos prosiect trawsffiniol pan fo’r rhan fwyaf o’r tir perthnasol wedi ei leoli yn Lloegr, yr unig Reoliadau y bydd y prosiect hwnnw’n ddarostyngedig iddynt yw’r Rheoliadau sy’n gymwys i’r prosiect yn Lloegr, ac eithrio pan gytunir fel arall o dan baragraff (4).

(3) Yn achos cais mewn cysylltiad â phrosiect trawsffiniol y byddai’r Rheoliadau hyn fel arall yn gymwys iddynt, os bydd yr Ysgrifennydd Gwladol yn gofyn am hynny, caiff Gweinidogion Cymru gytuno i’r cais fod yn ddarostyngedig i’r Rheoliadau sy’n gymwys i’r prosiect yn Lloegr yn unig.

(4) Os bydd Gweinidogion Cymru yn gofyn am hynny, a bod yr Ysgrifennydd Gwladol yn cytuno, bydd prosiect trawsffiniol y byddai paragraff (2) yn gymwys iddo fel arall yn ddarostyngedig i’r Rheoliadau hyn yn unig.

Adolygiad o benderfyniadau a chydsyniadau

20.   Mae Atodlen 4 yn gymwys os, ar ôl dyddiad—

(a) penderfyniad nad yw prosiect yn brosiect sylweddol, neu

(b) penderfyniad i roi cydsyniad ar gyfer prosiect,

daw’r tir perthnasol yn safle Ewropeaidd a bod Gweinidogion Cymru yn ystyried y byddai cyflawni neu gwblhau (o fewn ystyr “wedi ei gwblhau” yn rheoliad 17(6)) y prosiect yn debygol o gael effaith sylweddol ar y safle hwnnw ac na fyddai’n uniongyrchol gysylltiedig â rheoli’r safle nac yn angenrheidiol i’w reoli.

RHAN 4 Gorfodi

Trosedd cyflawni prosiect heb benderfyniad o dan y Rheoliadau hyn

21.—( 1) Mae’n drosedd dechrau neu gyflawni prosiect ar dir lled-naturiol a/neu dir heb ei drin, neu ddechrau neu gyflawni prosiect ailstrwythuro, yn groes i reoliadau 4 neu 8.

(2) Mae person sy’n euog o drosedd o dan baragraff (1) yn agored, o’i euogfarnu’n ddiannod, i ddirwy.

(3) Mewn unrhyw achos cyfreithiol o dan y rheoliad hwn sy’n ymwneud â phrosiect ar dir lled-naturiol a/neu dir heb ei drin, tybir bod unrhyw ddarn o dir y mae’r erlyniad yn honni ei fod yn dir heb ei drin neu’n dir lled-naturiol yn dir heb ei drin neu’n dir lled-naturiol, ac os felly rhaid i’r erlyniad brofi y tu hwnt i amheuaeth resymol fod y tir yn dir heb ei drin neu’n dir lled-naturiol.

Trosedd cyflawni gwaith yn groes i amod

22.—( 1) Mae’n drosedd cyflawni unrhyw weithgarwch yn groes i amod cydsyniad a roddir yn unol â’r Rheoliadau hyn.

(2) Mae person sy’n euog o drosedd o dan baragraff (1) yn agored, o’i euogfarnu’n ddiannod, i ddirwy.

Trosedd sicrhau penderfyniad drwy ddarparu gwybodaeth anwir

23.—( 1) Mae’n drosedd i unrhyw berson sydd, at ddiben sicrhau penderfyniad penodol ar gais a wnaed o dan y Rheoliadau hyn—

(a) yn fwriadol neu’n ddi-hid yn gwneud datganiad sy’n anwir neu’n gamarweiniol mewn manylyn perthnasol,

(b) gyda’r bwriad o dwyllo, yn defnyddio unrhyw ddogfen sy’n ffug neu’n gamarweiniol mewn manylyn perthnasol, neu

(c) gyda’r bwriad o dwyllo, yn cadw gwybodaeth berthnasol yn ôl.

(2) Mae person sy’n euog o drosedd o dan baragraff (1) yn agored—

(a) o’i euogfarnu’n ddiannod, i ddirwy heb fod yn uwch na’r uchafswm statudol; neu

(b) o’i euogfarnu ar dditiad, i ddirwy.

Hysbysiadau stop

24.—( 1) Os yw person wedi dechrau prosiect ar dir lled-naturiol a/neu dir heb ei drin neu brosiect ailstrwythuro, yn groes i reoliad 4 neu 8, caiff Gweinidogion Cymru gyflwyno hysbysiad yn gwahardd ar unwaith y cyfan neu ran o’r gwaith (“hysbysiad stop”).

(2) Caiff Gweinidogion Cymru gyflwyno hysbysiad stop i unrhyw berson y mae’n ymddangos iddynt—

(a) bod ganddo fuddiant yn y tir perthnasol; neu

(b) ei fod yn cyflawni prosiect ar dir lled-naturiol a/neu dir heb ei drin neu brosiect ailstrwythuro, yn groes i reoliad 4 neu 8.

Cosbau am fynd yn groes i hysbysiad stop

25.—( 1) Mae’n drosedd i berson fynd yn groes i hysbysiad stop, neu beri neu ganiatáu i berson arall fynd yn groes i hysbysiad stop.

(2) Mae person sy’n euog o drosedd o dan baragraff (1) yn agored—

(a) o’i euogfarnu’n ddiannod, i ddirwy heb fod yn uwch na’r uchafswm statudol; neu

(b) o’i euogfarnu ar dditiad, i ddirwy.

Hysbysiadau adfer

26.—( 1) Os yw person wedi cyflawni prosiect ar dir lled-naturiol a/neu dir heb ei drin neu brosiect ailstrwythuro, yn groes i reoliadau 4 neu 8, caiff Gweinidogion Cymru gyflwyno hysbysiad i’r person y mae’n ymddangos iddynt ei fod yn gyfrifol (“hysbysiad adfer”).

(2) Caiff hysbysiad adfer ei gwneud yn ofynnol i’r person—

(a) adfer y tir perthnasol, er boddhad Gweinidogion Cymru, i’r un cyflwr ag yr oedd cyn dechrau’r prosiect; neu

(b) cymryd y fath gamau eraill y mae Gweinidogion Cymru yn ystyried eu bod yn briodol i adfer y tir i gyflwr amgylcheddol da neu i safon y mae Gweinidogion Cymru yn ystyried ei bod yn rhesymol o dan yr amgylchiadau.

(3) Rhaid i hysbysiad adfer ddatgan y cyfnod y mae gofynion yr hysbysiad i’w cyflawni o’i fewn.

(4) Caiff Gweinidogion Cymru, ar unrhyw adeg ar ôl dyroddi hysbysiad adfer—

(a) diwygio telerau’r hysbysiad hwnnw;

(b) estyn y cyfnod o dan baragraff (3); neu

(c) terfynu’r hysbysiad hwnnw.

Y gosb am fynd yn groes i hysbysiad adfer

27.—( 1) Mae person sydd, heb esgus rhesymol, yn methu â chydymffurfio ag unrhyw un o ofynion hysbysiad adfer yn euog o drosedd.

(2) Mae person sy’n euog o drosedd o dan baragraff (1) yn agored, o’i euogfarnu’n ddiannod—

(a) i ddirwy; a

(b) os yw’r methiant i gydymffurfio yn parhau ar ôl dyddiad yr euogfarn, i ddirwy bellach nad yw’n fwy na £100 am bob diwrnod y mae’r methiant yn parhau.

Terfynau amser ar gyfer dwyn achosion cyfreithiol

28.—( 1) Caniateir dwyn achosion cyfreithiol am drosedd o dan y Rheoliadau hyn o fewn y cyfnod o 6 mis o’r dyddiad y daeth tystiolaeth, a oedd yn ddigonol ym marn yr erlynydd i gyfiawnhau’r achos cyfreithiol, yn hysbys iddo.

(2) Ond ni chaniateir cychwyn unrhyw achos o’r fath yn rhinwedd paragraff (1) fwy na 2 flynedd ar ôl i’r drosedd gael ei chyflawni.

(3) At ddibenion y rheoliad hwn—

(a) mae tystysgrif a lofnodwyd gan neu ar ran yr erlynydd ac sy’n datgan y dyddiad y cafodd wybod am dystiolaeth a oedd yn ddigonol yn ei farn ef i gyfiawnhau’r achos yn dystiolaeth ddigamsyniol o’r ffaith honno; a

(b) bernir bod tystysgrif sy’n datgan y mater hwnnw ac sy’n honni ei bod wedi ei llofnodi felly yn dystysgrif sydd wedi ei llofnodi felly oni phrofir i’r gwrthwyneb.

Pwerau mynediad a phwerau diofyn

29.—( 1) Caiff person a awdurdodir gan Weinidogion Cymru fynd ar unrhyw dir a’i arolygu, ar unrhyw adeg, at ddibenion—

(a) canfod pa un a yw rheoliad 4 neu 8 wedi eu torri;

(b) canfod pa un a oes trosedd o dan y Rheoliadau hyn wedi ei chyflawni mewn cysylltiad â’r tir hwnnw;

(c) cyflwyno hysbysiad stop neu hysbysiad adfer mewn cysylltiad â’r tir hwnnw; neu

(d) arfer swyddogaeth a restrir yn Atodlen 4.

(2) Caiff person a awdurdodir gan Weinidogion Cymru ac sydd â sail resymol dros amau bod person wedi cyflawni trosedd o dan reoliad 23—

(a) cael mynediad i unrhyw fangre sydd, neu y credir ei bod, wedi ei meddiannu gan, neu wedi ei feddu gan, y person y credir ei fod yn gyfrifol am gyflawni’r drosedd; a

(b) cymryd copïau o unrhyw gofnodion sy’n berthnasol i gyflawni’r drosedd a amheuir.

(3) Ond nid yw paragraff (2) yn gymwys i unrhyw fangre a ddefnyddir fel annedd breifat yn unig.

(4) Os nad oes unrhyw fesurau sy’n ofynnol gan hysbysiad adfer neu gan hysbysiad a gyflwynwyd o dan baragraff 5 o Atodlen 4 wedi eu cyflawni o fewn y cyfnod a bennir yn yr hysbysiad—

(a) caiff person a awdurdodir gan Weinidogion Cymru gael mynediad, ar adeg resymol, i’r tir y mae’r hysbysiad yn ymwneud ag ef a chyflawni’r mesurau hynny; a

(b) adennill yr holl dreuliau yr aed iddynt yn rhesymol wrth wneud hynny oddi wrth y person a enwir yn yr hysbysiad.

(5) At ddibenion canfod pa un a gyflawnwyd trosedd ar y tir neu mewn cysylltiad â’r tir, caiff person sy’n gweithredu yn unol â pharagraff (1) symud ymaith—

(a) samplau pridd;

(b) sbesimenau planhigion; neu

(c) samplau a gymerir o sbesimenau planhigion.

(6) Rhaid i berson a awdurdodir i gael mynediad i dir neu fangreoedd o dan y rheoliad hwn ddangos tystiolaeth ei fod wedi ei awdurdodi i gael mynediad i’r tir neu’r mangreoedd, os gofynnir iddo wneud hynny.

(7) Caiff person a awdurdodir i gael mynediad i dir neu fangreoedd o dan y rheoliad hwn ddod ag unrhyw bersonau eraill neu unrhyw gyfarpar y maent yn ystyried eu bod yn angenrheidiol gyda hwy.

(8) Rhaid i berson sy’n meddiannu tir neu fangre, neu sy’n meddu ar dir neu fangre, y mae person a awdurdodir o dan y rheoliad hwn wedi mynd arno neu arni, roi y fath gymorth y gall y person awdurdodedig hwnnw ofyn yn rhesymol amdano er mwyn ei alluogi i arfer unrhyw bŵer a roddir iddo gan y rheoliad hwn.

(9) Mae’n drosedd i berson—

(a) rhwystro neu atal yn fwriadol person sy’n gweithredu wrth arfer pŵer a roddir o dan y rheoliad hwn; neu

(b) methu â chydymffurfio, heb esgus rhesymol, â cheisiad a wnaed o dan baragraff (8).

(10) Mae person sy’n euog o drosedd o dan baragraff (9) yn agored, o’i euogfarnu’n ddiannod, i ddirwy.

RHAN 5 Apelau

Apelau

30.—( 1) Caniateir apelio i Weinidogion Cymru yn unol â’r rheoliad hwn yn erbyn—

(a) hysbysiad perthnasol; neu

(b) penderfyniad perthnasol.

(2) Caniateir cyflwyno apêl yn erbyn hysbysiad perthnasol ar y sail—

(a) nad oedd gan Weinidogion Cymru bŵer i gyflwyno’r hysbysiad perthnasol, neu nad oedd ganddynt bŵer i gynnwys amod ynddo;

(b) bod rhyw afreoleidd-dra, ddiffyg neu wall perthnasol wedi bod yn yr hysbysiad perthnasol, neu mewn cysylltiad ag ef; neu

(c) bod unrhyw un o ofynion yr hysbysiad yn afresymol.

(3) Caniateir i unrhyw un neu ragor o’r personau canlynol gyflwyno apêl yn erbyn penderfyniad perthnasol—

(a) y person a wnaeth gais am benderfyniad sgrinio y mae Gweinidogion Cymru wedi ei wneud, neu y bernir eu bod wedi ei wneud, fod prosiect yn brosiect sylweddol yn unol â rheoliad 7;

(b) y person a wnaeth gais am gydsyniad ar gyfer prosiect sylweddol ac y gwrthodwyd y cais hwnnw gan Weinidogion Cymru; neu

(c) person a hysbyswyd am benderfyniad o dan baragraff 3 o Atodlen 4.

(4) Rhaid i apêl a gyflwynir o dan baragraff (2) neu (3)—

(a) cael ei wneud yn ysgrifenedig yn y dull a’r ffurf a gyhoeddir gan Weinidogion Cymru;

(b) cynnwys manylion yr holl dystiolaeth y mae’r apelydd yn bwriadu dibynnu arni; ac

(c) dod i law Gweinidogion Cymru ddim hwyrach na 28 o ddiwrnodau ar ôl y dyddiad yr anfonodd Gweinidogion Cymru yr hysbysiad perthnasol, neu’r dyddiad y gwnaeth Gweinidogion Cymru y penderfyniad perthnasol y mae’r apêl yn ymwneud ag ef.

(5) Rhaid i’r apelydd ddatgan a yw’n dymuno i’r apêl gael ei hystyried a’i phenderfynu—

(a) ar sail sylwadau ysgrifenedig;

(b) mewn gwrandawiad llafar; neu

(c) drwy ymchwiliad lleol.

(6) Caiff Gweinidogion Cymru benodi person i arfer ar eu rhan, gyda thaliad neu hebddo, ei swyddogaeth o benderfynu ar yr apêl neu unrhyw fater sy’n ymwneud â’r apêl, ac mae Atodlen 5 yn cael effaith mewn perthynas â phenodiad o’r fath.

(7) Yn y Rhan hon—

ystyr “hysbysiad perthnasol” (“relevant notice”) yw hysbysiad stop, hysbysiad adfer neu hysbysiad a ddyroddir o dan baragraff 5 o Atodlen 4;

ystyr “partïon â buddiant” (“interested parties”) yw—

(a)

y fath gyrff ymgynghori y mae Gweinidogion Cymru yn ystyried sy’n briodol;

(b)

person sydd wedi cyflwyno sylwadau mewn cysylltiad â’r penderfyniad perthnasol;

(c)

Gwladwriaeth AEE sy’n debygol o gael ei heffeithio yn unol â rheoliad 13(1);

(d)

awdurdod neu berson a roddodd ei farn yn unol â rheoliad 13(4)(b);

(e)

unrhyw berson arall y mae’n ymddangos i Weinidogion Cymru fod ganddo fuddiant penodol yn nhestun yr apêl;

ystyr “penderfyniad perthnasol” (“relevant decision”) yw penderfyniad sgrinio a wnaed o dan reoliad 7, penderfyniad cydsyniad a wnaed o dan reoliad 15 a phenderfyniad a wnaed o dan baragraff 3 o Atodlen 4; ac

ystyr “person penodedig” (“appointed person”) yw person a benodir gan Weinidogion Cymru yn unol â rheoliad 30(6).

Trafodion apêl

31.—( 1) Os yw Gweinidogion Cymru wedi eu bodloni bod apêl a gyflwynwyd yn cydymffurfio â gofynion rheoliad 30 o ran yr holl fanylion perthnasol, rhaid iddynt fwrw ymlaen i benderfynu ar yr apêl.

(2) Cyn penderfynu ar yr apêl rhaid i Weinidogion Cymru, gan ganiatáu’r fath gyfnod sy’n rhesymol—

(a) gwahodd yr apelydd ac unrhyw bartïon â buddiant i gyflwyno sylwadau a dogfennau ategol mewn perthynas â’r apêl;

(b) anfon at y partïon â buddiant gopi o unrhyw sylwadau a dogfennau ategol a gyflwynir gan yr apelydd;

(c) anfon at yr apelydd gopi o unrhyw sylwadau a dogfennau ategol a gyflwynir gan y partïon â buddiant;

(d) rhoi cyfle i’r apelydd a’r partïon â buddiant gyflwyno sylwadaethau ar sylwadau a dogfennau ategol ei gilydd i’r person penodedig.

(3) Caiff Gweinidogion Cymru ofyn am wybodaeth bellach gan yr apelydd neu’r partïon â buddiant ar unrhyw adeg.

(4) Caiff Gweinidogion Cymru ddiystyru unrhyw sylwadau, sylwadaethau neu ddogfennau a gyflwynwyd ac eithrio yn unol â darpariaethau’r Rheoliadau hyn.

(5) Os yw gwrandawiad llafar neu ymchwiliad lleol i’w gynnal, rhaid i Weinidogion Cymru—

(a) rhoi 6 wythnos o hysbysiad i’r apelydd a’r partïon â buddiant ynghylch y dyddiad, yr amser a’r lle a bennir ar gyfer y gwrandawiad neu’r ymchwiliad lleol ac enw’r person a benodir i gynnal y gwrandawiad neu’r ymchwiliad lleol (neu, fel y bo’n berthnasol, i benderfynu ar yr apêl); a

(b) rhoi’r fath hysbysiad y maent yn meddwl sy’n briodol i hysbysu’r cyhoedd nid llai na 21 o ddiwrnodau cyn y dyddiad a bennir ar gyfer y gwrandawiad neu’r ymchwiliad lleol.

(6) Mae gan yr apelydd yr hawl i ymddangos mewn gwrandawiad llafar neu ymchwiliad lleol, a chaiff Gweinidogion Cymru ganiatáu i berson â buddiant ymddangos hefyd.

(7) Wrth i Weinidogion Cymru benderfynu ar apêl—

(a) cânt gadarnhau, amrywio neu ddirymu hysbysiad perthnasol;

(b) cânt gadarnhau neu wrthdroi penderfyniad perthnasol neu unrhyw ran ohono;

(c) rhaid iddynt hysbysu’r apelydd ac unrhyw bartïon eraill i’r apêl.

(8) Caiff yr apelydd dynnu apêl yn ôl ar unrhyw adeg cyn y’i penderfynir.

(9) Y dull ar gyfer tynnu apêl yn ôl yw drwy gyflwyno hysbysiad ysgrifenedig oddi wrth yr apelydd i Weinidogion Cymru.

(10) Os tynnir apêl yn ôl, mae Gweinidogion Cymru yn peidio â bod o dan ddyletswydd i’w hystyried a’i phenderfynu.

(11) Mae is-adrannau (2) i (5) o adran 250 o Ddeddf Llywodraeth Leol 1972(20) (ymchwiliadau lleol, tystiolaeth a chostau) yn gymwys mewn perthynas â gwrandawiadau neu ymchwiliadau lleol a gynhelir yn unol â rheoliad 33 fel y maent yn gymwys i ymchwiliadau lleol o dan yr adran honno, ond fel pe bai’r cyfeiriadau at y Gweinidog yn gyfeiriadau at Weinidogion Cymru a chan hepgor y cyfeiriadau at awdurdod lleol.

(12) Mae adran 322C o Ddeddf Cynllunio Gwlad a Thref 1990(21) (Costau: Cymru) yn gymwys mewn perthynas â gwrandawiad llafar neu ymchwiliad lleol o dan reoliad 30 fel y mae’n gymwys i wrandawiad neu ymchwiliad lleol y cyfeirir ato yn yr adran honno.

Effaith apelau ar hysbysiadau

32.—( 1) Pan fo apêl yn cael ei chyflwyno yn erbyn hysbysiad adfer, ni fydd yr hysbysiad yn cael effaith tan fod Gweinidogion Cymru wedi penderfynu ar yr apêl yn unol â rheoliad 31(7).

(2) Pan fo apêl yn cael ei chyflwyno yn erbyn hysbysiad stop, mae’r holl ofynion sydd wedi eu cynnwys yn yr hysbysiad yn cael effaith tan fod Gweinidogion Cymru wedi penderfynu ar yr apêl yn unol â rheoliad 31(7).

(3) Mae penderfyniad gan Weinidogion Cymru i amrywio hysbysiad stop neu hysbysiad adfer yn unol â rheoliad 31(7)(a) ond yn cael effaith o ddyddiad yr hysbysiad o dan reoliad 31(7)(c) yn unig.

Cais i’r Uchel Lys gan berson a dramgwyddir

33.—( 1) Caiff person a dramgwyddir gan benderfyniad Gweinidogion Cymru nad yw prosiect yn brosiect sylweddol neu benderfyniad i roi cydsyniad i brosiect sylweddol wneud cais i’r Uchel Lys am orchymyn i ddiddymu’r penderfyniad.

(2) Caiff yr Uchel Lys ddiddymu penderfyniad a grybwyllir ym mharagraff (1) os yw wedi ei fodloni—

(a) nad yw’r penderfyniad wedi ei wneud yn gyfreithlon; neu

(b) bod buddiannau’r person sydd wedi gwneud cais i’r llys wedi eu rhagfarnu’n sylweddol gan fethiant i gydymffurfio ag unrhyw un neu ragor o ofynion eraill y Rheoliadau hyn.

(3) Rhaid cyflwyno cais i’r Uchel Lys o dan y rheoliad hwn o fewn 6 wythnos i’r dyddiad y mae’r penderfyniad—

(a) yn cael ei nodi yn y gofrestr yn unol â rheoliad 7(6)(b); neu

(b) yn cael ei gyhoeddi yn unol â rheoliad 18(b).

(4) Caiff yr Uchel Lys drwy orchymyn interim, tra’n disgwyl penderfyniad ar gais o dan y rheoliad hwn, atal y penderfyniad rhag cael ei weithredu ar y fath delerau y mae’n ystyried sy’n briodol.

RHAN 6 Darpariaethau terfynol

Diwygio Rheoliadau’r Polisi Amaethyddol Cyffredin (System Integredig Gweinyddu a Rheoli a Gorfodi a Thrawsgydymffurfio) (Cymru) 2014

34.   Mae Rheoliadau’r Polisi Amaethyddol Cyffredin (System Integredig Gweinyddu a Rheoli a Gorfodi a Thrawsgydymffurfio) (Cymru) 2014(22) wedi eu diwygio drwy roi’r paragraff a ganlyn yn lle paragraff 10 o Atodlen 1—

“10.— (1) Ni chaiff buddiolwr ddechrau neu gyflawni prosiect ar dir lled-naturiol a/neu dir heb ei drin neu brosiect ailstrwythuro yn groes i reoliadau 4 neu 8 o’r Rheoliadau AEA (Amaethyddiaeth).

(2) Ni chaiff buddiolwr fynd yn groes i hysbysiad stop a gyflwynwyd iddo o dan reoliad 24 o’r Rheoliadau AEA (Amaethyddiaeth).

(3) Ni chaiff buddiolwr, heb esgus rhesymol, fethu â chydymffurfio ag unrhyw un neu ragor o ofynion hysbysiad adfer a gyflwynir iddo o dan reoliad 26 o’r Rheoliadau AEA (Amaethyddiaeth).

(4) Yn y paragraff hwn, mae i “prosiect ar dir lled-naturiol a/neu dir heb ei drin” (“project on semi-natural and/or uncultivated land”) yr ystyr a roddir iddo gan reoliad 2(1) o’r Rheoliadau AEA (Amaethyddiaeth).

(5) Yn y paragraff hwn, ystyr “y Rheoliadau AEA (Amaethyddiaeth)” (“the EIA (Agriculture) Regulations”) yw Rheoliadau Asesu’r Effeithiau Amgylcheddol (Amaethyddiaeth) (Cymru) 2017.”

Dirymu

35.   Mae Rheoliadau Asesu’r Effeithiau Amgylcheddol (Amaethyddiaeth) (Cymru) 2007(23) wedi eu dirymu.

Darpariaethau trosiannol

36.—( 1) Mae’r rheoliad hwn yn darparu ar gyfer trin hysbysiadau penodol a gyflwynwyd o dan Reoliadau Asesu’r Effeithiau Amgylcheddol (Amaethyddiaeth) (Cymru) 2007 (“Rheoliadau 2007”).

(2) Yn ddarostyngedig i baragraff (4), mae hysbysiad stop a gyflwynir yn unol â rheoliad 24 o Reoliadau 2007 i’w drin fel pe bai wedi ei gyflwyno yn unol â rheoliad 24 o’r Rheoliadau hyn, ac mae rheoliadau 25, 28 a 29 o’r Rheoliadau hyn yn gymwys i unrhyw gamau gorfodi a gymerir mewn cysylltiad â thorri’r hysbysiad.

(3) Yn ddarostyngedig i baragraff (4), mae hysbysiad adfer a gyflwynir yn unol â rheoliad 26 o Reoliadau 2007 i’w drin fel pe bai wedi ei gyflwyno yn unol â rheoliad 26 o’r Rheoliadau hyn, ac mae rheoliadau 27 i 29 yn gymwys i unrhyw gamau gorfodi a gymerir mewn cysylltiad â thorri’r hysbysiad.

(4) Nid oes dim ym mharagraff (2) neu (3) yn effeithio ar unrhyw apêl a gyflwynir yn unol â rheoliad 30(2) o Reoliadau 2007 cyn i’r Rheoliadau hyn ddod i rym.

Jane Hutt

Un o Weinidogion Cymru

20 Ebrill 2017