Rheoliadau Hadau (Diwygio etc.) (Cymru) (Ymadael â’r UE) 2019

Offerynnau Statudol Cymru

2019 Rhif 1382 (Cy. 245)

Ymadael Â’r Undeb Ewropeaidd, Cymru

Hadau, Cymru

Rheoliadau Hadau (Diwygio etc.) (Cymru) (Ymadael â’r UE) 2019

Gwnaed

am 6:00 p.m. ar 22 Hydref 2019

Yn dod i rym yn unol â rheoliad 1(2)

Mae Gweinidogion Cymru yn gwneud y Rheoliadau hyn drwy arfer y pwerau a roddir gan—

(a) mewn perthynas â Rhan 1, y pwerau a grybwyllir ym mharagraffau (b) ac (c);

(b) mewn perthynas â Rhan 2, adran 2(2) o Ddeddf y Cymunedau Ewropeaidd 1972(1);

(c) mewn perthynas â Rhan 3, paragraff 1(1) o Atodlen 2 i Ddeddf yr Undeb Ewropeaidd (Ymadael) 2018(2).

Mae Gweinidogion Cymru wedi eu dynodi at ddibenion adran 2(2) o Ddeddf y Cymunedau Ewropeaidd 1972 mewn perthynas â’r polisi amaethyddol cyffredin(3).

Mae’r gofyniad ym mharagraff 4(a) o Atodlen 2 (sy’n ymwneud ag ymgynghori â’r Ysgrifennydd Gwladol) i Ddeddf yr Undeb Ewropeaidd (Ymadael) 2018 wedi ei fodloni.

Yn unol ag adran 59(3) o Ddeddf Llywodraeth Cymru 2006(4) a pharagraff 1(9) o Atodlen 7 i Ddeddf yr Undeb Ewropeaidd (Ymadael) 2018, gosodwyd drafft o’r offeryn hwn gerbron Cynulliad Cenedlaethol Cymru ac fe’i cymeradwywyd drwy benderfyniad gan Gynulliad Cenedlaethol Cymru.

RHAN 1 Cyflwyniad

Enwi, cychwyn a chymhwyso

1.—( 1) Enw’r Rheoliadau hyn yw Rheoliadau Hadau (Diwygio etc.) (Cymru) (Ymadael â’r UE) 2019.

(2) Daw’r Rheoliadau hyn i rym fel a ganlyn—

(a) o ran y Rhan hon a Rhan 2, drannoeth y diwrnod y gwneir y Rheoliadau hyn;

(b) o ran Rhan 3, yn union cyn y diwrnod ymadael.

(3) Mae’r Rheoliadau hyn yn gymwys o ran Cymru.

RHAN 2 Marchnata hadau a deunyddiau lluosogi planhigion: diwygio deddfwriaeth ddomestig

Rheoliadau Marchnata Planhigion Ffrwythau a Deunyddiau Lluosogi (Cymru) 2017

2.   Yn Rheoliadau Marchnata Planhigion Ffrwythau a Deunyddiau Lluosogi (Cymru) 2017(5), yn rheoliad 5, yn lle paragraffau (3) a (4) rhodder—

“(3) Caiff Gweinidogion Cymru awdurdodi marchnata deunyddiau planhigion o unrhyw wlad y tu allan i’r Undeb Ewropeaidd os ydynt wedi eu bodloni bod y deunyddiau planhigion wedi eu cynhyrchu o dan amodau sy’n cyfateb i’r gofynion yn y Rheoliadau hyn ar gyfer deunyddiau planhigion.”

RHAN 3 Marchnata hadau a deunyddiau lluosogi planhigion: diwygio deddfwriaeth ddomestig o ganlyniad i ymadawiad y Deyrnas Unedig â’r Undeb Ewropeaidd

Rheoliadau Marchnata Hadau a Deunyddiau Lluosogi Planhigion (Diwygio) (Cymru) (Ymadael â’r UE) 2019

3.—( 1) Mae Rheoliadau Marchnata Hadau a Deunyddiau Lluosogi Planhigion (Diwygio) (Cymru) (Ymadael â’r UE) 2019(6) wedi eu diwygio fel a ganlyn.

(2) Yn rheoliad 5(4), yn lle’r geiriau cyn y testun a fewnosodir, rhodder—

“Yn rheoliad 5—

(a)

ym mharagraff (3), yn lle “Undeb Ewropeaidd” rhodder “Deyrnas Unedig”;

(b)

ar y diwedd mewnosoder—”.

Lesley Griffiths

Gweinidog yr Amgylchedd, Ynni a Materion Gwledig, un o Weinidogion Cymru

Am 6:00 p.m. ar 22 Hydref 2019

NODYN ESBONIADOL

(Nid yw’r nodyn hwn yn rhan o’r Rheoliadau)

Mae Rhan 2 o’r Rheoliadau hyn wedi ei gwneud drwy arfer y pwerau a roddir gan adran 2(2) o Ddeddf y Cymunedau Ewropeaidd 1972. Mae rheoliad 2 yn diwygio Rheoliadau Marchnata Planhigion Ffrwythau a Deunyddiau Lluosogi (Cymru) 2017 i alluogi Gweinidogion Cymru i awdurdodi marchnata planhigion ffrwythau a deunyddiau lluosogi sy’n dod o wledydd y tu allan i’r Undeb Ewropeaidd o dan amgylchiadau penodol.

Mae Rhan 3 o’r Rheoliadau hyn wedi ei gwneud drwy arfer y pwerau a roddir gan Ddeddf yr Undeb Ewropeaidd (Ymadael) 2018. Mae rheoliad 3 yn diwygio Rheoliadau Marchnata Hadau a Deunyddiau Lluosogi Planhigion (Diwygio) (Cymru) (Ymadael â’r UE) 2019 i sicrhau bod y diwygiad a wnaed gan reoliad 2 yn parhau i weithredu’n effeithiol ar ôl i’r Deyrnas Unedig ymadael â’r Undeb Ewropeaidd.

Ystyriwyd Cod Ymarfer Gweinidogion Cymru ar gynnal Asesiadau Effaith Rheoleiddiol mewn perthynas â’r Rheoliadau hyn. O ganlyniad, ystyriwyd nad oedd yn angenrheidiol cynnal asesiad effaith rheoleiddiol o’r costau a’r manteision sy’n debygol o ddeillio o gydymffurfio â’r Rheoliadau hyn.

(1)

1972 p. 68; diwygiwyd adran 2(2) gan adran 27(1)(a) o Ddeddf Diwygio Deddfwriaethol a Rheoleiddiol 2006 (p. 51) a Rhan 1 o’r Atodlen i Ddeddf yr Undeb Ewropeaidd (Diwygio) 2008 (p. 7). Mae wedi ei diddymu yn rhagolygol gan adran 1 o Ddeddf yr Undeb Ewropeaidd (Ymadael) 2018 (p. 16) o’r diwrnod ymadael (gweler y diffiniad o “exit day” yn adran 20 o’r Ddeddf honno).

(2)

2018 p. 16.

(3)

O.S. 2010/2690.

(4)

2006 p. 32. Diwygiwyd adran 59(3) gan adran 20(2)(c) o Ddeddf Cymru 2017 (p. 4).

(5)

O.S. 2017/691 (Cy. 163), y mae diwygiadau iddo nad ydynt yn berthnasol i’r Rheoliadau hyn.

(6)

O.S. 2019/368 (Cy. 90).