Gorchymyn Deddf Anghenion Dysgu Ychwanegol a’r Tribiwnlys Addysg (Cymru) 2018 (Cychwyn Rhif 3 a Rhif 4 a Darpariaethau Trosiannol a Darpariaethau Arbed) (Diwygio) 2021

NODYN ESBONIADOL

(Nid yw’r nodyn hwn yn rhan o’r Gorchymyn)

Mae’r Gorchymyn hwn yn diwygio Gorchymyn Deddf Anghenion Dysgu Ychwanegol a’r Tribiwnlys Addysg (Cymru) 2018 (Cychwyn Rhif 3 a Darpariaethau Trosiannol a Darpariaethau Arbed) 2021 (“Gorchymyn Cychwyn Rhif 3”) a Gorchymyn Deddf Anghenion Dysgu Ychwanegol a’r Tribiwnlys Addysg (Cymru) 2018 (Cychwyn Rhif 4 a Darpariaethau Trosiannol a Darpariaethau Arbed) 2021 (“Gorchymyn Cychwyn Rhif 4”) sy’n dwyn i rym ddarpariaethau yn Neddf Anghenion Dysgu Ychwanegol a’r Tribiwnlys Addysg (Cymru) 2018 (“y Ddeddf”). Mae’r Gorchmynion Cychwyn hyn yn gwneud darpariaeth ar gyfer trosglwyddo plant ag anghenion addysgol arbennig penodol a nodwyd i’r gyfraith newydd a nodir yn y Ddeddf. Maent yn cynnwys diffiniadau o “y gyfraith newydd” a “yr hen gyfraith” (gweler erthygl 1).

Mae’r Gorchymyn hwn yn mewnosod erthyglau 16A, 16B ac 16C yng Ngorchymyn Cychwyn Rhif 3 (erthygl 2). Mae erthygl 16A yn gymwys i blentyn sy’n peidio â bod yn ddisgybl cofrestredig yn yr ysgol a gynhelir yr oedd y plentyn yn ddisgybl cofrestredig ynddi ar 1 Medi 2021 (“yr ysgol gyntaf”). Bydd y plentyn yn trosglwyddo i’r gyfraith newydd ar y dyddiad y mae’r plentyn yn peidio â bod yn ddisgybl cofrestredig yn yr ysgol gyntaf.

Mae erthygl 16B yn gymwys i blentyn sydd hefyd yn dod yn ddisgybl cofrestredig neu’n fyfyriwr sydd wedi ymrestru mewn sefydliad arall (sydd wedi ei gofrestru mewn mwy nag un lleoliad) ac y mae awdurdod lleol yng Nghymru yn gyfrifol amdano. Bydd y plentyn yn trosglwyddo i’r gyfraith newydd ar y dyddiad y daw’r plentyn yn ddisgybl cofrestredig neu’n fyfyriwr sydd wedi ymrestru mewn sefydliad arall.

Mae erthygl 16C yn gymwys i blentyn sy’n dod yn blentyn sy’n derbyn gofal gan awdurdod lleol o fewn ystyr adran 15 o’r Ddeddf. Bydd y plentyn yn trosglwyddo i’r gyfraith newydd ar y dyddiad y daw’r plentyn yn blentyn sy’n derbyn gofal gan yr awdurdod lleol.

Mae’r Gorchymyn hwn yn diwygio Gorchymyn Cychwyn Rhif 4 drwy roi erthygl 8 newydd yn lle’r un bresennol sy’n caniatáu i blentyn ag anghenion addysgol arbennig a nodwyd neu riant y plentyn hwnnw wneud cais i’r awdurdod lleol priodol i’r gyfraith newydd fod yn gymwys i’r plentyn.