Rheoliadau Addysg (Y Diwrnod Ysgol a’r Flwyddyn Ysgol) (Cymru) (Diwygio) 2023

Offerynnau Statudol Cymru

2023 Rhif 37 (Cy. 4)

Addysg, Cymru

Rheoliadau Addysg (Y Diwrnod Ysgol a’r Flwyddyn Ysgol) (Cymru) (Diwygio) 2023

Gwnaed

16 Ionawr 2023

Gosodwyd gerbron Senedd Cymru

18 Ionawr 2023

Yn dod i rym

10 Chwefror 2023

Mae Gweinidogion Cymru, drwy arfer y pwerau a roddir i’r Ysgrifennydd Gwladol gan adrannau 551 a 569(4) a (5) o Ddeddf Addysg 1996(1), ac a freiniwyd bellach ynddynt hwy(2), yn gwneud y Rheoliadau a ganlyn:

Enwi a chychwyn

1.   Enw’r Rheoliadau hyn yw Rheoliadau Addysg (Y Diwrnod Ysgol a’r Flwyddyn Ysgol) (Cymru) (Diwygio) 2023 a deuant i rym ar 10 Chwefror 2023.

Diwygio Rheoliadau Addysg (Y Diwrnod Ysgol a’r Flwyddyn Ysgol) (Cymru) 2003

2.—( 1) Mae Rheoliadau Addysg (Y Diwrnod Ysgol a’r Flwyddyn Ysgol) (Cymru) 2003(3) wedi eu diwygio fel a ganlyn.

(2) Yn rheoliad 3, yn y diffiniad o “ysgol” hepgorer “, neu ysgol arbennig nad yw awdurdod lleol yn ei chynnal”.

(3) Yn rheoliad 4, yn lle paragraff (8) rhodder—

“(8) Mae’r cyfeiriad ym mharagraff (2) at 380 o sesiynau i’w gymryd fel cyfeiriad at 376 o sesiynau mewn perthynas â’r flwyddyn ysgol 2022–2023.”

(4) Yn lle rheoliad 5 rhodder—

“5.— (1) Mae’r paragraff hwn yn gymwys i unrhyw sesiwn ysgol sy’n dod o fewn y blynyddoedd ysgol 2022–2023, 2023–2024 a 2024–2025 sydd wedi ei neilltuo (yn llwyr neu’n bennaf) i ddarparu hyfforddiant (gan gynnwys hyfforddiant a fynychir gan staff sy’n addysgu a staff nad ydynt yn addysgu a hyfforddiant a gynhelir ar y cyd ag ysgolion eraill) neu i baratoi a chynllunio, mewn perthynas ag un neu ragor o’r canlynol—

(a) lleihau effaith tlodi ar gynnydd a chyrhaeddiad disgyblion yn yr ysgol;

(b) gweithredu Deddf Anghenion Dysgu Ychwanegol a’r Tribiwnlys Addysg (Cymru) 2018(4) ar gyfer disgyblion yn yr ysgol;

(c) y cwricwlwm sydd i’w ddarparu yn yr ysgol o dan Ran 2 o Ddeddf Cwricwlwm ac Asesu (Cymru) 2021(5).

(2) Mae paragraff (1) i gael effaith mewn perthynas â dim mwy na dwy sesiwn ysgol ym mhob blwyddyn ysgol.

(3) Pan fo paragraff (1) yn gymwys, mae’r sesiwn honno i’w hystyried at ddibenion rheoliad 4 fel sesiwn pan gyfarfu’r ysgol.”

Jeremy Miles

Gweinidog y Gymraeg ac Addysg, un o Weinidogion Cymru

16 Ionawr 2023

NODYN ESBONIADOL

(Nid yw’r nodyn hwn yn rhan o’r Rheoliadau)

Mae Rheoliadau Addysg (Y Diwrnod Ysgol a’r Flwyddyn Ysgol) (Cymru) 2003 (“Rheoliadau 2003”) yn gwneud darpariaeth ynghylch hyd y diwrnod ysgol, sydd fel arfer yn cael ei rannu yn ddwy sesiwn gydag egwyl yn y canol, ac i ysgolion gyfarfod am o leiaf 380 o sesiynau yn ystod unrhyw flwyddyn ysgol.

Mae’r Rheoliadau hyn yn diwygio’r diffiniad o “ysgol” yn rheoliad 3 o Reoliadau 2003, i adlewyrchu diwygiadau a wnaed i adran 342 o Ddeddf Addysg 1996(6) gan adran 57 o Ddeddf Anghenion Dysgu Ychwanegol a’r Tribiwnlys Addysg (Cymru) 2018(7). Bydd Rheoliadau 2003 felly yn gymwys i ysgolion a gynhelir gan awdurdod lleol.

Maent yn diwygio rheoliad 4(8) o Reoliadau 2003 i leihau isafswm nifer y sesiynau ysgol y mae rhaid eu cynnal yn y flwyddyn ysgol 2022–2023 o 380 i 376. Mae hyn yn adlewyrchu’r gwyliau banc ychwanegol ar 19 Medi 2022 ar gyfer Angladd Gwladol Ei Mawrhydi y Frenhines Elizabeth II, ac ar 8 Mai 2023 i nodi achlysur Coroni Ei Fawrhydi y Brenin Charles III.

Maent hefyd yn diwygio rheoliad 5 o Reoliadau 2003 i ddarparu i ddim mwy na dwy sesiwn ym mhob un o’r blynyddoedd ysgol 2022–2023, 2023–2024 a 2024–2025 gyfrif fel sesiynau pan gyfarfu’r ysgol, os yw’r sesiynau hynny wedi eu neilltuo (yn llwyr neu’n bennaf) i unrhyw un neu ragor o’r materion a ragnodir.

Ystyriwyd Cod Ymarfer Gweinidogion Cymru ar gynnal Asesiadau Effaith Rheoleiddiol mewn perthynas â’r Rheoliadau hyn. O ganlyniad, lluniwyd asesiad effaith rheoleiddiol o’r costau a’r manteision sy’n debygol o ddeillio o gydymffurfio â’r Rheoliadau hyn. Gellir cael copi oddi wrth: Y Gangen Deddfwriaeth a Llywodraethiant, Yr Is-Adran Effeithiolrwydd Ysgolion, Llywodraeth Cymru, Parc Cathays, Caerdydd, CF10 3NQ.

(1)

1996 p. 56. Mewnosodwyd adran 551(1A) gan baragraff 39 o Atodlen 7 i Ddeddf Addysg 1997 (p. 44), a diwygiwyd adran 551(2) gan baragraff 166 o Atodlen 30 ac Atodlen 31 i Ddeddf Safonau a Fframwaith Ysgolion 1998 (p. 31). Am ystyr “regulations” gweler adran 579(1).

(2)

Trosglwyddwyd swyddogaethau’r Ysgrifennydd Gwladol i Gynulliad Cenedlaethol Cymru gan Orchymyn Cynulliad Cenedlaethol Cymru (Trosglwyddo Swyddogaethau) 1999 (O.S. 1999/672) ac yna i Weinidogion Cymru gan baragraff 30 o Atodlen 11 i Ddeddf Llywodraeth Cymru 2006 (p. 32).

(3)

O.S. 2003/3231 (Cy. 311), a ddiwygiwyd gan O.S. 2006/1262 (Cy. 119), O.S. 2008/1739 (Cy. 171), O.S. 2011/149 (Cy. 33), O.S. 2012/248 (Cy. 41), O.S. 2019/1131 (Cy. 196), O.S. 2020/848 (Cy. 187), O.S. 2021/1476 (Cy. 378) ac O.S. 2022/61 (Cy. 23).

(4)

2018 dccc 2.

(5)

2021 dsc 4.

(6)

1996 p. 56.

(7)

2018 dccc 2.