Rheoliadau Iawndal Enseffalopathi Sbyngffurf Buchol (BSE) (Cymru) 2006

Offerynnau Statudol Cymru

2006 Rhif 1512 (Cy.148)

ANIFEILIAID, CYMRU

IECHYD ANIFEILIAID

Rheoliadau Iawndal Enseffalopathi Sbyngffurf Buchol (BSE) (Cymru) 2006

Wedi'i wneud

13 Mehefin 2006

Yn dod i rym

14 Mehefin 2006

Mae'r Cynulliad Cenedlaethol yn gwneud y Rheoliadau canlynol o dan y pwerau a roddwyd gan adran 2(2) o Ddeddf y Cymunedau Ewropeaidd 1972(1).

Mae'r Cynulliad Cenedlaethol wedi cael ei ddynodi at ddibenion yr adran honno mewn perthynas â mesurau ym meysydd milfeddygol ar gyfer diogelu iechyd y cyhoedd(2).

Enwi, cychwyn a chymhwyso

1.   Yr enw ar y Rheoliadau hyn fydd Rheoliadau Iawndal Enseffalopathi Sbyngffurf Buchol (BSE) (Cymru) 2006, maent yn gymwys i Gymru ac yn dod i rym ar 14 Mehefin 2006. Nid yw'r Rheoliadau hyn yn berthnasol i anifeiliaid a gedwir ar gyfer pwrpasau ymchwil mewn mangreoedd a gymeradwyir ar gyfer y pwrpas hynny o dan reoliadau Eneffalopathïau Sbyngffurf Trosglwyddadwy (Cymru) 2006(3).

Dehongli

2.—( 1) Yn y Rheoliadau hyn–

ystyr “anifail buchol” (“bovine animal”) yw gwartheg yn cynnwys buail a byfflo (gan gynnwys byfflo dŵr);

ystyr “BSE” (“BSE”) yw enseffalopathi sbyngffurf buchol;

mae gan “pasbort gwartheg” (“cattle passport”) yr un ystyr ag sydd yn Rheoliadau Adnabod Gwartheg 1998(4);

ystyr “y Cynulliad Cenedlaethol” (“National Assembly”) yw Cynulliad Cenedlaethol Cymru;

Iawndal am anifeiliaid buchol sy'n cael eu cigydda oherwydd TSE

3.   Rhaid i'r Cynulliad Cenedlaethol dalu iawndal–

(a) pan fo anifail yn cael ei ladd o dan Atodlen 3 o Reoliadau Enseffalopathïau Sbyngffurf Trosglwyddadwy (Cymru) 2006;

(b) pan fo anifail i'w ladd o dan Atodlen 3 o Reoliadau Enseffalopathïau Sbyngffurf Trosglwyddadwy (Cymru) 2006, a bod yr anifail wedi ei brisio ar gyfer pwrpasau iawndal, ond fod yr anifail yn marw (neu yn cael ei ladd am resymau eraill) wedi prisio; neu

(c) lle bo anifail yn ddarostyngedig i gyfyngiad symud o dan Atodlen 3 o Reoliadau Enseffalopathïau Sbyngffurf Trosglwyddadwy (Cymru) 2006 a bod yn rhaid ei ladd fel mater o frys, a bod milfeddyg wedi datgan yn ysgrifenedig y byddai'r anifail fel arall wedi bod yn addas i'w fwyta gan bobl yn unol â Phennod VI o Adran I o Atodiad III i Reoliad (EC) Rhif 853/2004 o Senedd Ewrop a'r Cyngor sy'n gosod rheolau hylendid penodol ar gyfer bwyd sy'n dod o anifeiliaid(5), ac os felly yr iawndal yw gwerth y corff (gan gynnwys y gwaed a'r croen).

Swm yr iawndal sy'n daladwy

4.—( 1) Yr iawndal yw'r pris cyfartalog a delir ym Mhrydain fawr am anifail o'r oed a'r categori hwnnw o anifail–

(a) yn y chwe mis blaenorol yn achos anifail pedigri; ac

(b) yn achos unrhyw anifail buchol eraill, yn y mis blaenorol

(2) Anifail pedigri yw anifail sydd wedi cael tystysgrif pedigri gan sefydliad neu gymdeithas bridwyr sy'n cyflawni amodau Penderfyniad y Cyngor 84/247/EEC sy'n gosod y meini prawf ar gyfer cydnabod sefydliadau a chymdeithasau bridwyr sy'n cadw llyfrau buches ar gyfer anifeiliaid bridio pur o'r rhywogaeth buchol(6).

(3) Mae'n rhaid i'r Cynulliad Cenedlaethol gategoreiddio anifeiliaid fel a ganlyn, ac at bwrpas penderfynu ynglŷn â pha gategori i roi'r anifail, oed yr anifail yw'r oed, fel y dangosir gan ei basport gwartheg, ar y dyddiad y rhoddwyd yr hysbysiad o'r bwriad i'w ladd.

Categorïau

Gwryw	Menyw
Sector Eidion—anifail sydd ddim yn bedigri
Hyd at ac yn cynnwys 3 mis	Hyd at ac yn cynnwys 3 mis
Dros 3 mis hyd at ac yn cynnwys 6 mis	Dros 3 mis hyd at ac yn cynnwys 6 mis
Dros 6 mis hyd at ac yn cynnnwys 9 mis	Dros 6 mis hyd at ac yn cynnwys 9 mis
Dros 9 mis hyd at ac yn cynnwys 12 mis	Dros 9 mis hyd at ac yn cynnwys 12 mis
Dros 12 mis hyd at ac yn cynnwys 16 mis	Dros 12 mis hyd at ac yn cynnwys 16 mis
Dros 16 mis hyd at ac yn cynnwys 20 mis	Dros 16 mis hyd at ac yn cynnwys 20 mis
Dros 20 mis–	Dros 20 mis–
Teirw bridio	Wedi bwrw llo
Arall	Heb fwrw llo
Sector Llaeth—anifail sydd ddim yn bedigri
Hyd at ac yn cynnwys 3 mis	Hyd at ac yn cynnwys 3 mis
Dros 3 mis hyd at ac yn cynnwys 6 mis	Dros 3 mis hyd at ac yn cynnwys 6 mis
Dros 6 mis hyd at ac yn cynnwys 12 mis	Dros 6 mis hyd at ac yn cynnwys 12 mis
Dros 12 mis hyd at ac yn cynnwys 16 mis	Dros 12 mis hyd at ac yn cynnwys 16 mis
Dros 16 mis hyd at ac yn cynnwys 20 mis	Dros 16 mis hyd at ac yn cynnwys 20 mis
Dros 20 mis	Dros 20 mis–
	Wedi bwrw lloHeb fwrw llo
Sector Eidion — anifail pedigri
6 mis hyd at ac yn cynnwys 12 mis	6 mis hyd at ac yn cynnwys 12 mis
Dros 12 mis hyd at ac yn cynnwys 24 mis	Dros 12 mis hyd at ac yn cynnwys 24 mis
Dros 24 mis	Dros 24 mis (heb fwrw llo)
	Wedi bwrw llo o dan 36 mis
	Wedi bwrw llo 36 mis a drosodd
Sector Llaeth—anifail pedigri
Hyd at ac yn cynnwys 2 fis	Hyd at ac yn cynnwys 2 fis
Dros 2 fis hyd at ac yn cynnwys 12 mis	Dros 2 fis hyd at ac yn cynnwys 10 mis
Dros 12 mis hyd at ac yn cynnwys 24 mis	Dros 10 mis hyd at ac yn cynnwys 18 mis
Dros 24 mis	Dros 18 mis (heb fwrw llo)
	Wedi bwrw lllo o dan 36 mis
	Wedi bwrw llo 36 mis a throsodd

Eithriadau i'r swm o iawndal sydd yn daladwy

5.—( 1) Lle bo'r Cynulliad Cenedlaethol o'r farn nad yw'r data i gyfrifo'r pris cyfartalog yn ddigonol, yna mae'n rhaid iddo dalu iawndal–

(a) am anifeiliaid yn y categori hwnnw, y pris cyfartalog a gyfrifwyd yn flaenorol yn fwyaf diweddar lle roedd digon o ddata i gyfrifo'r pris cyfartalog; neu

(b) pris y farchnad, am yr anifail unigol.

(2) Ar gyfer byfflo neu bison, yr iawndal yw pris y farchnad.

(3) Pris y farchnad yw'r pris y gellid yn rhesymol fod wedi ei gael am anifail unigol oddi wrth brynwr yn y farchnad agored adeg prisio pe na bai'n ofynnol lladd yr anifail o dan Atodlen 3 o Reoliadau Enseffalopathïau Sbyngffurf Trosglwyddadwy (Cymru) 2006, wedi ei gyfrifo o dan reoliad 15 o Reoliadau Enseffalopathïau Trosgwlyddadwy (Cymru) 2006, gyda'r ffioedd am enwebu'r prisiwr a ffioedd y prisiwr yn daladwy gan y Cynulliad Cenedlaethol.

Dirymu

6.   Dirymir Rheoliadau 8, 9, 84, 93, Rhan III o Atodlen 1, rheoliad 17 o Ran IV o Atodlen 6A a rheoliadau 4 ac 8 o Atodlen 7, sydd yn ymwneud â thalu iawndal yn dilyn cigydda anifail buchol, o Reoliadau TSE (Cymru) 2002(7)pan ddaw'r Rheoliadau hyn i rym.

Llofnodwyd ar ran Cynulliad Cenedlaethol Cymru o dan adran 66(1) o Ddeddf Llywodraeth Cymru 1998(8)

D. Elis-Thomas

Llywydd y Cynulliad Cenedlaethol

13 Mehefin 2006

Nodyn Esboniadol

(Nid yw'r nodyn hwn yn rhan o'r Rheoliadau)

Mae'r Rheoliadau hyn, sy'n gymwys i Gymru, yn darparu swm yr iawndal sydd yn daladwy pan fo'r Cynulliad Cenedlaethol yn peri cigydda anifail buchol o dan Atodlen 3 o Reoliadau Enseffalopathïau Sbyngffurf Trosglwyddadwy (Cymru) 2006.

Mae'r Rheoliadau hyn yn darparu mai swm yr iawndal sydd yn daladwy ar gigydda anifail buchol yw y pris cyfartalog a dalwyd ym Mhrydain Fawr ar gyfer oed a chategori yr anifail yn y chwe mis blaenorol yn achos anifail pedigri, ac ar gyfer unrhyw anifail buchol arall yn y mis blaenorol.

Yr iawndal ar gyfer Byffalo a Buail yw pris y farchnad.

Mae arfarniad rheoliadol wedi ei baratoi ac wedi ei roi yn llyfrgell Cynulliad Cenedlaethol Cymru. Gellir cael copïau gan yr Adran Amgylchedd, Cynllunio a Chefn Gwlad, Llywodraeth Cynulliad Cymru, Parc Cathays, Caerdydd, CF10 3NQ.

(1)

1972 p.68.

(2)

O.S. 2003/1246.

(3)

O.S. 2006/1226.

(4)

O.S. 1998/871, fel y'i diwygiwyd gan O.S. 1998/2969 ac O.S. 1999/1339.

(5)

OJ Rhif L226, 25.6.2004, t.22.

(6)

OJ Rhif L125, 12.05.1984, t.58.

(7)

O.S. 2002/1416

(8)

1998, p.38