Rheoliadau Deddf Rhentu Cartrefi (Cymru) 2016 a Gorchymyn Digartrefedd (Addasrwydd Llety) (Cymru) 2015 (Diwygio) 2023

Offerynnau Statudol Cymru

2023 Rhif 1277 (Cy. 225)

Tai, Cymru

Rheoliadau Deddf Rhentu Cartrefi (Cymru) 2016 a Gorchymyn Digartrefedd (Addasrwydd Llety) (Cymru) 2015 (Diwygio) 2023

Gwnaed

28 Tachwedd 2023

Yn dod i rym

30 Tachwedd 2023

Mae Gweinidogion Cymru yn gwneud y Rheoliadau a ganlyn drwy arfer y pwerau a roddir iddynt gan baragraff 17 o Atodlen 2(1) i Ddeddf Rhentu Cartrefi (Cymru) 2016(2), ac adran 256(1) o’r Ddeddf honno ac adrannau 59(3) a 142(2) o Ddeddf Tai (Cymru) 2014(3).

Yn unol ag adran 256(3), (4)(h)(4) a (5) o Ddeddf Rhentu Cartrefi (Cymru) 2016 ac adran 142(3)(b)(i) o Ddeddf Tai (Cymru) 2014, gosodwyd drafft o’r Rheoliadau hyn gerbron Senedd Cymru ac fe’i cymeradwywyd ganddi drwy benderfyniad(5).

Enwi, dod i rym a dehongli

1.—( 1) Enw’r Rheoliadau hyn yw Rheoliadau Deddf Rhentu Cartrefi (Cymru) 2016 a Gorchymyn Digartrefedd (Addasrwydd Llety) (Cymru) 2015 (Diwygio) 2023 a deuant i rym ar 30 Tachwedd 2023.

(2) Yn y Rheoliadau hyn—

ystyr “y Ddeddf” (“the Act”) yw Deddf Rhentu Cartrefi (Cymru) 2016;

ystyr “y Gorchymyn” (“the Order”) yw Gorchymyn Digartrefedd (Addasrwydd Llety) (Cymru) 2015(6).

Diwygio’r Ddeddf

2.—( 1) Mae’r Ddeddf wedi ei diwygio fel a ganlyn.

(2) Yn Atodlen 2 (eithriadau i adran 7)—

(a) yn Rhan 3 (tenantiaethau a thrwyddedau nad ydynt byth yn gontractau meddiannaeth)—

(i) ym mharagraff 7(3)(7), ar ddiwedd paragraff (k), mewnosoder—

“(l) trwydded sy’n ymwneud â llety digartrefedd dros dro sector preifat (gweler paragraff 10A).”;

(ii) ar ôl paragraff 10 mewnosoder—

“Ystyr “llety digartrefedd dros dro sector preifat”

10A.— (1) Llety digartrefedd dros dro sector preifat yw llety—

(a) a ddarperir gan landlord preifat o dan drefniadau a wneir gydag awdurdod tai lleol yn unol ag unrhyw un neu ragor o swyddogaethau darparu tai i’r digartref yr awdurdod hwnnw, a

(b) sydd o fewn y diffiniad o “llety Gwely a Brecwast” yn erthygl 2 (dehongli) o Orchymyn Digartrefedd (Addasrwydd Llety) (Cymru) 2015 (O.S. 2015/1268 (Cy. 87)), fel y mae’n cael effaith ar 30 Tachwedd 2023, sef y dyddiad y daeth Rheoliadau Deddf Rhentu Cartrefi (Cymru) 2016 a Gorchymyn Digartrefedd (Addasrwydd Llety) (Cymru) 2015 (Diwygio) 2023 (O.S. 2023/1277 (W. 225)) i rym.

(2) Yn y paragraff hwn mae i “awdurdod tai lleol” a “swyddogaethau darparu tai i’r digartref” yr ystyron a roddir ym mharagraff 12(5).”;

(b) yn Rhan 4 (tenantiaethau a thrwyddedau y mae rheolau arbennig yn gymwys iddynt: digartrefedd), ym mharagraff 12(1), ar ôl “llety” mewnosoder “, ond nid yw’r paragraff hwn yn gymwys mewn perthynas â thrwydded o’r math a ddisgrifir ym mharagraff 7(3)(l)”.

(3) Yn adran 243(3) (awdurdodau lleol ac awdurdodau eraill), ar ôl “ac eithrio ym mharagraff” mewnosoder “10A a pharagraff”.

Diwygio’r Gorchymyn

3.   Yn erthygl 2 (dehongli) o’r Gorchymyn, yn lle’r diffiniad o “llety Gwely a Brecwast”, mewnosoder—

“ystyr “llety Gwely a Brecwast” (“B&B accommodation”) yw llety (pa un a yw brecwast wedi ei gynnwys ai peidio) sy’n bodloni’r amodau a ganlyn—

(a)

yr amod cyntaf yw—

(i)

naill ai nad yw cegin ar gael i’r trwyddedai, neu mae cegin ar gael i’r trwyddedai ond y mae’n cael ei rhannu gan bobl nad ydynt yn rhan o’r un aelwyd, a

(ii)

bod y cyfleusterau a ganlyn ar gael i’r trwyddedai ond mae’n bosibl eu bod yn cael eu rhannu gan bobl nad ydynt yn rhan o’r un aelwyd—

(aa)

toiled;

(bb)

cyfleusterau golchi personol;

(b)

yr ail amod yw nad yw’r llety ym mherchnogaeth neu’n cael ei reoli gan landlord cymunedol (o fewn ystyr adran 9 (landlordiaid cymunedol) o Ddeddf Rhentu Cartrefi (Cymru) 2016 (dccc 1)), elusen gofrestredig neu sefydliad gwirfoddol(8).”.

Julie Jame

Y Gweinidog Newid Hinsawdd, un o Weinidogion Cymru

28 Tachwedd 2023

NODYN ESBONIADOL

(Nid yw’r nodyn hwn yn rhan o’r Rheoliadau)

Mae’r Rheoliadau hyn yn diwygio Atodlen 2 (eithriadau i adran 7) i Ddeddf Rhentu Cartrefi (Cymru) 2016 (dccc 1) (“y Ddeddf”), yn gwneud diwygiad canlyniadol i adran 243(3) o’r Ddeddf ac yn diwygio’r diffiniad o “llety Gwely a Brecwast” yng Ngorchymyn Digartrefedd (Addasrwydd Llety) (Cymru) 2015 (O.S. 2015/1268 (Cy. 87)) (“y Gorchymyn”).

Mae rheoliad 2(2) yn diwygio Atodlen 2 i’r Ddeddf. Mae rheoliad 2(2)(a)(i) yn mewnosod paragraff newydd 7(3)(l) yn Rhan 3 o’r Atodlen honno. Mae hyn yn darparu nad yw trwydded sy’n ymwneud â llety digartrefedd dros dro sector preifat (fel y’i diffinnir) byth yn gontract meddiannaeth.

Mae rheoliad 2(2)(a)(ii) yn mewnosod paragraff newydd 10A yn Rhan 3 o Atodlen 2 i’r Ddeddf sy’n darparu diffiniad o lety digartrefedd dros dro sector preifat.

Mae rheoliad 2(2)(b) yn diwygio paragraff 12(1), yn Rhan 4 o Atodlen 2 i’r Ddeddf, i’w gwneud yn eglur nad yw paragraff 12 yn gymwys i drwydded o’r math a ddisgrifir ym mharagraff 7(3)(1) sydd newydd ei fewnosod yn Atodlen 2.

Mae rheoliad 2(3) yn diwygio adran 243(3) o’r Ddeddf i’w gwneud yn eglur nad yw’r diffiniad o “awdurdod tai lleol” a nodir yn yr adran honno yn gymwys mewn perthynas â pharagraff 7(3)(1) sydd newydd ei fewnosod yn Atodlen 2.

Cyn i’r Rheoliadau hyn ddod i rym, mae contractau meddiannaeth wedi eu hatal rhag codi mewn perthynas â llety digartrefedd dros dro sector preifat, yn rhinwedd rheoliad 16 o Reoliadau Deddf Rhentu Cartrefi (Cymru) 2016 (Darpariaethau Arbed a Darpariaethau Trosiannol) 2022 (O.S. 2022/1172 (Cy. 242)).

Mae rheoliad 3 yn diwygio’r diffiniad o “llety Gwely a Brecwast” yn erthygl 2 o’r Gorchymyn, er mwyn adlewyrchu nodweddion y llety hwnnw yn fwy eglur.

Ystyriwyd Cod Ymarfer Gweinidogion Cymru ar gynnal Asesiadau Effaith Rheoleiddiol mewn perthynas â’r Rheoliadau hyn. O ganlyniad, lluniwyd asesiad effaith rheoleiddiol o’r costau a’r manteision sy’n debygol o ddeillio o gydymffurfio â’r Rheoliadau hyn. Gellir cael copi oddi wrth: Yr Adran Dai, Llywodraeth Cymru, Parc Busnes Rhyd-y-car, Merthyr Tudful, CF48 1UZ.

(1)

Mae diwygiadau i Atodlen 2 ond nid yw’r un ohonynt yn berthnasol i baragraff 17.

(2)

2016 dccc 1.

(3)

2014 dccc 7.

(4)

Mae diwygiadau i adran 256(4) ond nid yw’r un ohonynt yn berthnasol i’r Rheoliadau hyn.

(5)

Mae’r cyfeiriadau yn adran 142 o Ddeddf Tai (Cymru) 2014 ac adran 256(3) o Ddeddf Rhentu Cartrefi (Cymru) 2016 at Gynulliad Cenedlaethol Cymru bellach yn cael effaith fel cyfeiriadau at Senedd Cymru yn rhinwedd adran 150A(2) o Ddeddf Llywodraeth Cymru 2006 (p. 32).

(6)

O.S. 2015/1268 (Cy. 87).

(7)

Diwygiwyd paragraff 7(3) gan adran 14 o Ddeddf Rhentu Cartrefi (Diwygio) (Cymru) 2021 (dsc 3) a pharagraffau 1 a 5(2) o Atodlen 5 iddi, adran 66 o Ddeddf Mewnfudo 2016 (p. 19) a pharagraff 2(n) o Ran 1 o Atodlen 11 iddi a rheoliad 2 o O.S. 2022/803 (Cy. 179).

(8)

Gweler y diffiniad o “sefydliad gwirfoddol” (“voluntary organisation”) yn adran 99 o Ddeddf Tai (Cymru) 2014. Mae adran 99 wedi ei diwygio ond nid yw’r un o’r diwygiadau yn berthnasol i’r offeryn hwn.